السبت، 11 أبريل 2009

بوتفليقه و الخيبة العربية

ندخل فالموضوع دون اى مقدمات
نرى ان نتائج الانتخابات فى
الدول العربية تحصد ارقام قياسية
فبالأمس فاز الرئيس الجزائرى عبدالعزيز بوتفليقه
بالانتخابات و ذلك بنسبة 90.2 فالمية
كفاية بقى لغة عربية فصحى بلا وجع دماغ
خير بقى اللهم اجعله خير
اذ فجأة طلع ان كل شعوب الوطن العربى بتحب حكامها
يعنى مفيش شعب عربى بيكره الحاكم بتاعه
طب ليه بقى الكلام ان الحكام فاسدين و فاشلين
مايك كان قال لى انه سمع حمدى قنديل بيقول
فى واحد رشح نفسه قدام بوتفلقيه
دخلوه مستشفى المجانين و طلعوا له شهادة رسمى انه مختل عقليا
فحمدى قنديل بيقول
طبعا
(هو فى حد عاقل يرشح نفسه قدام حاكم عربى)
-----
على اساس ان فى حاكم عربى بيسقط فالانتخابات
دول بيعملوا الانتخابات دى عشان يعرفوا مين
اللى امه داعية عليه و قرر يرشح نفسه قدامهم
عندكم حسنى (حبيب قلبى) راجل عسل و كُباره كده
المفروض بقى يقعد يرتاح تعبناه كتير معانا
لما عمل الانتخابات كان عشان يبعد عنه العين بس
و كل اللى وقفوا قصاده اللى مات و اللى الحزب بتاعة اتقلب ضده
و اللى اتسجن
و ما خفى كان اعظم
رئيس حزب الوفد الحالى اللى عمل الانقلاب على نعمان جمعه
(وجيه اباظة)
ابن عم وزير الزراعة
عارفين يعنى ايه
يعنى حزب وطنى لابس عبايه حزب الوفد
عيله اباظة دى كلها بتوع مصالح
حبقى اقول لكم عنهم حاجات كتير فبوست تانى
ان شاء الله
نفسى اعرف حاجة هما الرؤساء و الوزراء ليه مش بيطلعوا عالمعاش
ليه الموظف الغلبان اللى محتاج كل مليم هو اللى بيطلع عالمعاش
ليه مفيش حد اقصى لسن رئيس الجمهورية
ليه لازم يموت الرئيس عشان يجى واحد غيرة
من اول تاريخنا من ساعة ما اصبحنا جمهورية
عبد الناصر مات مسكنا السادات
السادات اتقتل مسكنا مبارك
طب حيموت امتى ان شاء الله عشان
الحق انا اشوف رئيس غيره قبل ما انا اموت
الواحد مش عارف يعمل ايه بجد
يا جماعة انا اهوه بعلنها
انا عندى استعداد امسك الرياسة
مش حرفض طبعا
دا حقكم عليا
بس حيبقى مرتبى كام ؟
اللى يعرف الريس دخله الشهرى اد ايه
يقول لى عشان اعرف مستقبلى يا جماعه
ــــــــــــــــــــــــــــــــــــــــــــــــــ
البوست له جزء تانى
حتناول فيه بعض الرؤساء و الحكام العرب
السئ منهم و الحكيم ايضا
(المرة الجايه محمد السادس بإذن الله)
ان شاء الله

21 قول و لا يهمك:

marmar يقول...

نعم نعم مين هيرشح نفسو للرياسه ده
هنهرررج انا حجزت المكان ده قبلك
هعملكم البلد كوووووسه بالباشميل دلوقتي كوسه من غير باشميل انا بقى هتفنن فيها
همسكك انت وزير الحزب الالكتروني
وامسك حد منوفي ولا دمياطي وزاره الماليه
وامسك طالب ساقط ثانويه عامه تسعه وتلاتين مره وزاره التعليم
هيييييييييييييه
فليحيا الشعب الفاشل
هههههههههههههههههههههههههه
بس احنا كده هنستني يجي خمخه وعشييين شته وعشييين سنه
يعني يدوب يكون حبيب قلبك طلع عل معاش
ايه غريبه دي ؟
ايوة طلع عل معاش مهو لسه نوناااا
الله
بلاش ظلم

مواطن مصرى نايم يقول...

ههههههههههههههههههههههه
ما انا كنت بحجز لك يا جميل المكان
هو انا يعنى حتنازل عنه لحد غيرك يا مرمر
هههههههههههههههههه
انا مش عاوز امسك اى حزب
انا حبقى اروح معاكى
و النبى و النبى اروح معاكى
ههههههههههههههههه
منوفى او دمياطى
يبقى انا حهاجر
مع الاعتذار للخوه الاعداء
قصدى المنايفة
ههههههههههههههههههه
احلى حاجة وزير التعليم
دا انتى حتبقى ريسة فل الفل

يا رب النونو يكبر
دا انا بقيت عجوز عنه
ههههههههههههههههههههه

kochia يقول...

منتظرة البوست الجاي
ولو رشحت نفسك .. الحقيقة مش عارفة هنتخبك ولا لا
هبقي اشوف وقتها

تحياتي

سميرة يقول...

ازيك يا مواطن
انت فين من زمان؟؟؟
الموضوع المرة دي عاوز كلام كتيير اوي
بس انا من وجهة نظري بغض النظر عن استبداد الحكام عرب او غيرهم
بقول من رأيي ان السلطة والمال لهم سيطرة جامدة ع الانسان
بمعنى انه ممكن جدا يكون انسان عادي جدا ومجرد ما يمسك الحكم او الفلوس يتحول لحاجة تانية خااالص
عموما ربنا يكفينا شر السلطة وسيطرة المال

تحياتي يا مواطن

صدى الصمت - عاشقة الورد - يقول...

برضة أنتو مش هتجيبوها لبر إنت ومرمر
عموماً أنا مش ناوية أعلق على الموضوع دة خالص
بس كل ال أقدر أقولة إن أنا عاوزة أتولى وزارة الثقافة لما حد فيكم يمسك الرئاسة
إشمعنى أنا يعنى هية جت عيا

۩ Nour ۩ يقول...

فعلا عايزة اعرف ليه الوزراء والرؤساء خارج نظام المعاش ؟

منتظرين الجديد منك دايما ..

وعودة محمودة باراده أقوى والدنيا دروس بس المهم نتعلم والدنيا مش هتقف ..

دمت بخير دوماً..

Asmaa mahaba يقول...

الله يرحمك يا اسلام يا اخويا كان طيب كان حونين
انت بتتكلم كدا ازاى عن سونه انا غلطانه انى معاقبتكش ايام ما الرياسه كانت فى ايدى
ادب يوك اخلاق يوك:q

Asmaa mahaba يقول...

انت حاطت اشراف ع التعليقات يا اسلام ماشى يا مواطن يعنى مش حعرف العب براحتى يعنى ولا ايه

Asmaa mahaba يقول...

دخله الشهرى الرسمى 6 الاف جنيه اعلى مرتب فى الدول
والنعمه شغلانه ببلاش ومش مربحه

Asmaa mahaba يقول...

انا موافقه انتخبك مقابل تلاته برطوش :)) وكباتين سحلب
وتمسكنى وزيره الصحه وتخليهم يقولولى يا دكتور
وتمسك بطيخ وزاره الداخليه والخارجيه
وتدينى فيلتين فى سته اكتوبر وعربيه حمار سيدس
وبعد كدا حفكر انتخبك ولالا

Asmaa mahaba يقول...

نسيت اقولك كمان انك لو مارضيتنيش حبقى ضدك وانت عارف لو بقيت ضدك حعمل ايه وانتظر بوستى الجاى باذن الله ححاربك فى لقمه عيشك وابقى شوف

dina يقول...

دا انا ضحكت ضحك لما سمعت موضوع الجزاير دا.....بس على فكرة اللى مودينا فى داهية الناس اللى نيتها وحشة زيك....دا اخلاص و وفاء....حفضل اخدمكم لاخر يوم فى عمرى....مشكلتك انك مش فاهم....اسيادنا الحكام فاهمين اكتر رضى الله عنهم و ارضاهم جميعا يا رب.....اما نادرة ان حد يترشح ادام حاكم عربى و يكسب مش عارفة احفادى ممكن يلحقوها ولا حتبقى نكتة بعد 400 سنة كدا...اللى هو مرة واحد كسب الانتخابات هع هع هع هع

Asmaa mahaba يقول...

يعنى نزلت التعليقات اهى يا سلم ومفيش معاها لا مشاريب ولا رشاوى عشان ننتخبك حيث كدا البوست القادم فعلا ان شاء الله حرب بينى وبينك

زيزو باشا يقول...

إسلام حبيبي
أنت كده هاتخليني أترفد من الشغل أنا مابطلتش ضحك من ساعة ما قريت البوست ده وزمايلي في الشغل مش عارفين أنا بأضحك على إيه

عموما تعليقا على موضوع أنك ممكن تبقى الريس أنا عندي أخبار مش كويسة لأن مؤهلات الريس لاتنطبق عليك
فأولا أنت مادخلتش أي كلية من كليات الظبرات اللي بتخرج الظبرات الأشرار

ثانيا أنت مش فاشل في الدارسة وعندك نية تصلح وتنضف البلد

ثالثا أسمك مش جمال زي عبد الناصرأو أي حد في العيلة أو من ولادك أسمه جمال زي السادات وزي أبو الكهول الجوي حسونة نسر الشاشة

يانهار أسود أنا ماكنتش واخد بالي من الموضوع ده، على كده ممكن ييجي ريس وأمه أو مراته سيئة مصر الأولى هي اللي يكون أسمها جمال

مواطن مصرى نايم يقول...

كوشيا
-----
لا مش حرشح نفسى
انا حبقى رئيس بالتعيين
بعقد يعنى امضى عقد رئاسة تلات سنين مثلا
و بعد كده احترف فالخارج
امسك انجلترا مثلا

مواطن مصرى نايم يقول...

سميرة
----
انا اهوه و الله
معلش مقصر فالزيارة
مكنتش بدخل حتى على بلوجى الا نادرا

كلامك صح جدا بس ده ميمنعش ان لو فى رقابة على الحكم حيبقى الفاسد محاصر

يعنى لو يبقى فى حاجة زى مجلس رقابة على اعمال رئيس الجمهورية حيكون فى قلق من الفساد

هى الحكاية بسيطة بس البلد عاوزة اخصائى ادارة اعمال و اقتصاد و استاذ قانون يعملوا هيكل ادارى للدولة من جديد
حتاخد وقت اه بس حيبقى فى امل فالتغيير

منورانى يا مس

مواطن مصرى نايم يقول...

صدى الصمت
----------
ليه بس هو انا قلت حاجة
هههههههههههههه
بس لما ابقى رئيس ان شاء الله
حضم وزارة الثقافة على وزارة التربيه و التعليم
و تمسكي انتى الوزارة الجديده
جبت لك ورازة التعليم كمان عشان تدى لمريم اجازات براحتك بقى
هههههههههههههههه

مواطن مصرى نايم يقول...

نور
----
المفروض فعلا انهم يخضعوا لسن المعاش
لكن الكوسه مغرقة البلد فالصلصه بتاعتها

نورتينى يا نور و شكرا ليكى عالمتابعة

تحياتى

مواطن مصرى نايم يقول...

سومة
----
يعنى انا اغيب تلات ساعات عن البلوج اجى الاقى احتلال
انا اتكلم عن سونة خالص
انا قلت راجل كبارة يعنى بحترمه اهوه بس الحقيقة غير كده

و بعدين انتى لما كنتى رئيس بطيخ كان مطلع عليكى اشاعات

انتى ناسية و الا نفتح الاوراق القديمة
انا يتقالى ادب يوك و اخلاق يوك

طب ادب سيس خسيس
مش عارف التعليق قلب مسلسل نور كده ليه

المرتب 6 الاف جنية لا يا عم انا مش موافق بقى ابقى رئيس

سومة انتخبينى انتى و انا حكتب لك تنازل عن القهوة

مواطن مصرى نايم يقول...

دينا
----
يا بنتى ركزى فكليتك انا مليش دعوة بالكلام ده
ههههههههههههههههههه
انا نيتى سليمة حتلبسينى تهمة ليه بس

المشكلة بقى ان بعد ال 400 سنة دول
ممكن نرجع زى زمان ملكية
و يخلص عهد الجمهورية

و تبقى اساطير
و مصر يبقى اسمها مملكة مصر (المباركة)

مواطن مصرى نايم يقول...

زيزو باشا
----------
حبيبى و الله و الله واحشنى جدااااا
انا مقصر معاك فالسؤال معلش

اول مرة اخد بالى من موضوع ان كل اللى مسكوا مصر لازم يبقى فى حد عندهم اسمه جمال

هههههههههههههههههههههههه
و الا لو الرئيس يبقى امه اسمها جمال
كده يبقى هى اللى حتمسك الحكم بعده بردو
وراثة بردو

يعنى ححاول اظبط الوضع و ابقى فاشل و اسمى ابنى جمال عشان ابقى رئيس

بس اقتضاء بالرسول عليه الصلاة و السلام
انا مش حطلب انى ابقى رئيس الا لو جه اى حد و قال لى تعالى يا اسلام امسك الرياسة

حدثنا حجاج بن منهال حدثنا جرير بن حازم عن الحسن عن عبد الرحمن بن سمرة قال قال لي النبي صلى الله عليه وسلم يا عبد الرحمن بن سمرة لا تسأل الإمارة فإنك إن أعطيتها عن مسألة وكلت إليها وإن أعطيتها عن غير مسألة أعنت عليها وإذا حلفت على يمين فرأيت غيرها خيرا منها فكفر عن يمينك وأت الذي هو خير

اهم حاجة انى زعلان انى مش فاشل و لا فى عندى جمال
بفكر اغير اسمى بقى

الزباين

الزباين و يا رب ابعد عننا الضرايب