الأحد، 16 أغسطس 2009

نص العمى و لا العمى كله


نص العمى و لا العمى كله
One eye better than Blindness
-----------------------
انتشر اسم ايمن نور اوائل عام 2005 معلن بذلك تواجده فى الساحه السياسية , برع صاحب الاسم فى اداء دور المناضل فى المسرحيه السياسية بداية من الحوادث التى تعرض لها اثناء حملتة الانتخابية
التى اراها مشاهد ذات اخراج فاشل .
و سريعا ما ارتفع الاسم حتى
اعلان نتائج الانتخابات و فوز مبارك و بداية تشكيك نور فالانتخابات .
انطفئ بريق نور بالنسبة لمعظم المعارضين للحكومة و المؤيدون له من خارج الحزب الذى كان يحتل كرسى رئاسته و ذلك بعد الحكم عليه بالسجن خمس سنوات فى قضية تزوير اوراق تخص الحزب .
خرج ايمن نور من محبسه بسبب تردى الحاله الصحيه له , و هو حاليا ممنوع من القيام بنشاط سياسى لمدة خمس سنوات لأنه سُجن فى قضية تمس الشرف.
ـــــــــــــــــــــــــــــــــــــــــــ
كل ما سبق مقدمة اعتقد لابد منها او ليس لها ضرورة كما تشاء.
ـــــــــــــــــــــــــــــــــــــــــــ
ندخل بقى فالموضوع و بلاش كتر كلام و بالذات باللغة العربية
بالنسبة لأيمن نور كنت حاسس من اول لحظة شوفته فيها انه ممثل
ممكن يكون اجاد الدور فالاول و لكن بسرعة ظهرت عيوب الاداء و زاد انتقادى لأيمن نور بعد ظهور بعض المهللتيه
( الهييصه او الزييطه او المطبطباتيه ) حوله
يجدون فيه الفارس المغوار ذو الحصان الاسود , معلنين عن رغبتهم فى ان يتولى هو رئاسة مصر ( اى بطيخ الموضوع بقى ) , جامعين معلومات عنه و سيرة ذاتية لا بأس بها حين تسألهم عنها تجد من يقول لك ( كان متفوق و بيطلع الاول) متخذين مبدأ ( الناجح يرفع ايده ) شعار لرئاسة الجمهورية
, و تجد من يقول لك ( كان بيطلع مظاهرات من اولى ثانوى ) ربما تجد ردى
كذلك ( عندى واحد صاحبى بيمشى فمظاهرات من رابعة ابتدائى ينفع معاكوا ) و تجدهم يقولون مؤسس لحزب الغد
( طيب ما الراجل اللى كان عاوز يلبسنا طرابيش كان رئيس حزب بردو )
مش قادر استوعب ايمن نور يكون رئيس او حتى وزير كما يرغب هو فى احد المناصب .
بقول كده من وقت لأخر و بلاقى هجوم من اعضاء حزب الغد رهيب ربما يصل فالنهاية الى حذفى من قائمة الاصدقاء لديهم عالفيسبوك
متخذين شعار ( اللى يزعل بابا نوتى ) لكل من ينتقد ايمن نور
( يعنى انا نوتى)
يتجاهلون فى ذلك الوقت ان جمال مبارك يُشتم يوميا من شخصى انا اولا قبلهم.
يطالبون بالديموقراطية و لا يطبقون حرف واحد من الكلمة ازاى بقى ائتمن نفسى كمواطن لو مسكوا البلد ( لو اعترضت هيحذفونى بردو) و نعم الحكم.
لا اؤيد ايمن نور و لا جمال مبارك فكلاهما يسعيان للسطله و كل واحد منهم عاوز هو اللى يطفى الشمع و العيد ميلاد يبقى بتاعة .
و لكن اجد نفسى اقول نص العمى و لا العمى كله و لو قارنت بين جمال مبارك و ايمن نور الاقى ان جمال هو( نص العمى ) .
مش دى نهاية الكلام فى بوست عن جمال بردو لازم عشان محدش يقول لى انى ضد ايمن نور ( يابا انت ليه مش عاوز تصدق انك اعمى..اعمى - ممكن جمال يقولها لأبوه بردو ) و خلاص لانى كمان ضد ( نص العمى )أن تعطي ابنك موبايل.. فأنت لطيف وان تعطي ابنك سيارة.. أنت كريم وان تعطي ابنك بلد وشعبا ليلعب بها فأنت مبارك -... سلام مؤقت

الخميس، 13 أغسطس 2009

انا جيت يا بنى ادمييييييييييين .. وحشتكوا انا عارف


اولا كده انا حسيت انى وحشتكوا اوووى
و طبعا ده لأنكوا مش بتقدروا تستغنوا عنى
طبعا و ان غيابى مأثر عليكوا انا عارف كل ده
فحبيت اتنازل و اتكرم و ارجع للتدوين
هههههههههههه

لا طبعا ده تهريج
انتوا اللى وحشتونى
و وحشنى التدوين
و وحشنى مواضيعكوا

و بجد كنت نفسى ارجع بس كان الف حاجة بتخلينى ابعد
بس ان شاء الله مش هبعد تانى
و بإذن الله راجع احسن من الاول

و كمان فرحت جدا لما فاتيما ( روح قلب ماما ) سألت عليا فلقاء المدونين الاخير
و عادل ( البلد دى فيها حكومة ) هو اللى قال لى طبعا
و فى كتير كلمنى على الفيس بردو بشكرهم جداااااااا
و مدونين كتير قالوا ارجع
و فى ناس لو شكرتهم ممكن يزعلوا
فبلاش نقول اسامى بقى
و فى ناس بردو مش مدونين كلمونى
و فى ناس كانوا سابوا التدوين من فترة بس بردو كلمونى عشان ارجع انا
بشكر كل اللى سأل
و كل اللى كلمنى
و كل اللى فكر يسأل
و كل اللى فتح البلوج عشان يطمن
كلكوا يا جماعة

ان شاء الله هكتب بوست بس قلت اقول لكوا وحشتونى الاول


الزباين

الزباين و يا رب ابعد عننا الضرايب