الأحد، 14 يونيو، 2015

كيف تحولت مصر إلى مجرد مقبرة ؟؟


تدوينة كنت كتبتها من 2010 و مرضيتش انزلها لكن بيتهيألى حتى رغم مرور خمس سنين عليها فهى لسه تعتبر جديدة

كيف تحولت مصر إلى مجرد مقبرة ؟؟



مين معندوش رغبة السفر بره مصر ؟

محدش يقدر يقولها بثقه انه معندوش الرغبه دى

و اللى بيقول معندوش بيبقى من جواه عارف انه بيكدب على نفسه

متقولش بقى الشباب المحبط و الكلام الفارغ دا

احنا مش ناقصيين ناس فاضيه تقضيها كلام و شعارات



انت اخرك فالبلد دى تختار طعم شيبسى دا لو حتى فكرت تختار

او ممكن تتابع بورصه السينما و تشوف تامر حسنى ترتيب فيلمه الكام

و البنت اللى بتستنى اغنيه من تمووورة

و الولد اللى مسقط البنطلون شبه عمرو دياب و فاتح القميص زى تمورة



انصحك عشان تعيش فالبلد دى يا تسقط بنطلونك يا تربى شعر صدرك

او تقضيها شيبسى .. اه و بالمناسبه بعد كدا كل معرفتنا بالطماطم هتكون عبارة عن طعمها اللى فالشيبسى اللى بالطماطم .. هنبقى نحكى لعيالنا عليها .. و هنوصف لهم

زى ما والدك او والدتك بتوصف لك المليم و القرش و التعريفه و انهم كانوا بيشتروا كيلو اللحمه ب 35 صاغ مش ب 55 جنيه .



قول لى بقى انك مش نفسك تسافر .. تبقى كداب او اكيد اكيد عندك اتنين كيلو طماطم مخزنهم لحد ما يبقى الكيلو بكام الف دولار و بكدا تعمل ثروة و تعيش فالبلد بكرامه ( كرامة بالصلصه ) .. من كتر الكوسه فيكى يا بلد طماطمك بقى غاليه .



بردو مش عاوز تسافر ؟

طيب و حياتك .. انا وراك وراك لحد ما تعترف انك عاوز تسافر

او اكيد مش عاوز تسافر لو عندك كام مليار زى هشام طلعت مصطفى

و كنت ناوى تقتل ( هيفاء وهبى ) مثلا و فالاخر يتحكم عليك ب 15 سنه

و سنة السجن ب 9 شهور و على ما اتحكم عليك كان فات حوالى تلات سنين قاعدهم فى سجن خاص و بتلعب تنس و فاضل يجيبولك حريم فالزنزانه .. و فالاخر تطلع بتلات ارباع المده يعنى نحسبها كدا

15 * 9 = 135 شهر

135 / 12 = 11.25 سنه

11.25 * 3/4 المدة = 8.43 سنه

8.43 – 3 = 5.43 سنه

ها انت معاك كام مليار و ليك ف هيفاء وهبى ؟



انصحك سافر بقى لو عرفت و عشان تعرف تجاوب على السؤال اللى فأول البوست اللى هو

كيف تحولت مصر إلى مجرد مقبرة ؟؟

ساعتها هتسافر و تقول لما اموت عاوز اتدفن فبلدى .. عرفت بقى انها بقت مجرد مقبرة ...



الزباين

الزباين و يا رب ابعد عننا الضرايب