بوست خفيف لطيف ظريف نضيف خريف ...لا خريف مش تبع العنوان

بوست خفيف كده عالماشى

عشان بس جروب تامر واخد اغلب الوقت

قلت احسن من انى منزلش بوست انزل بوست خفيف

لغاية ما امخمخ فى بوست تمام ان شاء الله

ـــــــــــــــــــــــــــــــــــــــــــــــــــــــــــــــــــــ

فى كام جمله كده مش بعرف ارد عليهم لما حد بيقولهم لى و ساعات برد غلط

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

يعنى لما حد يقولى ف رعاية الله

مكنتش بعرف اقول ايه

لدرجة انى مرة فى نهاية مكالمة تليفونية

اللى كنت بكلمة قالى ف رعاية الله

رديك عليه و قولت

(الله يلعنك)

ـــــــــــــــــــــــــــــــــــــــ

و الا لما حد يقولى شفيتم

هاه ايه رأيكم انتوا؟؟

يعنى انا ايه المطلوب منى ف الوضع ده؟؟

واحد قالك شفيتم

كنت بعمل زى اللمبى فى فيلم اللى باللى بالك

لما كان بيلسم عالناس اللى بيقدموا له نفسهم بس بالانجليزى و هو مش فاهم

لما كان بيرد و يقول

(اوكيه ، باركيه)

و انت عارف بقى يا رب

ـــــــــــــــــــــــــــــــــــــــــ

عادة انا لما برد عالتليفون

بقول :سلام عليكم

كنت الاول بقول ألو

بس طبعا الحاجة عندى فالبيت قالت لى

لازم تقول سلام عليكم

الكلام ده من زمان يعنى مش دلوقتى

مرة بقى كنت لسه مش واخد انى اقول سلام عليكم فالتليفون

و انا رديت عالتليفون و هى جنبى

و ناسى المفروض اقول ايه

و لو قلت ألو يبقى جبت لنفسى التهزيق

هههههههههههههه

روحت قلت

بسم الله الرحمن الرحيم

هههههههههههه

و من الكسوف قفلت السكه ف وش اللى طالب

هههههههههه

ــــــــــــــــــــــــــــــــــ

و الا لما كنت اعزى حد ف ميت

كنت بتلغبط

مش عارف اقول ايه

نسيت كلمة البركة فيك

روحت قلت :الف مبروك

ههههههههههههههه

المشكلة بقى ان اللى انا قلت له الف مبروك

قالى : الله يبارك فيك

هههههههههههههو

ده كان ميت على فكره

ــــــــــــــــــــــــــــــــــ

و الا لما ابارك لحد ف فرح ابنه مثلا او بنته

اقوله : الف مبروك و (عقبالك)

و على كده بيكون

ابنه اللى بيتجوز يعنى هو اكيد متجوز

هههههههههههههههههه

ــــــــــــــــــــــــــــــــ

و الا لما كنت ازور حد مريض ف مستشفى

و اقوله : الف سلامة

يقولى : ربنا يخليك يا اسلام

ما نجليكش ف حاجة وحشة

اقوله : عقبال اولادك ان شاء الله

ههههههههههههههههه

ــــــــــــــــــــــــــــــ

يا جماعة طبعا انا عامل تعديلات عن الحقيقة

يعنى مش لازم اللى قلته ده يبقى حصل و فيه منهم حصل فعلا

كان معكم الواد اللى كان ملغبط الدنيا

ESLAM

مرسى ابن المعلم زناتى اتشهر يا مينز

( دى الصفحة الاولى لجريدة وشوشة عنوان المقال عن الجروب اول عنوان فيها)

(اضغط على الصورة لترها بحجم اكبر)

ــــــــــــــــــــــــــــــــــــــــــــــــــــــــــــــــ

دى صورة المقال اللى اتنشر فى جريدة وشوشة عن الجروب بتاع تامر حسنى

بتاعى انا و الفنان اشرف حمدى

طبعا اسمى اتكتب فى المقال و كمان اسم المدونة بتاعتى

اللى انا عامل عليهم خط احمر فى الصورة فوق

يعنى انا بقيت مشهور يا بنى ادمين

يعنى بعد كده قبل ما تدخلوا البلوج تخبطوا عالباب الاول

او تتصلوا بالسكرتارية تحجزوا زيارة للبلوج

هههههههههههههههه

لا طبعا بهزر

حتى بعد الشهرة مش حتغير معاكوا

النجومية مش حتخلينى اتغر فى نفسى

ههههههههههههههه

يا جماعة اللى عاوزنى امضى له عالتي شيرت او على البلوج بتاعة

يقولى عشان انا معنديش قلم

اعمل حسابى الاول و انزل اشترى واحد

للاشتراك فى الجروب

اضغط هنا

ــــــــــــــــــــــــــــــــــ

كان معكم النجم إسلام (احمد عبدالله) بعد الشهرة

ESLAM

ايه و جى دبور---A & G DABOR

تحديث

ـــــــــــــــ

مها زين

صاحبة مدونة

انها الحياة

نجحت يا بشر

و كان لابد و حتما و من الواجب انى اكتب لها تهنئة

لانها نجحت فى الماجستير يا بنى ادمين

يعنى بقت

دكتورة اسنان

ههههههههههههههه

بهزر طبعا

مبروك يا مها

عقبال الدكتوراه

ايه و جى دبور---A & G DABOR

==================

قالوا فى المثل الشاطرة تغزل برجل حمار

طب لو الشاطرة دى اساسا هى الحمار

طب حد عارف مين الشاطرة و مين الحمار

ـــــــــــــــــــــــــــــــــــــــــــــــــــــــــــــــــــــــــ

بيقولوا ان ليس كل حاكم فيلسوف و لكن كل فيلسوف حاكم

طب هو مين الحاكم و مين الفيلسوف و مين اللى بيقول ده هاتوه اطلع عين جمله

لا ما هو الجمال جمال الروح

(انتوا و ضميركم بقى)

ــــــــــــــــــــــــــــــــــــــــــــــــــــــــــــــــــــــــــــ

سمعت ان اللى بنى مصر كان فى الاصل حلوانى

لو سمحت خلى الحلوانى ده يبعت كيلو بيتى فور لوزارة الاسكان

يمكن تحس على دمها ان اللى بنى مصر

حلوانى

و اللى ماسك مصر

حلوانى

(افهموا اللى تفهموه حلوانى الاولى معناها غير التانية)

ـــــــــــــــــــــــــــــــــــــــــــــــــــــــــــــــــــــــــــــــــ

شفت الريس حميدو بتاع 2008

اللى غرق نورمندى تو

و هرب بره البلد

و الباز افندى طلعه براءه

( انا الصراحة مش فاهم ايه العبارة فى حكاية العبارة نورمندى تو طبعا)

ما هى نورمندى ون غرقت فى الحرب العلمية

نورمندى 95 : نورمندى 98

و كلنا نورمندى

و نسمع (سلام ) غرقنى يا معلم

ـــــــــــــــــــــــــــــــــــــــــــــــــــــــــــــــــــــــــــــ

ماشى فى نور الله ادعى و اقول يا رب

رد عليا واحد جاى من بعيد قال ياخده

(يا ترى قصده على مين)

لا دا واحد صاحبة كان بيقوله

ان واحد صاحبة تانى اتعرض علية موبايل مسروق

و علية نمر الشعب هدية

و بيسألة ياخدة و الا لا

قال

(ياخده)

ـــــــــــــــــــــــــــــــــــــــــــــــــــــــــــــــــــــــــ

واحد عريس جديد

بقاله بيكون نفسة من تلاتين سنة

(ركزوا تلاتين)

يوم الدخلة

واحد صاحبة

قاله

مبارك عليك

قالة ما هو راكب بقاله تلاتين سنة

عقبالك

ـــــــــــــــــــــــــــــــــــــــــــــــــــــــــــــــ

واحد حرامى بيسرق فى ( عز ) الظهر

و هو بينط من بيت لبيت

رشق فى سيخ حديد

راح اتعالج فى مستشفى الدخيلة

و اخد وسام السيخ الوطنى

ــــــــــــــــــــــــــــــــــــــــــــــــــــــــــــــ

اعطنى حريتى اطلق يديا

هو لو عارضت تتكلبش ايديا

يا سلام يا ست .....هـ ابريل

ـــــــــــــــــــــــــــــــــــــــــــــــــــــــــــــــ

تضامنا مع الموافقة على قانون الزاوج الجديد

لقد قررت و بصفة نهائية ان اتنحى عن اى منصب رسمى

و ان اقف فى صفوف الجماهير عشان احلل

(اللى قرء القانون حيفهم)

ـــــــــــــــــــــــــــــــــــــــــــــــــــــــــــــ

بيقولوا مصر امنا صح

احمد مكى قال

قلبى على ولدى انفطر و قلب و لدى عليا

(مازر فكر)

اعرب ما بين الاقواس

مع التشكيل

(لا مش التشكيل الوزارى)

ثم ضع التشكيل الوزارى و مازر فكر فى جملة واحده

ـــــــــــــــــــــــــــــــــــــــــــــــــــــــ

كفاية عليكم كده

يو يو يو

داااااااااااااااام يووووووووو

E-DABOR

ESLAM-DABOR

الدنيا مدرسة و مفيش حد بيتعلم بالسهل بعيدا طبعا عن وزير التعليم

بصوا يا بشر

اولا بشكر كل حبابيى و اخواتى و اهلى و جرانى انا عاوز اخدكوا فى احضانى

(لا مش بتاعة عبد الحليم الاغنية دى : دى بتاعتى و هو اللى سرقها منى )

بما انكم دلوقتى حالا بتقروا البوست ده

اذا يبقى انا رجعت

اه رجعت

الحمد لله

بس اى نعم المواضيع اللى كانت خنقانى الحل فى الاخر طلع مش لصالحى و خسرت

بس كان لازم انهى اى موضوع حتى لو انى اخسر اى حد

و بما انى مصدوم اه و الله مصدوم بس عاتشى عاتشى خالص مالص

لانى عشان الموضوع ده ينتهى صليت صلاة استخارة و طلبت من ربنا ان لو فى صالحى يتم و لم مش فى صالحى ينتهى و ان ربنا يقدرنى انى ارضى عن اى مصير للموضوع

و انتهى بالفشل

معنى كده انه كان فى ضرر ليا

معنى كده انى كنت ماشى فى سكة غلط

معنى كده ان ربنا بعد عنى شر

معنى كده انى افرح ان ربنا بعد عنى الشر ده

معنى كده انى دلوقتى مصدوم من الفرحة عاتشى اه عاتشى خالص

و حهزر و حضحكم ان شاء الله اكتر من الاول

و اللى عنده كلمة يلمها

ايوه انا فايق لكم دلوقتى

دا بوست العودة

بس فى بوست ان شاء الله

ممكن دلوقتى او بكرة حفنن فيه

ان شاء الله يعجبكوا

ـــــــــــــــــــــــــــــــــــ

كان معكم العائد من الخنقة اسلام باشا الفرحان

ضاقت و لما استحكمت حلقاتها : فهى لن تفرج

تحديث

ــــــــــــــ

يومين بإذن الله و ستجدون القرار الاخير

اما بحذف البلوج

او بالرجوع

ضاقت و لما استحكمت حلقاتها

(فهى لن تفرج الا بإذن الله)

بدون سبب محدد

و فجأة

و دون اى سابق انذار

و جدت نفسى فى اسوء حالة نفسية لم امر بها من قبل

رغم التزامى و قربى من الله و الحمد لله

الا اننى لا اجد مخرج لاتنفس منه حيث وصل الاختناق الى اقصى عنقى

ربما توجد بعض الاسباب و لكنى اتجاهلها و ليس اجهلها

لذلك قررت ان ابتعد عن التدوين لفترة لا يعلم مداها الا الله

ربما اعود سريعا جدا و ربما اتأخر فى العودة و ربما لا اعود من جديد

my life is dark black

من بوش لاوباما او ماكين و اللوبى الصهيونى برضوا زفت و طين

تحديث رقم 2

ـــــــــــــــــــــ

الجروب بتاعى انا و الفنان اشرف حمدى رسام الكاريكاتير
عالفيس بوك
"نطالب بحلق شعر صدر تامر حسنى"

مكتوب خبر عنة فى موقع مفتاحى

اضغط هنا

فى موقع مفتاحى

ـــــــــــــــــــــــــــــــــــــــــــــــــــــــــــــــ

تحديث

ـــــــــــــ

الجروب بتاعى انا و الفنان اشرف حمدى رسام الكاريكاتير

عالفيس بوك

"نطالب بحلق شعر صدر تامر حسنى"

كتبت الصحفية : رشا لطفي

مقال عنه فى موقع مصراوى

اضغط هنا لتقرء المقال

من بوش لاوباما او ماكين و اللوبى الصهيونى برضوا زفت و طين

ـــــــــــــــــــــــــــــــــــــــــــ

حد عارف ليه كلينتون اتعملت له فضيحة كبيرة قبل انتهاء فترة حكمة؟؟؟؟

طب حد يعرف ليه هيلارى كلينتون فشلت فى الانتخابات التمهيدية لانتحاب رئيس امريكا؟؟؟؟

طب حد عارف ليه اللى فضل و نجحوا فى الانتخابات التمهيدية هما(اوباما)و (ماكين)؟؟؟؟

(ممكن اجاوب انا)

اولا : قبل الاجابة لازم نفهم كام حاجة

-ايه هو اللوبى الصهيونى : هو جماعة صهيونية اسرائيلية فى امريكا غير شرعية تتخذ اساليب غير شرعية لتحقيق اهداف معينة لصالح اسرائيل و هى لها تأثير كبييير على الحكم داخل امريكا رغم عدم شرعيتها .

كلمة (لوبى) يعنى دهليز يعنى طريق خفى و سرى

ــــــــــــــــــ

=نجاوب بقى=

-----------

السؤال الاول

اتعملت فضيحة لكلينتون مع مونيكا عشان يسيب الحكم

و كان اللى واقفين ورا الموضوع ده اللوبى الصهيونى

لان كلينتون فى اخر ايام حكمة كان قرر ان خلاص موضوع فلسطين حيتحل و كان قرار جاد جدا

اتدخل اللوبى الصهيونى و استطاعوا توريطه فى فضيحة مونيكا

و الموضوع خلص لما كلينتون كبر دماغة عن موضوع فلسطين بسبب الضغط علية من اللوبى

ــــــــــــــــــــــــــــــــــــ

السؤال التانى

سبب فشل هيلارى كلينتون فى الانتخابات التمهيدية

تخوف اسرائيل منها لانها زوجة كلينتون

و عدم دعم اللوبى الصهيونى لها

ــــــــــــــــــــــــــــــــــــ

السؤال التالت

ليه نجح ( اوباما ) و (ماكين) فى الانتخابات التمهيدية

اولا اوباما

اثبت ولاءه لاسرائيل بمجرد ترشيحة و تعهد بجعل القدس عاصمة اسرائيل

تم دعمه من اللوبى الصهيونى

ثانيا ماكين

يا جماعة عارفين ماكين ده لو بقى رئيس امريكا

ممكن تقوم حرب عالمية تالتة

لانه اسء من بوش

و حيكون اسوء و اكثر دموية من اى رئيس امريكى سابق

بيكره العرب بطريقة رهيبة

قريب جداااا من اللوبى الصهيونى و الحكومة الاسرائيلية

من الناس المؤيده للحرب على العراق

يعنى دمار الدمار

و اكيد فرصتة كبيرة برضوا انه يمسك

ـــــــــــــــــــــــــــــــــــــــــــ

ايه رأيكوا بقى؟؟؟

شوفتوا ان اسرائيل هى اللى بتحكم امريكا مش امريكا هى اللى بتحكم اسرائيل

حد من الحكام العرب له كلمه على امريكا ؟؟؟

عارفين ليه لا

عشان هما اصلا مش بيفكروا فى حاجة غير مص دم الشعوب

الريس الوحيد اللى كان له كلمة على اى دولة و كان كله بيخاف منه

الله يرحمة

الرئيس الراحل محمد انور السادات

عاش عظيما و مات شهيدا

بجد الراجل ده انا كان نفسى كنت اموت بداله

لانه لو كان لسه حاكم مصر

كنا بقينا اقوى دولة فى العلم

امريكا و اسرائيل كانوا

بيترعبوا منه

اول مرة اشوف الاخوان بيقولوا ان قتل السادات كان غلطة

خليهم يشربوا

عاجبهم اللى موجود يعنى

ربنا عالظالم

ESLAM

بحبك يا جذمة......حب سافل

بحبك يا جذمة ......حب سافل

مالها بس البت ديه

هى هبلة و الا بتحب الاذية

انتى ياختى انتى و هى

عقلوها البت دية

هى ليه بتتقل عليا

هو يعنى التقل لازم

فكى بوذك ياختى فوقى

و اصحى اه لنفسك و دقى

دا العذاب من بكرة جايلك

اشربى الكاس من عمايلك

جربى برودك يا واطية

اه يا بت ايوه واطية

كل واحد قال دا خاب

حب يوصل للسحاب

حربط النعل اللى ساب

و اللسان الحلو داب

و الحياه اتلقبت هباب

انسى خالص حب زمان

و انسى ايام الحنان

عايزة ايه يالا قولى

و الا اقولك امشى غورى

لا تعالى هنا و قولى لى

فين شرابى البيج يا بت

فين هدايا العيد يا ريرى

و العدية كمان يا بت

و الا اسيح ؟؟ اه دا نت

ممكن احكى حاجات كتير

فاكرة يوم ما طلبتى لمعه

قالتى عاوزة لونها سوده

اشتريتها فحمة كوده

تنكرى اللمعه يا بت

ينطفى نورك يا خاينة

ارجعى لسيدك يا واطية

و الا اقولك اشتريت واحده جديدة

بنى لميع كالحديده

و الرباط راحت عليه

و اهى دى حكايتك يا جذمة

ايوه جذمة اجلاسيه

ايه فى ايه ؟؟؟؟؟؟؟؟

ـــــــــــــــــــــــــــــــــــــــ

الحكاية يا جماعة انى جبت جذمة (شوز عشان خاطر ايبى بتحب تقولها كده) بنى جميلة جدا

مريحانى اكتر من اى جذمة (شوز) تانية عندى فقلت اشتم الجذمة القديمة اللى عندى عشان دى طلعت احسن منها

بس طبعا ضحكت عليكم و انتم بتقروا عصيده الشعر

تعيشوا و تاخدوا غيرها

ــــــــــــــــــــــــــ

ESLAM