يا ريس..كل سنه و انت طيب (الريس متقال) طبعا

عيد سعيد عليكم كلكم و بلاش انا بقى
كل واحد يخلى باله من الكحك بتاعة
و اوعى الغريبه تتفرفت منك دى فيها سمنه و حتبهدل البيت
بسكوت بقى و بيتى فور و سابليه..استغفر الله العظيم
(البتى فور رجس من عمل الفران)
ـــــــــــــــــــــــــــــــــــــ
و الله ذكرياتى فالعيد كتير اوى ححكى لكم منها يجى خماشر تمناشر موقف
ياااااااااااااه..ايام بقى........مش فاكر دلوقتى منهم و لا موقف
لما افتكر بقى..
ـــــــــــــــــــــــــــــــــــــ
لما تبقى مستنى العيديه من حد و ينسى يديك العيديه..بينك و بين نفسك قول زى ما سعد زغلول قال..مفيش فايده
حتلاقى اللى ناسى يديك العيديه بيرد عليك زى مصطفى كامل ما قال..لا يأس مع الحياة و لا (حياة لمن تنادى)..
ـــــــــــــــــــــــــــــــــــــ
احب ارسل سلام مغلف بالسوليفان الاحمر للاخ العقيد معمر القذافى قائد الثورة الليبيه و احب اقوله..(بلاش حشيش فالعيد يا ريس فوق بقى) ..خلى سيف ابنك ياخد فرصته يا كبير و اشترى له باكت بانجو.
ـــــــــــــــــــــــــــــــــــــ
احب ارسل اتنين كيلو و ربع بيتى فور للقائد الاعلى للقوات المسلحه السنغافورية و اقوله ارحمنا يا ريس..مش عارفين ناكل حاجة عارف السبب ؟؟..اكيد محتارين ناكل (باتيه) و الا (كرواسون)..يا ريت الدعم يضم كروت شحن الموبايل يا ريس فئه المائة جنيه.
ـــــــــــــــــــــــــــــــــــــ
و سلام شحت محط خالى من البزر و كمان دايت لسيده سنغافورة الاولى..و احب اقول لها ماما كريمة مختار بتسلم عليكى و بتقولك مشروع تنظيم الاسرة نجح يا ماما و الكثافة السكانيه بتقل و ده عن طريق تنظيم الاسرة طبعا اللى برنامجها ضم (حادثة العبارة – و حادثة الدويقة – و حريق قصر ثقافة بنى سويف – و حريق قطار الصعيد – و عمارة لوران فاسكندرية – و حادثه مطروح – و ما زال البرنامج مستمر )..الشعب بيقل يا ماما.. و الخير كتير فالبلد..(اه يا بلد)
ـــــــــــــــــــــــــــــــــــــ
سلام حاير طاير لحليب قلبى راعى الشباب و الرياضة اللى كان ماسك علم مصر فبطولة افريقيا و كان بيشجع من قلبه د/احمد نظيف..
و احب اقوله هو احنا مش حنشوفك تانى غير فبطوله افريقيا يا كبير..ما تيجى تخرج معانا فالعيد..ندخل سينما فيلم

(خربوها و قعدوا على تلها)

..فكر فالموضوع ده و موبايلات بقى.
ـــــــــــــــــــــــــــــــــــــ
و سلام صامت من غير كلام و احب اسمع سلام فتشنى يا معلم و اقول ل د/يوسف بطرس غالى..افوترك و الا اظبطتك يا باشا..انا داخل السينما فالعيد يا كبير و حقطع تذكرة و التذكرة دى عليها ضرايب دافعها من جيبى يا ريس..و ححلق ان شاء الله و حاخد فاتورة من الحلاق يا باشا..و حجيب كارت شحن فودافون و حخربش الكارت و ححتفظ بيه يا ريس عشان احطه فالاقرار الضريبى..انت تؤمر.
ـــــــــــــــــــــــــــــــــــــــ
و عاوزين نضرب واحد و عشرين طلقه او طلقه بالتلاته..للوزيرة عائشة عبد الهادى و احب اقول لها بما انها مسئوله عن القوى العاملة و الهجرة..يا ريت تشوفى ليكى عقد عمل فأى دوله عربيه و ربنا يوفقك هناك ان شاء الله..و شباب مصر كلهم بيسلموا عليكى و بيقولوا لك متقطعيش الجوابات..
ـــــــــــــــــــــــــــــــــــــــ
.....يتبع

ESLAM

اللى خطف السياح من مصر-- صااايع..صاايع..صاااايع

تأثرا بالافلام العربى

(جواز عتريس من فؤاده - باااطل..بااطل..بااااطل)

اللى خطف السياح من مصر- صااايع..صاايع..صاااايع

******************

ايه رأيك فموضوع اختطاف السياح ؟؟

سؤال يجيب عليه كل من :

ـــــــــــــــــــــــــــــــ

القرموطى : اشوفها والعه..اشوفها والعه عشان عم بوش يعرف ان احنا مش بنهزر..مش بنهزر اه احنا بناخد على قفانا بس بمزاجنا و اسألوا مرعى بتاع الكلامه

ـــــــــــــــــــــــــــــــ

اللمبى : ايه فى ايه يا بنى ادمين..هو فى حد اخ صايع غريب دخل فقلب المكان و بيتبلطج فمنطقتى ماشى يا منطقة

ـــــــــــــــــــــــــــــــ

اتش دبور : يوو يوو يووو دااااام يو..فى ايه يا ناس يا لوكل يا شعبيين خطفتوا ليه الاجانب ولاد الناس الكويسين..خور ياض منك له

ـــــــــــــــــــــــــــــــ

صدام : حتى يعرف العلوج الامريكان ان العراق سيظل حرا..و ان العراقيين مسيطرين عالموقف

ـــــــــــــــــــــــــــــــ

بوش : هذا الاختطاف له علاقة باحداث الحادى عشر من سبتمبر و هذا يدل على وجود اسلحه نوويه بمصر و سيتم ارسال البرادعى عشان يقول ان مصر فيها نووى

ــــــــــــــــــــــــــــــــ

اسامة بن لادن : لن تنعم امريكا و انا فاضى و مفيش حاجة ورايا غير انى اضرب امريكا على قفاها

ــــــــــــــــــــــــــــــــ

ياسر عرفات : (رافعا يده بعلامة النصر) انى اسمع مأذن القدس فى اذنى..قريبا سنسترد ارضنا..و اطالب الخاطفين بتحرير الاسرى مقابل استرداد كافة الاراضى المحتله

ــــــــــــــــــــــــــــــــ

حبيب العدلى : احنا مسيطرين عالموقف و حنعاقب المقصرين من رجال الامن العقاب حيكون عبارة عن تعذيب احد المواطنين امام اعينهم و حنحرمهم من انهم هما اللى يعذبوه

ــــــــــــــــــــــــــــــــ

د/احمد نظيف : معدل البطالة سبب رئيسى فتلك العمليات و انا احب اقول لكم ان معدل البطالة فى تناقص مستمر و معدل النمو بيزيد بنسبة سبعه من عشرة فالميه و ده حيساعد بشكل كبير فاطلاق صراح المختطفين

ـــــــــــــــــــــــــــــــــ

طلعت السادات : (متحدثا بصوت مرتفع) الحكومة اهتمت دلوقتى بالسياح و سايبه الدويقة و الصخور اللى تحتها مصريين بالالاف و البلد كلها مهتمه بالسياح اللى اتخطفوا..و على فكرة احمد عز له علاقة بخطف السياح بقه

ـــــــــــــــــــــــــــــــــ

تامر حسنى : (يرد بالنفى للاشاعة المنتشرة بأن السياح تايهين داخل شعر صدره) انا بعلن انى على استعداد تام لتفتيش صدرى و ممكن اساعد فالبحث عنهم بالعربيه الهامر بتاعتى و لما نلاقى السياح ممكن اغنى لهم كل مرة بشوفك فيها ببقى نفسى ااآآآآ

ـــــــــــــــــــــــــــــــــ

مهند : انا واد موز و البنات بتحبنى و انا بصراحة مش بحب نور لو فى مع السياح بنات انا ممكن اتجوزهم و لو نور زعلت ابقى اصالحها و هى ترفض زى ما بتعمل معايا على طول

ـــــــــــــــــــــــــــــــــ

نور : (متحدثة بالصوت المدبلج )لا اريد لعل كيف جدى يرضى عن هذا لابد اذا ربما انه كان له علاقه بها و لن استطيع لانه يجب و لكى فذلك الوقت تماما

ـــــــــــــــــــــــــــــــــ

كفاية الشخصيات دى بقى نبقى نعمل شخصيات تانية فموقف تانى ان شاء الله

ESLAM

نظرية اللى شبع...تلازمها نظرية دارى على اكل ابوك

نظرية اللى شبع...تلازمها نظرية دارى على اكل ابوك

ـــــــــــــــــــــــــــــــــــــــــــــــــــــ

نظرية اللى شبع

ـــــــــــــــ

فى الفترات الاخيرة تصاعدت اصوات مؤيده لتولى جمال مبارك كرسى الرئاسة بعد ابوه

و كانت لهذة الاصوات مبررات لذلك

و من الملحوظ ان هذة المبررات فى شكلها الخارجى و مظهرها انها صحيحة

و هى : ان عهد جمال مبارك سيكون افضل بكثير مما سبق و سيكون افضل بكثير عن تولى شخص اخر الرئاسة

و ذلك لان جمال مبارك خلاص (شبع) فى عهد والده

و لن يجد متسع فى معدته لاكل المزيد من قوط الشعب

و لذلك سيكون عهد رخاء و تنمية و فخفخينا و حنعوم فالرز بلبن و حنستحمى كلنا بالشامبو

و حيبقى فى دعم اضافى على الانترنت

و سيتم منح كل مدون موقع ملاكى ليدون فيه و يكتب عن مدى الرقى و الفخفخه اللى مصر وصلت لها

و اشياء من هذا الهزل و الكلمات الرنانه التى تطرب بها اذان الشخص الغير واعى لما يحدث ببلده

اى الشخص النائم
خلاصة النظريه : ان جمال شبع خلاص لو مسك الحكم مش حياكل تانى

ـــــــــــــــــــــــــــــــــــــــ

نظرية دارى على اكل ابوك

ــــــــــــــــــــــــــ

و فى ظل هذة النظرية احب ان اوضح شئ بسيط

و ذلك بنظرية اخرى يجب ان تلازم نظرية اللى شبع

و هذة النظرية تتمثل فى

اذا مسك جمال مبارك الحكم لن يجعل من حال البلد افضل مما هى عليه بل من الممكن ان يتدهور الحال اكثر و اكثر

و ذلك لانه اذا حاول ان يجعل البلد افضل ذلك سيوضح للعالم كله

ان من كان قبله كان رجل اكول

و يتغذى على قوط المواطن المطحون
فلابد لجمال مبارك ان يدارى على هذا الشخص الذى ظل فترة كبيرة يتغذى على اموالنا

وذلك لانه والده و لن يسمح لشخص ان يتفوه بكلمة واحدة تعيب فيه
خلاصة النظرية : ان جمال مبارك لازم لو مسك الحكم ياكل و يمص دمنا برضوا عشان يدارى على ابوه

و الا ايه رأيكم انتم ؟؟؟
ــــــــــــــــــــــــــــــــــــــ

و ممكن حد يقول لى

لو جمال مسك

الشباب حيشتغلوا ؟ الشباب حيتجوزا ؟ الشباب حيلاقوا ياكلوا ؟

انا بسأل عن الشباب بس عشان جمال مؤسس جمعية جيل المستقبل

اللى هما الشباب

اللى هما احنا

اللى هما مش عارفين يتجوزا

اللى هما مش حيعرفوا يشتغلوا

اللى هما عاوزين يهاجروا

اللى هما عماد المستقبل و امل لبلدنا المنكوب

اسأل الله ان يرحمنا جميعا

و ان نتحرر من زل الرق و الاستعباد

و ان يأتى الوقت الذى يستطيع كل مواطن مصرى

ان يقول لا

و يكون هو لوحة التحكم و اطار القيادة فى هذة البلد

و حسبنا الله و نعم الوكيل

التوقيع

(شاب عاوز يهاجر)

او

(شاب منكوب)

او

(شاب مصرى)

Eslam

appy مش appy يا جدعان خلو بالكم من الموضوع ده

تحديث هااااااام

ـــــــــــــــــــــــ

يا جماعة الحكاية كمان اتكررت

مش مع ابى بس

لا كمان

مع

نواره نجم

(جبة التهييس الشعبية)

عامل بروفايل بنفس الاسم

و كمان مع قطة الصحراء

عامل بروفايل بنفس الاسم

على فكرة الهدف كده مش المدون صاحب الاسم بس

لا كده عاوزين المدونين كلهم يقعوا مع بعض

و يقطعوا تجمعنا كإيد واحده

خلوا بالكم

بجد لازم نقفقدام الموضوع ده

و كل واحد لو لقى تعليق وحش عنده

يتأكد من البروفايل و صاحب الاسم الاول

فى خبؤ كبير

و ممكن نقول عليه كمان

بطيخة

اه دا افضل وصف له

عامل بروفايل باسم

appy

و بيدخل يشتم

خلو بالكم اتأكدوا الاول انه مش ابى قبل الرد

ابى عندها 3 مدونات

و البروفايل بتاعها من 2007

و عدد مرات مشاهدة بروفايل ابى

حوالى 15000

اما الخبؤ

معندوش و لا مدونة

و بروفايله 2008

و عدد مرات المشاعدة

حوالى 30

يعنى خبؤ رسمى

و اكيد حتلاقوا الختم على قفاه

او ممكن يكون عامل تمويه و غير مكان الختم

فمش لازم تدوروا على الختم

لاحسن ممكن الريحه تكون وحشة

و انا صايم مش عاوز اقول اكتر من كده

ـــــــــــــــــــــــــــــــــــــــــــــــــــــــــــــــــــــــ

ده بوست من عند

appy

تحديث:- يا جماعه البيه نقل الكلام والصوره زي ما توقعت عموما فيه فروق تانيه مش هيعرف يعملها يعنى هتلاقوا البروفيل بتاعى من ديسمبر 2007 وده مش هيعرف يعمله هو البروفيل عنده من غير مدونات انا عندي تلاته بيكيا وابى بلانيت وفرنسا والرايق والضاحكون
يا جماعه فيه واحده ولا واحده حقيرة مش متربيه

عاملين اكونت باسمى

الاول اسمه appysaid

وده على موقعtypekey

والتانى معمول باسم appy

بس على جوجل وداخل يقول كلام مش كويس عند كل الناس هو من غير صورة وحتى لو سرق الصورة وحطها ارجوكم قبل الرد على الكلام ابقى اضغطوا على الاسم شوفوا هيجبكم على المدونة بتاعتى لو كده يبقى انا لو وداكم على بروفايل او اكونت بس مقفول يبقى مش انا وهو ده اللى بقول لكم عليه ارجوكم خلوا بالكوا وانا ولا هعبره بس مش عاوزة حد يزعل منى وهسيبه هو وغيره يهرى وياكل فى نفسه لما يزهق وانا مش هعمل ليه اى اعتبار بس اللى يرد عنده يبقى برضه يمسح تعليقه وميردش عليه الله

يخرب بيت النت ابو بلاش اللى لم شويه حشرات ضاله علينا وحسبى الله ونعم الوكيل فى الحاقدين واللى جواهم غلو

بعتذر لخيخه وسووو وانا جعان علشان هو راح شتم وقل ادبه عندهم

ــــــــــــــــــــــــــــــــــــــــــــــــــــــــــــــ

و كان ذلك بوست من عند ابى هانم

===========

و هكذا نكشف لكم عن احدث ادوات الخبؤات لمحاوله تفريق الجماعات

و ابوهم السقا مات

Eslam

تاج عااااااااااا : من اعمالكم سلط عليكم

التاج ده جالى من

شفقة و إحسان

و سومة العاقله

(1)

بدات تدون من امتى ؟؟؟ ودخلت العالم ده ازاى؟؟؟

ــــــــــــــــــــــــــــــــــ

بدأت التدوين من

2/10/2007

دخلت ازاى كنت قلتها فى بوست قبل كده

عرفت يعنى ايه مدونة منهم

******************

(2)

ايه كان انطباعك فى البداية؟؟؟

ــــــــــــــــــــــــــــــــــ

كنت واخدها لعب و هزار و تفاهه

بس ظبطت نفسى

و قلت لا بجد لازم اعمل حاجة بجد

******************

(3)

مين اكتر واحد بتهتم بتعليقه على بوستك الجديد؟؟

ـــــــــــــــــــــــــــــــــ

فى حد مهم جدا فحياتى عموما

بستنى تعليقه

مش حينفع اقول مين

بس فى بقى ناس كمان بستنى تعليقها بجد

سمسم

ابى

شفقة و احسان

يوميات نائمة فالارياف

سميرة

د/اشرف حمدى

بطوط حبوب

كوشيا

احمد -ردشة عربى

رصيف نمرة خمسة

الصباغ

نورة الخشن

سومة العاقلة

الفنان ياسر حسين

عاليا حليم

سارة على

ندا منير

مها زين

اسامة عبدالله - الدفاع

ايمن بدر

مايكل

اسلام- انا جعان

محمود- رئيس جمهورية نفسى

نهر الحب

دينا

مدحت محمد

مهيج الجماهير

سالى محمد

طهقانة

زوزو

زيزو باشا- معندوش مدونة

سالى- حاجات جوايا

احمد غنيم

فاتيما

مصطفى ريان

اهو دا عيبه

حنين

نيرة احمد-معندهاش مدونة

ناجى العلى

انجى-ستيل بيوتى

وينكى

ايمى

كيكى

رئيسة حزب الاحلام

الشنكوتى الكبير

سوووووو

رودى-بنوتة مصرية

نونا

ميس سوسا

موناليزا

كاميليا

الفارس الملثم

وائل

خمسة فضفضه

انجى

بطوط حبوب

(و الله فى ناس كتييييييير و انا مش عارف اكتب مين و الا مين )

(لو فى حد مكتبتوش يعرف انه سهو لانى عاوز اكتب الكل )

****************

(4)

ايه اهم حاجة اتعلمتها من عالم التدوين؟؟

ــــــــــــــــــــــــــــــــــــــ

انى اكون نفسى ما اكنش بقلد حد

يعنى يبقى ليا طريقة غير اى حد

و ان معرفه الناس كنوز

*****************

(5)

ايه اكتر حاجة كرهتها؟؟

ــــــــــــــــــــــ

الاستظراف

و الحقد

فى ناس بتبقى واخدة التدوين استظراف

و تجيب فسيرة المدونين الناجحين وحش

و ده بيبقى حقد مش اكتر

****************

(6)

حاسس ان التدوين له تاثير؟؟

ــــــــــــــــــــــــ

مش حاسس انا متأكد

بدليل تعليق رئيس الوزراء عن احد المدونين

يعنى احنا شدينا انتباه الحكومة

****************

(7)

تهدى التاج لمين؟؟

ــــــــــــــــــــ

انا بهدى التاج ده لكل اللى كتبت اساميهم فوق

*****************

رابطة المدونات المصرية و اصدارات المدونين الادبية

دا البانر بتاع الجروب

اه بتقولوا جروب ايه ؟؟

اقول لكم

دا جروب عالفيس بوك اسمة زى عنوان البوست

رابطة المدونات المصرية و اصدارات المدونين الادبية

فكرتة جديدة و حتساعد كل المدونين

حتساعد فإية؟؟؟

اقول لكم

اولا

حيكون فالجروب دليل للمدونات المصرية

يعنى كل واحد عاوز يضيف مدونتة يدخل يضيفها

او يكتب لى الرابط و اسم المدونة و الاسم التدوينى بتاع صاحب المدونة فالتعليقات هنا.

ثانيا

اى مدون حيكون عنده كتاب نازل او اى مطبوعة نازلة

حنعمل له الدعاية على الجروب و على الفيس بوك عموما

و ده حيساعد بشكل كبير بمعرفة المدونين الاخرين لموعد صدور و اماكن توزيع الكتاب

و كل الدعاية و اى حاجة بعد كده زى تغطية اى حفلة للكتاب او اى تجمع مدونين بخصوص الكتاب

حيكون بدون مقابل طبعا لاننا كلنا لازم نبقى ايد واحده.

ثالثا

حيكون ان شاء الله فى مسابقة اسبوعية بين ثلاث مدونات سيتم اخيارهم من دليل المدونات فالجروب

و المسابقة عبارة عن تصويت من الاعضاء لاختيار مدونة من الثلاث و مناقشة اسلوب الكتابة بها و المواضيع التى تتناولها

و طبعا ده حيساعد بشكل كبيييير فى تنشيط المدونة لان اللى مش حيكون عارفها حيحب يعرفها و كمان حيحب يشوف المدونتين التانين اللى فالسباق

يعنى بمعنى اصح هى مش مسابقة اوى اكتر من كونها دعاية للمدونة

و ده طبعا حيكون بمشاركتكم فيها

و ان شاء الله تساعد المدونين فعلا

يا رب تكون الفكرة عجبتكم

للاشتراك فالجروب

اضغط هنا

دوووم داا دوووووم دووووم تك

دوووم داا دوووووم دووووم تك

اصحى يا نايم وحد الدايم رمضان كريم

دوووم داا دوووووم دووووم تك

ـــــــــــــــــــــــــــــــــــــــــــــــــــــ

　.•*´¨`*•.¸¸.•*´¨`*•.¸¸.•*´¨`*•.¸¸.•*´¨`*•.　

*...*...*...*...*...*...*...*...*...*...*...*

كل عام و انتم بخير بمناسبه شهر رمضان الكريم

*...*...*...*...*...*...*...*...*...*...*...* 　

¸.•*´¨`*•.¸¸.•*´¨`*•.¸¸.•*´¨`*•.¸¸.•*´¨`*•

ــــــــــــــــــــــــــــــــــــــــــــــــــ

ادخلوا عالجروب الدينى ده عالفيس بوك

حيعجبكوا

ده هو الشغل كله بقى فرمضان ان شاء الله

حتنورونا هناك

اضغط هنا للاشتراك فالجروب