الأربعاء، 9 أبريل، 2008

برنامج حوار مع الكفار



حوار بين الاعلامى محمود سعد
و مع فخامة سعادة عظامة تكانة رزالة
احد رؤساء وزارة احد الدول فى كوكب ما فى المجموعة الشمسية
ـــــــــــــــــــــــــــــــــــــــــــــــــــــــــــــــــــــــــــــــــــــــ
محمود : شرفتنا زيارتك يا

الضيف : اكيد طبعا
محمود : ماشى يا عم
طب ممكن ابدأ الاسئلة
الضيف : اتزفت
محمود : ايه رأيك فى ارتفاع الاسعار ؟
الضيف :ارتفاع اسعار ايه يا بابا

محمود : نعم يا خويا
الضيف : احم احم.......قصدى يعنى حدد شئ معين.
محمود : ايوه كده اتعدل معايا
نقول مثلا سعر الزيت
الضيف : لا لا خلاص المشكلة دى اتحلت
محمود : اتحلت
الضيف : ايوه طبعا انت متعرفناش و الا ايه
محمود : الخيبة انى عارفكم واحد واحد
ازاى حليتوا المشكلة يا فقيق ؟
الضيف : مش زجاجة كيلوالزيت ب 10 جنية ؟
محمود : ايوه
الضيف : احنا حنخلى النص كيلو ب 5 جنية
يعنى السعر انخفض للنص حنعمل ايه اكتر من كده يعنى

محمود : و حياة ماما

خلاص بلاش الاسعار عشان انا متجننش منك
ايه رأيك فى حال الفلاحين اللى عايشين من غير نور و ميه ؟
الضيف : سبحان الله بتسأل على اللى احنا كنا بنفكر فية

محمود : طيب انجز و حياة والدك
الضيف : احنا لاقينا حل للمشكلة دى خلاص

محمود : بتتكلم جد
الضيف : طبعا يا حوده جد الجد
محمود : طيب حتعملوا ايه ؟
الضيف : من اول السنة الجاية حنلغى الفلاحين خالص
محمود : لا انا كده ممكن اقل ادبى عليك
الضيف : لا عادى خالص براحتك احنا بلد ديموقراطى
بس لما تخلص الحلقة
محمود : لا يا باشا انا بهزر
نياهاهاهاهاهاهاها
طيب كنا سمعنا عن تعميير سينا عشان نحميها من اسرائيل ؟
الضيف : اه فعلا فعلا دا كلام مظبوط
احنا خلاص بعنا نص سينا لمستثمر اسرائيلى عشان يعمرها و بكده يكونوا ضربونا على قفانا بس بمزاجنا اه
محمود : يا مصبر الوحش على الجحش

طيب و الالغام اللى موجودة فى اراضى الساحل الشمالى و العالمين
الضيف : لا خلاص دى اعتبرها اتحلت
محمود : ازاى ؟؟؟
الضيف : حنلم الصعايدة اللى فى البلد كل
هم و حنخلوهم يقعدوا يقزقزوا الالغام دى لحد ما يخلصوا
محمود : لحد ما الالغام تخلص يعنى ؟؟؟
الضيف : لا طبعا يا غبى الصعايدة اللى يخلصوا
محمود : يا ابن ال........ناس الكويسة
طيب و البطالة
الضيف : حنزود عدد القطارات عشان الشباب تلحق تتشعبط فيها
او يمكن تدوس عليهم
محمود : يا رب انت واهلك

طيب انا كنت شايف فى نشرة اقتصادية
ان معدل الاقتصاد المصرى فى هبوط
الضيف : شفت فين الكلام ده
محمود : فى قناة الجزيرة
الضيف : انت واخد وصلة الدش من عند مين ؟؟
محمود : حمو بلبل
الضيف : لا خدها من عند محمد بحرية....... الجزيرة مش بتيجى عنده خالص
محمود : يخرب بيت دم امــ..........ـــال فهمى
طيب ممكن بقى اسأل اخر سؤال ؟
الضيف : و دى كمان لاقينا لها حل حنلغى المذيعين من هنا ورايح
ــــــــــــــــــــــــــــــــــــــــــــــــــــــــــــــــــــــــــــــــــــــ
هذا الحوار فى احد قنوات احدى الدول فى كوكب ما فى المجموعة الشمسية
تالت كوكب على ايدك اليمين وانت داخل من ناحية الشمس
la3lahakhier ملحوظة : ذكرتنى الاخت
بإشرب العصير و هى اشهر جملة للاعلامى محمود سعد
و نظرا لانه يجلس مع رئيس الوزراء تم التأخر فى استيراد العصير من الخارج
و ذلك بعد رفض الضيف شرب اى شئ من انتاج البلد
و ذلك بعد ان ادعى ان كل منتجاتنا الزراعية مسرطنة
و هذا كذب و افتراء طبعا
هى مش كلها اوى يعنى
و السلام ختام

الزباين

الزباين و يا رب ابعد عننا الضرايب