الخميس، 27 نوفمبر 2008

بيع يا عواد...عواد باع ارضة

طبعا كلنا سمعنا عن موضوع بيع المال العام و تحويله لأسهم للمضاربة فالبورصة
يعنى نصيبك فالبلد حيبقى عبارة عن سهم
تعليقا عالموضوع ده
ـــــــــــــــــــــــــــــــــــــــ
يعنى انا مثلا نصيبى هيبقى كام سهم؟؟؟
حيبقى سهم واحد مثلا
خلاص حكمل علية و اشترى جذمة
ـــــــــــــــــــــــــــــــــــــــ
طيب انا عاوز نصيبى فالنيل بقى
حيبقى كام جردل ؟؟؟
او كام جركن
ـــــــــــــــــــــــــــــــــــــــ
و الا النيل حيتخصخص ؟؟؟
بعد كده النيل ممكن يتهرب فجراكن بره البلد و يتحط فبنوك سويسرا
ـــــــــــــــــــــــــــــــــــــــ
و لما ناخد نصيبنا من مية النيل
لما نعوز نشرب ..نشرب منين؟؟؟
اكيد اللى مش عاجبة حيشرب من البحر
ــــــــــــــــــــــــــــــــــــــــ
و الا لو واحد معندوش حاجة ياخد فيها نصيبة من النيل
يا ترى حياخد فييييييييييين ؟؟؟
اكيد على قفاه و بلاش الضمير السئ
ـــــــــــــــــــــــــــــــــــــــ
و الا لو نصيبك من النيل طلع فيه بلهارسيا..حتعمل بيها ايه؟؟؟
ربيها و ابقى تاجر بلهارسيا كبيييير
ــــــــــــــــــــــــــــــــــــــــ
تخيلوا ممكن الحبشة تعرف بموضوع خصخصة النيل ده
تقطع علينا المية
و تبيع النيل من بره بره
بس عارفين مين اللى حيشترى ؟؟؟؟
اكيد تاجر مصرى من الكبار
و ممكن يكون عز كمان
و ساعتها يبقى
حديد عز
و نيل عز
ـــــــــــــــــــــــــــــــــــــــــ
لما النيل يخلص و الارض اللى النيل ماشى عليها تبقى ارض عادية
مين اللى حياخدها ؟؟؟؟
اكيد هشام طلعت مصطفى
زى ما اخد ارض (مدينتى) مجانا من غير ما يدفع و لا مليم
حياخد ارض النيل مجانا من غير ما يدفع و لا مليم
بس المدينة ساعتها حيبقى اسمها
(نيلتى)
او
(جريمتى)
و إلى وعد بلقاء اخر
ــــــــــــــــــــــــــــــــــــــــــ
حل البلد دى ان لما يغور البتاع اللى ماسك
اللى يمسك بعده
لازم لازم لازم يأمم البلد من جديد
لأن ده حيخلى الدول اللى رعاياها اصحاب الحاجات اللى اتأممت
تحجز على فلوس الحرامية الكبار (البشوات حاليا) بره
يعنى حيحجزوا على فلوسهم اللى فسويسرا و اللى عندهم و كدا بقى
و نبقى استردينا جزء من حقنا
و ربنا عالظالم
ESLAM

33 قول و لا يهمك:

محمد حمدي يقول...

بجد انا ضحكت جدا على البوست ده . ما شاء الله دمك خفيف جدا .. مع ان الموضوع فى الاصل يغم بس انت عرفت تقول اسئله واجابات ساخره جدا .. خصوصا طلعت مصطفى

تحياتى

مواطن مصرى نايم يقول...

محمد حمدى
========
يا ريس منورنى بأول زيارة ليك يا كبير
الحمد لله ان البوست عجبك
و انت برضوا مبدع فكل بوستاتك و الله
بس برضوا شر البليه ما يضحك

تحياتى ليك

نيرة و منةالله يقول...

يالهوى يا اسلام
هما خلاص بيبعوا
انا عايزة حقى
انت هتاخد من انهى حتة
حسبنا الله ونعم الوكيل وربنا على الظالم
كام دولة ......... بتاعها اتغير واتشال وانتخب واحد غيرة واحنا بردو ال............... بتاعنا قاعد
اوف
انا زعلانة
لازم الحال يتغير بقة
كدة مينفعش خالص
سلام يا اسلام
نيرة

نيرة و منةالله يقول...

عارف يمكن بنقول شعارات
بس احنا بجد تنصار القضية ومش غيرنا
الاغنية معبرة عن الموضوع جدا
نيرة

همس الاحباب يقول...

ههههه
هههه
جامد يا باشا
بس تصدق انها فكرة حلوة خصخصت النيل
طب اسيبك انا والحق
اجهز الجراكن واستنى نصيبى
ده لو اصلا فضلت مياه فى النيل
وحسبنا الله ونعم الوكيل

Unknown يقول...

اممممممممممم والله يا اسلام يا اخويا انا مش عايزة اشترى ايتها سهم فى ايتها شركة ولا حتى عايزة نصيبى فى النيل انا خلاص بقى كدة قرفت وتعبت واتغميت من كل الجزم اللى عمالين ناخدها على دماغنا دى...اول مرة اقرا حاجة عندك وعينى متدمعش من كتر الضحك...حبة اكتئاب بقى معلش وياريت واحد قهوة سادة ومن غير بن كمان

marmar يقول...

يالهوووووي هما كمان هيخصخصوا النيل طيب والنبي فضل ايه في مصر متبعش غير خفرع ومنقرع بصوا يا جماعه اللي عندوا حاجة غاليه عليه يتبت عليها ويمسك فيها بأيده وبسنانه يعني الي عنده اي بود 32 جيجا ولا لابتوب 2 جيجا ولا انشالله فردة جزمه يروح يحطهم في بنوك سويسرا محدش عارف الواحد ينام ويصحى ميلاقهمش ولا حاجة ...
الموضوع بقى اوفر اوي ولله هرجع واقول المشكله مش في مبارك ولا عز ولا طلعت المشكله فينا احنا .. كلنا عمالين نتفرج وحاطين ايدينا على خدنا وبنقول هتتحل ان شاء الله ده الي بيقول كده بيكون عنده امل كبير جدا اما بقى اللي امله راح من الدنيا دي بيقول يا سلاااااااااام وانا مالي هو انا لو اتكلمت هغير من نظام مصر ولا لو فتحت بؤي مش هيخصخصوا النيل يعني ااااه لو كل واحد فينا اتكلم وادا للحكومه صوته هتتغير وهتبقى مية فل وعشره بس لازم نتكلم مش نحط ايدنا على خدنا ونعيط ونقول ياعيني عليكي يا مصر ولا يوم من ايامك يا مصر محدش عارف يمكن ننام ونصحى ونلاقي اسمها بقى مصريكا ..ربنا يستر
اسلام انت مبدع بجد واسلوبك وكلامك وطريقتك مبدع يابني ولله طالعلي يعني :p

marmar يقول...

انا صحيح عشت بعيده عن بلدي واتربيت وولدت في الامارات ومصر مش بشوفها غير تلات شهور الصيف ولما بكون سعيده الحظ بيبقى تلات شهور وشهر نص السنة يعني لو عديتوا عمري كله قضيت في مصر مش هيزيد عن اربع سنين خمس سنين ولا حاجة بس لو فتحتوا قلبي هتلاقوا كل نبضة بتقول بحبك يا مصر ومستعده اعمل اي حاجة عشان خاطر مصر يمكن لان والدي طيار حربي وربانا تربيه ميري نوعا ما فطلعت بحب مصر اوي كده ولا يمكن عشان بحب سيتي ستار ودريم بارك مثلا :P "هنهرج ولا ايه" يعني اجازتي في مصر بقضيها في ملاجأ ايتام ودار عجزا شعور جامد جدا انك تزرع في انسان البسمه على شفايفه وفي قلبه ومصر اكيد زي ما غاليه عليا غاليه عليكم كلكم بس انا بحبها وبرهان عن اي حد ........... مين يرااااهني
منصحكوش تدخلوا رهان معايا في حب مصر عشان هتخسروااااا

adel يقول...

هههه جامد يا اسلام بس انت مسمعتش عن انهم عاوزين يعملوا كده في قناة السويس
ههههههه

انا عن نفسي هاخد حقي من النيل في قزايز بيبسي :):)
و احتمال اقدم مشروع نخصص الهوا و هابهدلكم :):):)

عادل
http://elbald-dy.blogspot.com/

د. إيمان مكاوي يقول...

فرقعة الإعلام المصري ومحاولة إلصاق التهم بأناس ابرياء لتضخيم الامور في قضية الطبيبين المصريين في السعوديه....
وما علاقتهم بمستشفى السلام بجده ؟
تدوينه جديده في يوميات أم البنين

شفـقــة و إحســــان يقول...

انتى احلى حاجة فى كتاباتك يا اسلام انها بتتكلم عن واقعنا المرير باسلوب ساخر وطريف
والمشكلة اننا بنتوه وبنتعايش مع الوضع علشان مفيش فى ايدينا غير كده
بس سؤال رفيع ...هو عواد باع ارضه ولا رهنها بس؟؟

mohamed ghalia يقول...

هههههههههههههههه
ايه يا إسلام الكلام الجامد ده
خد بالك من نفسك
كنت ناوى تختفى عشان تذاكر شكلك هتختفى خاااااالص ههههههه
تحياتى على الموضوع الرائع
دمت بكل الود

آه وكفى يقول...

هههههههههههههههه

بص بئى انا عندي اقتراح كويس
احنا ناخد نصيب على نصيبك ونشتري توك توك صغير كده انا اشتغل عليه وردية الصبح وانت وردية بعد الضهر .. ليه بئى قولي ليه يانور
ليه يانور؟!
ايوااااا كده أحبك وانت مفتح ومخمخ ومصحصح
عشان انا لازم ارجع البيت بدري انت ولد تصيع براحتك كمان ده توك توك يعني ماما مش هينفع تشدلك فيشة التوك توك متخفش
وبعدين حلو التوك توك لأننا لو عوزنا نهاجر نخدو على كتفنا ونهرب بيه مهو مش مترخص
هتقولي طب منحوش الفلوس واهو عربيتك موجودة تعالي نشتغل عليها
اقولك لأ مهو اكيد بعد كل اللي هيعملوه فالبلد أكي أكيد الواحد لو عرف يحافظ على الفانلة اللي لابسها يبئى كويس يبئى اكيد اكيد اكيييييييييد برضو مش هيبئى في عربية فهو توك توك يعني توك توك

والله هم يبكي ويبكي ويبكي

اوعى تفكر يقول...

احنا عندنا حتى الميه مش لايقت\نها
تحس ان ده هو الواقع الميه بقيت بتباع فى جراكن
والجركن بجنييييييييييييه بحالوا
يعنى عشان اخد دش ادفع 2 جنيه
عشان لا مؤاخذه اقضيها بنص جنيه
ده كده خراب بيوت

saragebaly يقول...

هههههه
ههههههه

يا خبر !!!

هما كمان هيخصخصه النيل؟؟

دة كدة يبقى الدنيا باظت

ونقول على البلد السلام

ولا احنا اصلا قايلينه من بدري

تحياتي وتقديري

دمت بكل الخير

سارة

حاجات جوايا يقول...

بجد انا بحلم بيوم الخلاص
يوم ما ربنا يرحمنا منهم
ويجيلنا الحاكم الصالح اللى يرجعلنا حقوقنا ويأمم أصولنا
يارب اليوم ده يكون قريب

maha zein يقول...

ربيها و ابقى تاجر بلهارسيا كبيييير

ههههههههههههههههههههه
تاجر بلهارسيا كبير
يا مفتري
ايه يا جدع انت ده انت دمك خفيف كده ليه انا مش واخدة علي كده منك انا عرفاك اتم كده في نفسك
بجد كلامك حكم
انا الحمد الله عندي جراكن كتير
هلاقي حاجة اخد فيها حقي
اشكرك يا رب ضمنت حقي
لو اتزنقت في جركن قلي

dina يقول...

هههههههههههههههههههههههههه
يااااااااا
و الله وحشنى الضحك على خيبتنا....هههههههههه
اه صحيح...طب انا بما انى عاشقة لاسكندرية عاوزة نصيبى من كوبرى ستانلى بقى و حخلى المرور فيه بتذاكر...بفلوسى يا كلاب على رأى صبحى

صدى الصمت - عاشقة الورد - يقول...

هههههههههه
والله فكرة جديدة حكاية خصخصة النيل دى ربنا يستر ومايخصخصوش اللأهرامات كمان

وينكى يقول...

هههههههههههههههه
خير خير خير
طب واللى مش عاوز يتبل وعاوز حقه ناشف يعمل ايييييه؟

عاوز عروسه بالمقاس يقول...

ههههههههههه
على فكره انت جامد جداا بس هو احنا مش حناخد اسهم احنا حناخد زنمبه
لان حتى سهمك هم اللى حيستثمروهولك وبعدين تروح تلاقيك خسرته
انا عن نفسى حاخد نصيبى اجيب بيه حمام واطيره

Maha Shahen يقول...

مش عارفه اقولك ايه الموضوع ملخبط وحاجه تحرق الدم لأنسان بارد زي التلاجه وبصراحه هم يضحك وهم يبكى
بتناقش مواضيع مطروحه لهدم الكيان بطريقه كوميديه ساخره هايله
كنت زمان بزعل قوى لو حد قالى انا مسافر وسيبها دلوقتى بقى بقول الله يرحم اللي فيها وانا منهم
وربنا يوفقك اللي فكر فعلا وسابها
اصلنا لو فكرنا نطفش دلوقتى هنبقى عاملين زي الفئران اللي بتنط لما السفينه توشك علي الغرق
يلا ربنا يرحمنا برحمته حال ملهوش حل ولا كلام
تحياتى ليك

... amr يقول...

انا عايز حقي ناااااااااااااشف ....
و ناشف بالقوي كمان :))))

يابا دي عالم لامؤاخذة **** ...

طب واللي عايز يشتري الترماي يقف في انهي طابور ؟؟؟
يا عم دي حاجة مستفزة .. الاقي عندك في القهوة نسكافية بلاك يا معلم ؟

kochia يقول...

حلو والله
افكار مبتكرة جدا

لما نشوف يمكن نعملها كلنا
تحياتي

مواطن مصرى نايم يقول...

نيرة
====
و الله يا نيرة انا مش حاخد من بلدى حاجة
انا عاوز بلدى على بعضها
حتة واحدة
كلنا نبقى ايد واحدة مش اى حد يرمى لواحد فينا فتافيت البلد يجرى عليها و ينسى اخواته
كلنا لازم نخاف على بعض

مواطن مصرى نايم يقول...

نيرة
====
لا مش شعارات فعلا
انا كمان ممكن اعمل اى حاجة عشان بلدى بجد
و الاغنية معبرة فعلا عن حالنا
بس رغم انها من ايام الاحتلال
ايام سيد درويش تخيلى
بقى حالنا بقى زى ايام الاحتلال
ربنا عالظالم

مواطن مصرى نايم يقول...

همس الاحباب
==========
و الله هو اللى فاضل لنا يا خلود
دا حتى الهرم و الا اي مزار سياحى صعب المصريين يدخلوه زى الاجانب
ربنا يرحمنا بجد

مواطن مصرى نايم يقول...

انجى
====
تعرفى انى عمرى ما كتبت حاجة قاصد بيها الضحك
انا بسخر من وضع كائن
وضع فرض نفسة علينا
و بجد انا كان نفسى تضحكوا بس انا ذات نفسى مش عارف اضحك زى الاول
الحمد لله
و ادى القهوة اهى من غير بن
بس احنا معندناش مية
;)

مواطن مصرى نايم يقول...

مرمر
=====
انتى حتقولى لى و الله عندك حق
بس اصلا مفيش حد عنده حاجة اصلا عشات يتبت عليها
ربنا عالظالم بجد
اهوه حد زيك ايه سبب انه اتولد فالامارات
ان العيشة هنا مش بتجيب فلوس
فلازم نطلع بره
و كلنا بنحب البلد

بس نار بعدها احسن من جنة مليانه شياطين

مواطن مصرى نايم يقول...

عادل
=====
انا خايف عالغيار الداخلى بتاعى يتخصخص يا عادل
و الله الواحد حيطلع من هدومة
ربنا معانا بجد

مواطن مصرى نايم يقول...

ايما ام البنين
=============
حاضر حروح اشوفها حالا
نورتينى جدا

مواطن مصرى نايم يقول...

حكمل رد عالتعليقات بس بجد لسه راجع من بره
و عاوز انااااااااااام
حرد عالباقى بكرة ان شاء الله

آه وكفى يقول...

اصحى من النوم ورد عالتعليق يااسمك ايه

الزباين

الزباين و يا رب ابعد عننا الضرايب