الثلاثاء، 18 نوفمبر 2008

احمى البلوج بتاعك








حاجة صعبة جدا إنك تفتح البلوج بتاعك فى يوم
و تلاقية اتحذف او تلاقى البلوج بقى بلوج حد تانى

عشان كده فكرت إزاى المشكلة دى تتحل ؟؟

و بالذات بعد حذف بلوج



(كيارا)
و ده بلوجها الجديد
=====
و كمان مش اتحذف بس لأ
دا كمان حد تانى اخد البلوج بتاعها

طبعا صدمة
بجد انا حزيييييين جداااااا على البلوج

لأنى حاسس بكيارا دلوقتى

بس بقول لها معلش و متخليش حاجة تزعلك ابدا
ـــــــــــــــــــــــــــــــــــ

انا بقى فكرت ازاى احل مشكلة حذف البلوجات دى ازاى ؟؟

لازم الاول احدد المشكلة

اكتشفت ان اللى بيتحذف مش البلوج
لأ
دا الاكونت بتاعك على بلوجر هو اللى بيتحذف
الاكونت اللى بتعلق بيه و كده

يعنى لما يتحذف و تكون عامل بيه بلوج اكيد حيتحذف معاه

يبقى الحل هنا اية ؟؟؟
ـــــــــــــــــــــــ

إنك تعمل اكتر من اكونت
اتنين مثلا او تلاتة
و تخلى التلاتة يشتركوا فى البلوج بتاعك
بحيث ان البلوج بتاعك ياخد شكل البلوج الجماعى
اللى بيكون فيه اكتر من مدون مشترك فالتدوين فيه

هنا بقى لما يتحذف الاكونت بتاعك مش حيتحذف البلوج
إلا أذا تم حذف باقى الاكونتات اللى مشتركة فالبلوج

ــــــــــــــــــــــــــــــــــــــــــــ
طريقة إشتراك اكتر من اكونت فى البلوج
ــــــــــــــــــــــــــــــــــــــــــــ
اولاً
===
اعمل اكونت جديد بإيميل جديد غير بتاع الاكونت الرئيسى
و بعد ما تعمل الاكونت ابعت له دعوة للإشتراك فى البلوج
إدخل على
الاعدادات



فى البلوج و بعدين ادخل على
السماحات
و بعدين اضغط على
اضافة مؤلفين
او لو بالانجلش
ادخل على
Settings
و بعدين ادخل على
Permissions
و بعدين
Add Authors
و بعدين اكتب الايميل
و اضغط
ارسال
او
Invite

=============
ادخل على الايميل اللى بعت له الدعوة
و اقبل الدعوة
بس اوعى و انت بتقبل الدعوة تقبلها عالاكونت القديم تانى
لأ
غير الايميل لما يطلب التسجيل
بعد ما تقبل الدعوة
ادخل تانى بالايميل القديم
و افتح



الاعدادات
ثم
السماحات
و اضغط قدام الايميل الجديد
على
منح امتيازات الادارة
او
Grant admin privileges

بس خلاص
كده بقى الاكونت التانى مشترك فالبلوج
و إن شاء الله البلوج يفضل موجود
و زيادة فالامان ممكن تعمل اكونت تالت
و تخليه يشارك برضوا

لو اى حد عندة استفسار
انا ايميلى اهوه
Miracls_mine@yahoo.com
يكلمنى عالماسنجر
و انا حشرح له كل حاجة عاوزها
مش حزهق
و الله
و محدش يتحرج يسأل


61 قول و لا يهمك:

سومه...مجنونه فى بلد عاقل يقول...

الاول بجداره

سومه...مجنونه فى بلد عاقل يقول...

يا ولد يا جامد يا سومه يا كايداهم يا فاقعاهم وادى التانى التانى وفى الشبكه عدل يا خبررررررررررر

سومه...مجنونه فى بلد عاقل يقول...

وادى التالت التالت وباقيلى الرابع وادخل كاس العالم واحطم الكواعد

سومه...مجنونه فى بلد عاقل يقول...

فينك يا بطوط تتسابق معايا
وادى الرابع الرابع بجداره

سومه...مجنونه فى بلد عاقل يقول...

صدق او لا تصدق انا بكتب تعليق بقول هو فين مواطن لاقيتك بتنزل عندى تعليق فى نفس ذات الوقت قولت والله لانزله دى الحاسه التامنه اللى مش عند حد غير المجانين

مواطن مصرى نايم يقول...

ههههههههههههههههههه
ربنا يرجع لنا بطوط بالسلامة
وحشنى و الله

سومه...مجنونه فى بلد عاقل يقول...

اوعى تفتكرنى حمشى لا انا مش ماشيه انا مبلطه هنا لحد ما اخد كرابتشينو بتاعى يا نايم ما تنادى لايبى السهر شكلها حتجمد بس عارف حركه البلوج دى حركه صايعه لالا فنان يعنى فنان

مواطن مصرى نايم يقول...

مصدق
و الله مصدق
دى الحاسة التامنة بقى ؟؟
كنت بسمع عنها
هههههههههههههه
بس اول مره احس بيها
ههههههههه

سومه...مجنونه فى بلد عاقل يقول...

والجماهير تطالب ببطوط تطالب ببطوط عشان ندبحه ع العيد الكبير

سومه...مجنونه فى بلد عاقل يقول...

قال اول مره تحس بيها دا باعتبار انك عندك محاسيس زينا
وش مطلع لسانه

مواطن مصرى نايم يقول...

البلوج بلوجك
لفى فيه براجتك لو عاوزة تباتى هنا باتى
هههههههههههه
بس ايه رأيك فالفكرة بتاعة البلوج
انا واد دماغ طول عمرى
هههههههههههه

مواطن مصرى نايم يقول...

لأ تصدقى
انى عديم الاحساس
هههههههههههه
وش مش فارقه معاه و عامل بارد
هههههههههههههه
اه يا بنتى دا انا بحس يومين فالاسبوع

سومه...مجنونه فى بلد عاقل يقول...

اه فكره صايعه يعنى تسلم ايدك قولى بقى فين الكرباتشتينو

سومه...مجنونه فى بلد عاقل يقول...

هههههههههههههههههههههههههههههههههههههههههههههههههههههههههههههههههههههههههههههههههههه
كويس انا بحشش يومين فى الاسبوع فى فرق نقط

سومه...مجنونه فى بلد عاقل يقول...

ومازال التقدم الساحق ليا

مواطن مصرى نايم يقول...

هو انتى قاعدة فكوستا كوفى
يا شيخة دى قهوة بلدى
بلا بتاع بقى
مفيش غير شيشة هنا
ههههههههههههههههه

سومه...مجنونه فى بلد عاقل يقول...

طيب انا راضيه بواحد سحلب انت منوفى ولا ايه يا جدع

مواطن مصرى نايم يقول...

كويس شيشة و حشيش
قلبنا القهوة غرزة
ههههههههههههههههه

سومه...مجنونه فى بلد عاقل يقول...

اسمع يا اسلام الحل الوحيد تنزل بوست كيف تحمى مدونتك من سومه:q

مواطن مصرى نايم يقول...

يا ريتنى منوفى يا شيخة
ههههههههههههههههه
عوما
السحلب فات فات و فديله سبع لفات

سومه...مجنونه فى بلد عاقل يقول...

يا عينى يا ايبى زمانها فى فرح اختها بتاكل بتاع كدا قطع مربعه محطوط عليه كريم شانتيه اسمه جازتون
ولا كارتون معنديش فكره

مواطن مصرى نايم يقول...

ههههههههههههههههههه
هى سومة فيرس و الا ايه ؟؟
وش مطلع لسانة
انتيسومة
دا اسم الانتى بتاعك
هههههههههههههههه

سومه...مجنونه فى بلد عاقل يقول...

عوما على عومك انا حرحمك واقوم

mohamed ghalia يقول...

متشكرين على النصيحة دى يا حبيب قلبى
ربنا يكرمك يارب
تحياتى
دمت بكل الود

مواطن مصرى نايم يقول...

لأ سمعت ان البتاع ده
اسمه
جارتون باين
مش عارف
حاكم حدانا فالبلد مفيش الحاجات بتاعك البندر دى يا ختى

سومه...مجنونه فى بلد عاقل يقول...

ههههههههه طيب ادى محمود غالى دخل فى الموضوع امسك فيه عشان انا حمشى

مواطن مصرى نايم يقول...

ههههههههههههههههههه
شوفتى
قدرت اكافحك
ههههههههههههه

مواطن مصرى نايم يقول...

محمد غالى حبيب قلبى
ربنا يخليك
يا رب تكون المعلومة مفيدة بجد
اصلى بقالى فترة بفكر فالموضوع ده

مواطن مصرى نايم يقول...

لأ محمد غالى بيعلق و يجرى على طول يا سومة
بس انا رايح اقلبها فرح عندك
هع هع هع هع

سومه...مجنونه فى بلد عاقل يقول...

امسك حرامى

مواطن مصرى نايم يقول...

ههههههههههههههههههههههههههه
انتى لسه هنا
دا انا بقطع فيكى هناك
هههههههههههههه
دا البلوج عندك بقى فرح

طالب ثانوى يقول...

31تعليق ياظلمة واتنين بس اللى بيعلقوا

على فكرة انا كنت عامل هوليلة على كيارا فى الجايكو وحد معاة رقم تليفوناه وقعدت اد كدة المهم انتا وسومة لية مش فى الجايكو لو عاوزين دعوة ابعتلكوا

مواطن مصرى نايم يقول...

هههههههههههههههههههه
ماشى يا فاروق احنا ظلمه
ههههههههههههه
حبقى اشوف موضوع الجايكو ده
انا شوفته فعلا
لما عملت سيرش على كيارا لقيتك عامل الموضوع ده

طالب ثانوى يقول...

مينفعش تخش على الجايكو من غير دعوة

طالب ثانوى يقول...

انت شفت مدرستى صحيح فى اخر بوست

مواطن مصرى نايم يقول...

خلاص ابعت لى دعوة يا فاروق
على اى ايميل من اللى فالبروفايل بس ابقى قول لى بعت على انهو واحد

مواطن مصرى نايم يقول...

حشوفها يا ريس حالا

طالب ثانوى يقول...

بعتة على بتاع الهوت ميل

micheal يقول...

بوست مفيد جدا با إسلام
نشكرك جميعا علي التنويه
وشكرا لانك صلحت مشكلة التعليقات عندك لان كان بقالي فترة بحاول ومش عارف
تحياتي

مواطن مصرى نايم يقول...

اوك
تمام يا فاروق حبقى ادخل اقبلها ان شاء الله
و انا شوفت البوست عندك اهوه و حعلق

مواطن مصرى نايم يقول...

مايك باشا
مبروك يا ريس
و كل سنة و البلوج بخير
مش عارف ايه حكاية التعليقات و الله بس الحمد لله انها اشتغلت

قوس قزح يقول...

يا اروووووبة
تصدق انا كنت بفكر فى كده لما المدونات كانت بتقع
و فصلت مدونتى عن مدونة بيكا و الضاحكون علشان لو واحدة وقعت ميقعش الكل

لا بجد عبقرى
تحياتى

شفقة هانم واحسان بك يقول...

ربنا يخليك لينا يا مواطن ويكتر من امثالك
افادك الله

مولان يقول...

مش عارفه اقولك ايه يااسلام بجد

بس بجد متتخيلش حزني علي ضي القمر ازاي ده عاصرت احداث كتيره اوي كانت سعيده بالنسبالي منهم عيد ميلادي ونجاحي كله راح راح

يلا الحمد لله

ربنا يخليك يااسلام علي كلامك

مولان يقول...

ايه الجايكو ده يافاروق

حاجات جوايا يقول...

فكرة جميلة يا اسلام
انا عاملة كده فعلا فى مدوناتى بس مكنتش عارفة الموضوع ده .. كويس انك قلت لانى كنت بفكر الغى مدونة واحة الفكر والقلم واركز مع حاجات جوايا .. يلا اسيبها بقى اهى تنفع لحماية ظهر الحاجات اللى جوايا

دمت مفيدا ونافعا
سالى

steelbeauty يقول...

ميرسى يااحمد على الفكرة وانا هعملها

لكن بجد خوفتنى دا لو حصل انا ممكن يجيلى اكتئاب

يعنى بعد كل ده يتحزفلى الاكونت لية عملت اية هى بسهولة كدا يعنى بلوج سبوت مش فاهمة هى بتعمل اية ؟

دا تبقى بلوج سبوت ملهاش امان والواحد يشترى دومين احسن

ahmed_k يقول...

الله ينور عليك يا إسلام
أنا حروح أعملها حاااالا
شكرا ليك

اقصوصه يقول...

ما شالله عليك

كيف خطرت فبالك هالفكره

بصراحه الفكره روعه

عن نفسي بنفذها في اقرب وقت

الواحد لازم يكون حاسب حساب كل شي :)

enjy يقول...

يا لعيب........هحاول مع عقلى المصدى انى اعملها يا اسلام وتقبل جزيل الشكر

يوميات نائمة في الأرياف يقول...

انا حقيقي معجبة جدا بالحوار الدائر بينك وبين سومة
يارب يديم الود بينكم
هي نصيحة جميلة يا اسلام ويارب محدش فينا يتعرض للموقف ده
دايما كدة انت زعيم العصابة وشيخ الحارة والفتوة وكل اللي انت عايزة
بس انا برضة مفهمتش حاجة
انت عارف بقى
على فكرة انا بحب اوي اعد اجرب حاجات وكل الي انا عايزة اعرفه من النت بعرفه
بس الحتة دي مش فهمتها يا اسلام
انا هبقى اسألك
ولا انت عندك مانع؟

سومه...مجنونه فى بلد عاقل يقول...

نائمه فى الارياف
حلو قوى ربنا يديم الود دى
هععع قصدك ربنا يديم الخناقه الحق يامواطن دى بتتمنالنا الشر
تصدق التالت بتاعنا انا مفتقداه جدااا كان زمانه معانا فى الموضوع الجديد عشان القفشه تبقى واحده وايبى تجيب عيش وحلاوه للكل واهو نوفر بنزين على البوكس

kochia يقول...

موضوع مفيد
انا عملت كدة فعلا
بجد حاجة تزعل
ربنا يستر ان شاء الله

اشكرك
تحياتي

حد مش فاهم حاجه يقول...

بص يا باشا انا بعمل مدونه مشتركه ودا كوبي من الفكره كنت باعته لزميله وعايزك معانا
بص بقي بالنسبه للمدونه المشتركه انا بقول عندي افكار كتيره جداا جايزمش هقدر اصيغها علي شكل مدونه لوحدي
واكيد كلكم عندكم افكار جميله نقدر مع بعض نعمل مدونه جميله و بعدين من الافكار دي نقدر نعمل الاسس اللي انتي قولتي عليها وانا علي الاراء وانتي عليك بقي الاعضاء لاني تقريبا معرفش حد ومع بعض هنقدر نكمل المسيره

اول حاجه عايز اقولها ان فكرة مدونه مشتركه دي في حد ذاتها اساس نقدر نبني عليه المدونه
والمدونه لازم تكون مكونه من 4 او 5 اعضاء جادين تكون افكارهم متقاربه يعني دماغهم واحده من الاخر
ثانيا
المدونه لازم تكون مجنونه يعني طاقه وفيها افكار مختلفه ومواضيع جديده ومختلفه وعلشان كده انا اخترتك معايا
بعد كده
متخيل ان البوست يكون بيتكون من كذا موضوع او نقدر نسميه " ركن" او ويندو او اي حاجه تانيه
بس المهم ان اي واحد ممكن يكتب في اي ركن حسب الموضوع اللي مجهزه وبعد ما يكمل البوست يتنشر

ودي شوية افكار عن الاركان اللي ممكن يتكون منها البوست ودا رأي ومستني رأيك
ركن فضفضه
ودا ركن او بارت كل واحد عايز يفضفض او يحكي اي موضوع يكتبه

ركن المصطبه
ودا بقي ركن الحكاوي ايا كان نوع الحكايه او القصص القصيره وانا عني حبة قصص من حكاوي جدي نفسي احكيهم

ركن shots او ضرب نار

ودا عباره عن طلقات من جمل صغيره لها معني زي اللي بيكتبها انيس منصور بس طبعا علي قدنا
انا ساعات بكتب حاجات من دي
وممكن كمان يكون نقد لازع لاي وضع مش عاجبنا وبرضه في جمل قصيره
ركن البلد دي

ودا طبعا ركن كل ما يخص بمصر هنتكلم فيه عن بلدنا واحوالها وجمالها وحبنا ليها وكرهنا للي بيحصل فيها و بالنسبه ليه انا دلوقت بعيد عنها وعندي كلام كتير قوي نفيس اقولهلها وبالنسه للركن دا انا عندي بوست جامد جدااا و هو عباره عن رد علي اغنيه ما شربتش من نيلها ودي حته منها علشان اديكي فكره

ما شربتش من نيلها 00000 لا دا انا شارب من كيعاني
جربت تغنيلها 00000دانا بيغني علي زماني
جربت في عز ما تحزن تمشي في شوارعها وتحكيلها
جربت لكني لقيتها بصرمه قديمه وجات رزعاني

ما مشتش في ضواحيها 0000 م المشي انا ورموا كعبابي
مكبرتش فيها 00000 دانا عجزت في عز شبابي
كده يعني
وطبعا الموضوع دا مش هيبقي مجرد تسليه لا لازم يكون لينا رأي في اللي بيحصل حوالينا

وطبعا لازم يكون عندنا الركن الخاص بميوشه ودا الركن اللي دمه خفيف ودا طبعا مش لازم يعطلها عن مدونتها بس ممكن تكتب في مواضيع مختلفه

ركن موهوب افني او عبده مواهب

ودا بقي علشان اي حد عنده اي موهبه
او اي خواطر او اي رسمه ممكن يقدمها حتي لوكانت بسيطه
ودا لاننا بنكتب حاجات ممكن ما نكونش حاسين انها حلوه مع انها بتكون جميله جدااا

اكتب كلام علي الورق
مايهمنيش
لو يتقري
ما يتقريش
بس المهم ان الكلام يكون من القلب
له معني
يكون صادق
يكون مش بس لقمة عيش
ليه اسجن كلمتي فيا واسيبها تموت
بلاش اكتمها
ما اكتبها
واسيبها تعيش

وبعدين عندي فكره جميله
بما ان البوست بالشكله دا ممكن يكون طويل حبتين
ممكن نعمل فزوره دمها خفيف والحل يكون في اخر البوست
زي " ليه السمك بيخاف في الجنيه "
" لانه فيه 100 قرش "
وكدة يعني
سلام

blue-wave يقول...

مممممممممممممممم
حلو الموضوع
وفعلا محتاجينه فى الوقت اللى انتئت فيه سرقة الأكونتات دى
ربنا يكرمك

kh يقول...

شكرا شكرا معلومات مفيده وقيمه بس أزاى أصلا يتحذف الأكونت بتاعى ولو أن هناك احد يستطيع حذف الأكونت بتاعى فأنه يستطيع حذف باقى الاكونتات


ينمت مراسلتى على مدزنتى

http://successka.blogspot.com/

أميرة ويلز يقول...

يعني الاكونت بيتسرق زي سرقة الميل

ربنا يستر

وعلى فكرة برده ممكن احتياطي يعني الواحد ياخد نسخة من مدونته دة يبقى افضل عشان تتسرق تتحذف يبقى المواضيق بتعليقاتها معاك تتحط فى اي مدونة تعملها

وجزاك الله خيرا على الموضوع

عالم حبيب يقول...

الله المستعان .. ربنا يعوض كيارا كل خير

والفكرة اللي انت عملتها جيدة ما شاء الله .. جزاك الله كل خير

موناليزا يقول...

يعنى ايه أكونت قصدك مدونة تانية باسمى ولا ايه؟

أفندينا يقول...

فكرة أكثر من ممتازة ...مش عارف كيف لم
أفكر فيها من قبل ؟
خالص الشكر لك

احمد عبد الناصر يقول...

فكرة اكثر من رائعة شكرا لك

الزباين

الزباين و يا رب ابعد عننا الضرايب