الخميس، 13 نوفمبر، 2008

انا عملت حادثة او اتعمل بيا حادثة




البوست مكون من جزئين
========
الجزء الاول
(الحادثة)
ـــــــــــــــــــــ
اكتشفت اكتشاف خطير
اكتشفت انى بعرف اطير
و كمان بعرف اقع كويس ازاى بقى
خير الله ام اجعله خير
كنت ماشى بس مكنتش لابس ابيض فأبيض
اذا بى اطير فالهوا
اه طرت فالهوا
موتوسيكل خبطنى من ضهرى
طيرنى
طبعا بعد ما طيرت اكيد وقعت عالارض
مفشفش مدشدش مكسر مبعجر
بجد موتوسيكل كبير كده
حاجة من بتوع الافلام دول
و كان راكب عليه اتنين
و ماشى عكس الطريق
و بسرعة جامده جدا
انا مش مصدق انى لسه عايش
و غير كده كمان
لما خبطنى جرى
قمت انا فعز ما انا مدشدش
جريت وراه عشان اضربه
و انا ايه كل ده
متبهدل
و الله عضمى كله وجعنى
و كدمات فكل جسمى
بس ابدا
حقى ازاى اسيبة
جريت وراه عشان اضربه
لقيت الناس ماسكاه و كله بيضرب فيه
و طبعا اخد اللى فيه النصيب
بس فالاخر صعب عليا
خليت الناس تسيبه يمشى
و رجعت انا البيت
يومين مش قادر اتحرك من مكانى
عملت اشاعة
طلعت سليم
اه احنا جامدين اوى
(الحمد لله)
مش مصدق انى بعد الخبطة دى لسه عايش
لو كنت شوفتنى و انا طاير فالهوا
كنت قلت ده مات خلاص
بس الحمد لله
انا اه لسه عضمى كله واجعنى
بس اهوه بقى
عمر الشقى بقى
شقى من الشقاء مش من الشقاوة
=========
الجزء التانى
(التاج)
ــــــــــــــــــ
التاج ده جالى من
محمد غالى
صاحب مدونة
هل تبحث عن السعادة
ـــــــــــــــــــــــــــــــــــــــ
(1)
ماهى السعادة من وجهة نظرك؟
========
السعادة ممكن تكون فحاجات كتيراولهم طبعا
انك تحس انك بترضى ربنا
و ده حيخليك دايما سعيد
و كمان السعادة
ان الانسان يوصل للى هو عاوزة
سواء نجاح
زواج
حتى لو رحلة
بس يكون البنى ادم عاوز يعمل الحاجة دى
حيحس ساعتها بالسعادة
==========
(2)
كيف تصل إلى السعادة؟
========
حدد هدفك و حاول توصل له بكل الطرق
لو فشلت انك توصل له من طريق معين
جرب طريق تانى
اوعى تيأس
فالاخر حتوصل ان شاء الله
و ساعتها حتحس بالسعادة
==========
(3)
هل السعادة وهم أم أنها حلم صعب؟
========
و لا وهم و لا حلم صعب
يا عم دا الواحد لما بتيجى له رسالة عالموبايل من حد بيحبه
بيبقى سعيد جدااااااا
مش شرط السعادة تبقى حاجة صعبة
==========
(4)
هل السعادة طريق للنجاح ؟وضح؟
========
لا العكس
النجاح طريق للسعادة
لأن هنا الفعل و رد الفعل
الفعل انك تنجح و رد الفعل حيبقى السعادة بالنجاح
لأن فى ناس سعيده و مش ناجحه
==========
(5)
ماهى أكثر اللحظات التى شعرت فيها بالسعادة؟
========
لأ هى فترة مش لحظة
و كانت اسعد فترة فحياتى
فى ناس كتير تعرفها
بس خلاص خلصت الفترة دى
بس ده ميمنعش ان ممكن الفترة دى
يكون ليها كماله
بس بعدين
ربنا ييسر
----
و كمان كنت سعيد لما جبت مجموع فإبتدائى
و دخلت مدرسة متفوقين
اللى هى فالفترة دى كانت اشهر مدرسة فإسكندرية للمتفوقين
مدرسة على ابن ابى طالب الاعدادية للمتفوقين
دلوقتى اتلغت كلمة متفوقين من اسم المدرسة
كنت انا اخر دفعة و بعد كده اتلغت
----
و كمان لما دخلت فثانوى مدرسة متفوقين
اللى هى اشهر مدرسة للمتفوقين برضوا
لأنى جبت مجموع فإعدادى كبير
كانت مدرسة
جمال عبد الناصر الثانوية العسكرية للمتفوقين
و كمان اتلغت كلمة متفوقين من الاسم
بس لسه الدخول فيها بمجموع كبير
----
بعد كده الكلية ضيعت السعادة اللى فاتت
هههههههههههههه
غالبا بعد كده سعادتى بقت قليله
بس ميمنعش انى ببقى سعيد فلحظات كتير
==========
(6)
هل ممكن أن تحقق كل شىء؟
========
ممكن
بس الكمال لله وحده
ممكن تحقق احلامك بنسبة
تسعين فالمية
==========
(7)
السعادة تجعلك تقبل على الحياة أم لا؟
========
اكيد طبعا
بس لما مش بكون سعيد بحاول اوصل للسعادة
عشان كده برضوا ممكن اقبل عالحياة برضوا
==========
(8)
هل أحسست يوما انك وصلت لقمة السعادة؟
========
جاوبت فالسؤال الخامس
اللى هى الفترة اللى كنت سعيد فيها جدا
==========
(9)
لماذا تمر أوقات السعادة بسرعة؟
========
لأ مش ديما برضوا
ممكن تطول
بس لما بتمر بسرعة بتكون بسبب تقلب الحياة
و ده راجع لأن الانسان مهما وصل لاعلى الدرجات
بيتمنى يعلى اكتر و اكترطبيعة بشرية
==========
(10)
هل ترى السعادة فى التدين؟
========
من اكبر الاسباب فالسعادة ان الواحد يقرب من ربنا
طبعا لأن ده بيساعده انه يرضى عن اى حاجة تحصل له
==========
(11)
هل أنت متفاؤل وعندك أمل؟ وضح؟
========
دا انا عندى امل و عمر كمان
يعنى ساعات بحس انى ممكن اعمل كل حاجة
بس اسافر من البلد دى
و حاسس ان ده حيحصل ان شاء الله
و حاسس انى حنجح بره ان شاء الله
لأنى حد بيحب الحاجة اللى بيعملها فاكرين فؤاد المهندس لما كان عاوز يطلع من القطن قماش مباشرة
كان اسمه سبعاوى فالفيلم ده
اهو انا لما بحط حاجة فدماغى
ببقى سبعاوى
==========
(12)
إذا شعرت بالحزن ماذا تفعل؟
========
لأ ببقى صعب اوى
بقفل جامد جدا
بس بحاول اخرج من المود
غالبا اللى بيساعدنى بعد اصحابى
بكون انا
بخرج نفسى من المود بإنى اتعايش مع الوضع
و بتأقلم الحمد لله
==========
(13)
ما رأيك فى الأفراد المتشائمين؟
========
بطبعى مرح
بحاول اخلى اى حد الدنيا قافله معاه
يضحك و يعيش
و حتى لو ابوه قتل امه
و ابوه بعد ما قتل امه انتحر
و امه طلعت ما ماتتش و كانت بتمثل برضوا بخليه يضحك و يعيش عادى
و بحاول اخليه يخرج من المود بإى طريقة
حتى لو حقتله
ههههههههههه
**********
شكرا جداااااااااا لمحمد عالتاج الجميل ده
هو اللى عاملة يا جماعة
انا نسيت انى اصلا كنت عامل حادثة بعد البوست الطويل ده
معلش بقى
ESLAM

30 قول و لا يهمك:

ahmed_k يقول...

ألف سلامه عليك يا سلم
الحمد لله
قدر ولطف
وأيه يا سلم اللي بيحصلك من السعاده ده
كل مدرسه تدخلها تلغيها من كشف المتفوقين ههههههههه
في الإعدادي والثانوي كمان
ده إنت سرك باتع وأنا مش واخد بالي ههههه

بس حلوه إجاباتك كلها يا سلم
ربنا يديم عليك السعاده والسرور

دمت بكل خير

همس الاحباب يقول...

الف سلامة عليك با اسلام
الحمد لله جاءت سليمة
قدر الله وماشاء فعل
واجابات جميلة ومميزة
تسلم ايدك ومبروك عليك التاج
تحياتى

صبرني يارب يقول...

الف الف سلامه عليك

يارب القطه السوده وانت لا

طب الموتوسيكل سليم ولا ايه


التاااااج جميل اوي واجابتك حلوه بجد

كـــيــــــــارا يقول...

بالنسبه للحادثه الف الف الف سلامه الحمد لله انك بخير بجد

قلقتني بتعليقك اللي عندي فعلا

************

وفعلا احلي معني للسعاده قلته

وحلو اوي ردك في المتشائمين هههههههه

زيزو باشا يقول...

إسلام

سلامتك ألف سلامة والله العظيم أنا حاسس بيك تماما أنا في الشغل دلوقت وصعب قوي قوي أكتب بالعربي وأنا في الشغل ها أكتب لك لما أروح

fashkool يقول...

الحمد لله على السلامه من خبطة الموتوسيكل اصل اسمه موت وبعدين سكل يعنى ربنا كتب لك عمر جديد .. اما السعاده لماذا نحاول ان نجد لها سبب او معنى .. السعاده اشياء كثيره .. المهم انك تبقى مبسوط ومش ناعى هم حاجه من غير ما تدور لها على سبب او معنى سيب نفسك وساعد ما تكون رايق وفايق تبقى سعيد .. وبعدين انا دخلت على كذا واحد بيبحثوا عن سبب السعاده .. ما لهاش سبب .. هو ربنا اما بيحب يخلى واحد سعيد بيسعده وخلاص .. تحياتى

zOzO يقول...

الف سلامه عليك
وحمد لله ع السلامه
الحمد لله انك بخير


بالنسبه للتاج
بجد تاج حلو
اجابات كلها حلوه


هل أنت متفاؤل وعندك أمل؟ وضح؟
========
دا انا عندى امل و عمر كمان
ههههههههههههههه

عمر وامل مره واحده
هههههههههههه
وش بيغمز

هههههههههه
هههههههههههههههه
هههههههههههههههههههههههه


ربنا يوفقك يارب ويحقق ما تتمني
دمت في حفظ الله

رئيس جمهوريه نفسى يقول...

الف سلامة عليك يا اسلام قدر لطيف واحمد ربنا انها جاءت على قد كدة

صدى الصمت يقول...

حمدلله على السلامة
مدونتك جميلة ومرحة ولذيذة
ربنا يوفقك ويبعد عنك الحوادث
تحياتى ، عاشقة الورد

mohamed ghalia يقول...

حبيب قلبى
أخبارك إيه؟
حقيقى إجاباتك رائعة
ومتشكر جدااااااا على قبولك للتاج
ربنا يسعدك دايما
دمت بكل الود

سومه...مجنونه فى بلد عاقل يقول...

يا كبدى يا ابنى سلامتك يا مواطن ان شاء الله بطيخ وانت لا
ان شاء الله سونه وانت لا
ان شاء الله حزنبل التاسع عشر وانت لا
طمنى عليك وانا اللى بفكر اقولك اقتراح وكنت حبعته ميل لما تخف بقى ان شاء الله

maha zein يقول...

يا غلبي عليك
ايه يا عم انت ده
ايه يمشيك انت ذي الناس
ما كنت مشيت فى الطريق العكسي اضمنلك
بعدين يعني اذاي انت مدشدش وقمت تجري يعني
اعتبرها حلاوة الروح؟
عموما مش العالم ادوهم علقة تمام؟
خلاص يبقه مية مية

ربنا يشفيك وترجع احمد اللى كنا نعرفه
حاكم انت دلوقت بقيت فوشفوش خالص


بخصوص التاج ردودك حلوة وفعلا صادقة
من خلال معرفتي بيالاخ فوشفوش اقدر اعترف واقول ان الجدع ده متفائل وسعيد حتي في احلك لحظات حياته
وبردو بيرسم السعادة علة وجوه الناس اللى بتتكلم معاه
يعني الاخ فوشوفوش ده سعيد
ربنا يسعدك
ويديم عليك السعادة
وتخلصنا منك بقه
يا بتاع الحوادث
والموتسيكلات
يا اسلام يا ابن فرناس

enjy يقول...

لا انا لسة مكملتش الجزء التانى من البوست بس اعلق الاول على الجزء الاول سلامتك يا اسلام الف سلامة والله بعد الشر عنك والله اتخضيت قوى لما قريت الحمد لله ربنا سترها وجت سليمة... حمد الله على سلامتك ويارب يارب ما اسمعش عنك حاجة وحشة ابدا ابدا يا اسلام يا عسل انت يا جميل... الحمد لله جت سليمة ..اروح بقى اقرا باقى البوست بس قبل ما اكمل تااااااااااانى الحمد لله انها جت سليمة والف سلامة عليك

حاجات جوايا يقول...

ألف سلامة عليك يا اسلام
الحمد لله قدر ولطف
خد بالك بعد كده .. أنا كان هيحصلى كده برضه من فترة وكنت شايلة ابنى وجه موتوسيكل من الاتجاه المعاكس ومكنتش بصيت الناحية دى خالص على اساس انها امان ..كان بينى وبينه 5 سم .. بس الحمد لله
المفروض قوانين المرور تتفعل فى البلد دى وكفاية أوى اللى احنا فيه ده

............
إجابة التاج جميلة .. وواضح يا اسلام انك شخصية متفائلة ..مش بس مرحة
ربنا يسعدك دايما ويحقق لك كل اللى تتمناه

دمت فى حفظ الله

enjy يقول...

عدنا.......... قريت التاج الحلو والاجابات الجامدة تصدق انا كنت فى مدرسة على بن ابى طالب بردو (بس البنات بلاش ظرف) وكنت فرحانة قوى بردو........باقى اجاباتك حلوة قوى والفترة الحلوة اكيد لها كمالة باذن الله وقريب بس انت ركز (وش بيغمز ) النجاح بقى ممكن يتحقق برة او جوة المهم انك تبقى عايز تنجح.. ربنا يوفقك يا اسلام

enjy يقول...

اه نسيت اقوللك مشاريبك عندى بقى احنا لازم نكرموووووووووووك عشان انت مريض وعمل حادثة وكدة تشرب ايه؟؟؟
والنبى بلاش اختراع الفانتا اللى اى حد بيزور اى حد عيان بياخده معاه انا ممكن اجيب لك بدل الفانتا لبن شغال معاك؟؟؟ اووووووووو سحلب او حلبة او اى حاجة غير الفانتا يعنى.. اطلب بس

~*§¦§ Appy §¦§*~ يقول...

الف سلامه يا سمسم يا جامد وانا اقول يا عينى الاعضاء البشريه المتطايره فى كل مكان دى بتاعت مين يقولوا ليه سمسم هههههههههههههه

اما عن السعاده تصدق مش عارفه اجاوب على البتاع ده بس هجاوب وامرى لله وزى ما تيجى بقى

سميرة يقول...

اسلام
الف الف الف سلامة والمهم الموتوسيكل كويس ، قصدي انت كويس ، بس تعرف مع اني زعلانة اوي انك عملت حادثة بموتوسيكل ، انا كنت هااتأثر خاالص لو كانت كفى الله الشر بأتوبيس ولا حاجة :))))
بالنسبة بقى لإجابات السعادة انا متفقة معاك تماماً في حاجات كتير خصوصا لما بزعل بقفل واتربس ع الآخر ، بس برضه بطلع م الموود بسرعة
تحياتي لك
ودمت بكل سعادة

kochia يقول...

حمد الله علي السلامة
وكل تاج وانت طيب

M.K يقول...

الحمدلله على السلامه يا إسلام...
الله يعافيك وماتشوف شر..
..........
بطبعى مرح
بحاول اخلى اى حد الدنيا قافله معاه
يضحك و يعيش
و حتى لو ابوه قتل امه
و ابوه بعد ما قتل امه انتحر
و امه طلعت ما ماتتش و كانت بتمثل برضوا بخليه يضحك و يعيش عادى
و بحاول اخليه يخرج من المود بإى طريقة
حتى لو حقتله..
............
هههههههههه
أدام الله عليك السعاده..

mostafa rayan يقول...

ربنا يشفي عنك با جميل ويحققلك كل السعادة

بنت مصريه يقول...

الف سلامه عليك يا اسلام
معلش هيه الدنيا كده يوم تنيمك ويوم تطيرك
واديك برضه حسيت باحساس العصفوره ولو حتى ثوانى
هههههههههههههههه
الف سلامه يا اسلام

بقولك ايه هو الجو ف اسكندريه عامل ايه ف الشتا

ياريت ترد عليا اصلى احتمال اجى

fashkool يقول...

يا راجل انت لسه بتدور على السعاده .. عموما اصل خبطة الموتوسيكل بتعمل كدا .. اصح بقى وبطل نوم

غروب يقول...

الف الف سلامه عليك يا اسلام

بس حلو اوى حكايه انك بتعرف تقع كويس دى لعلمك مش ناس كتير بتعرف تعملها يعنى ده فى حد ذاته انجاز تستاهل عليه المدح والثناء ههههههههههههههه

بالنسبه للتاج جميله اجاباتك

تحياتى

غروب

غير معرف يقول...

انا عايزة كل الى عندك فى القهوة وبلاش كمان
بلطجة عندك مانع والا يكنشى عند مانع يعنى
الف سلامة بجد
الحمدلله انها جت سليمة اه مش اوى بس الحمدلله على كل حال
انا مش بدخل عشان اكبيوتر كان بايظ ولسة متصلح ومش هدخل تانى عشان الامتحانات
بجد سورى اوى
والف سلامة تانى
اه نسيت
ميرسى على اللينك
سلام
نيرة احمد محمود

موناليزا يقول...

حمدالله على سلامتك والحمدلله انها جت على قد كده
بس انا مش معاك فى انك سيبتهم كان لازم ياخدوا عقابهم عشان مايعملوهاش تانى ويمشوا فى عكس الطريق

وفاء بركات يقول...

الف مليون حمدالله علي سلامتك
يادوب عرفت من نونا إمبارح
لما سألت عليك ياخبر ألوان...الحمدالله ربنا قدر ولطف
ورجعت تنورنا تاني..فكر كده يمكن كنت ماشي نايم وانت اللي ماشي مخالف..الولاد بيقولو المشكله انك إضربت في ظهرك علشان كده طرت..لكن في الوش تتخرشم وبرضه تدشدش هو م كنشي فيه إختيارات...
ربنا يكفيك شر طريقك ويحافظ عليك انت وكل الشباب أميييييييييييييين

daktara يقول...

الف حمد الله علي السلامة
المشي في الشارع اليومين دول خطر جدا
انت ايه بس اللي مشال بالسرعة دي وكمان عكس الاتجاه
يالله معلش

مواطن مصرى نايم يقول...

الله يسلمكوا كلكم يا جماعة
و الحمد لله
انا كويس
الخوف على الموتوسيكل
هههههههههههههه
الف شكر يا جماعة بجد مش عارف اقول ايه
ربنا يخليكوا يا رب

تحياتى ليكواااا كلكم
يا اجدع مدونين فالكون كله

هتفهم لوحدك يقول...

الف سلامه عليك بس على ايه وانت محصلكش حاجه خالص الحمد لله يعنى انا مش بحسد بس مستغربه بس الحمد لله على كل حال انا اول مره اشوف حد يدوسه اى حاجه ويقوم يجرى ورا اللى داسه ماشاء الله عليك يا سلم

الزباين

الزباين و يا رب ابعد عننا الضرايب