السبت، 8 نوفمبر 2008

انا هندى و راكن الفيل على باب البلوج


عاوز ادخل دخله هندى شوية
يعنى مثلا
نشغل اغنية هندى فالاول
او نتفرج على فيلم هندى
او نركن الفيل على باب البلوج
حاجة كده تحسسك انك مهراجا
او اميتابتشان
المهم تلف العمه الهندى على راسك
و تبدأ فى قرايه البوست الهندى ده
==========
سيبك من المقدمة خالص
لأنى لو فكرتك انك لازم تكون هندى حتفتكر انك مش هندى
لكن انت و انت بتقرء دلوقتى انت منين ؟؟
من الهند
بما انى لسه اكل مانجه هندى
اه فالشتا
و بعدين ما فيش هندى بيسأل
و لسه لافف العمة الهندى على دماغى
عاوز اتكلم شوية عن موضوع كده تبع العالم الهنود دول
المهم يا سيدى
انا عاوزك تعيش المود الهندى اوى
تفتكر لو انت هندى
كان ممكن ايه اللى حيحصل لك ؟؟
اكيد كنت اكتشفت و انت كبير ان ليك اخ تايه
و ابوك مش ابوك
و امك اصلا بت خالتك
و ان اختك هى امك الحقيقية
يعنى الحياة حتبقى اخر دماغ
============
اهوه الحكومة بتاعتنا عاوزة تخلينا كلنا هنود
اه
و عاوزين ان الشعب يلبس العمه
(مش بتاعة محمد شومان)
بص يا سيدى
لما يطلع محمود محى الدين وزير الاستثمار
ربما يرزقة بشوطه تاخده
يقول لك ان نتيجه الخصخصة انهم بيكسبوا من بيع المؤسسات الحكومية الخسرانة
ازاى ؟؟
اقول لك انا
يعنى يقول لك ان شركة معينة الارض بتاعتها كانت اول ما اتأسست تمنها مليون جنية
و المبانى اللى عليها اتكلفت مليون كمان
يبقى المؤسسه على بعضها بكام
بأتنين مليون
و المحروس ننوس عين ماما
راح بايعها
بتلاته مليون و يقول ان كده احنا كسبنا
يبقى تعرف على طول ان ده
نصب
و سرقة
و تلبيس عمة
افهمكم شغل الخصخصة دا بيمشى ازاى
فى حاجة فالمحاسبة اسمها
(مبدأ التكلفة التاريخية)
بمعنى
ان الحاجة تتسجل بالسعر اللى احنا اشترينا بيه
مش سعر السوق
يعنى اشترينا حاجة بخمسه جنية حتفضل فالدفاتر خمسة جنية
حتى لو الحاجة دى بقت بالف جنية
ساعة لما تيجى تبيع الحاجة دى
هى مكتوبة فالدفاتر بكام
ب 5 جنية
يبقى لو بعتها ب 10 جنية انت كسبان صح
لا مش صح
لأن قيمة الجنية بتقل
و ده اللى هما بيحاولوا يخلونا نقتنع بيه
ان هما بيكسبوا
يعنى لما يبيعوا حاجة سعرها دلوقتى 1000 جنية ب 10 جنية
و الحجة بتاعتهم انهم كانوا اشتروها ب 5 جنية
يا سلام
يعنى التقييم هنا مش بسعر السوق
لأ بسعر الضرب عالقفا
فى بقى حاجة بتحصل فالخفى
ان اللى بيبيع
بياخد عموله اكبر من تمن البيع اصلا
يعنى تخيل لما يبيع حاجة ب 10 جنية و ياخد عموله فالخباثة 20 جنية
يعنى اعلى من سعر البيع
يبقى نقول ايه بقى ؟؟
غير
حمرا
(على رأى احمد حلمى)
عرفت ليه قلت لك عيش جو انك هندى
ـــــــــــــــــــــ
حرد على التعليقات اللى فاتت
بس معلش طالع عينى و الله اليومين دول
مش مذاكرة
(فشل)
و حبة حاجات كده بحاول اخلصها
ادعو لى
=====
ESLAM

24 قول و لا يهمك:

رئيس جمهوريه نفسى يقول...

وعندك واحد تامر هندى قبل ما نكتب التعليق وصلحة بص يا سلوم حقولك على حاجة تلخص الليلة دى كلها وترسيك على التيتة كنت فى زيارة لقريب لية عضو مجلس شعب ايام ما كان الواحد مقدم نيابة عامة وانا فى السكرتارية بقاء عقبال امالتك كدة واشوف طقم سكرتارية عندك فى المكتب جة واحد( لا مش لابس ابيض فى ابيض احنا برة الفيلم الهندى دلوقتى) وبيتكلم مع السكرتارية قلها فى كلام انى عاطف عبيد حيتشال علشان لقيو انه خد اتنين مليار جنية سمسرة من الخصخصه كان ايامها العبيد دة ماسك رئيس الشركة القابضة وبيبيع ولا لطفى فى مسلسل سنبل بعد المليون تانى يوم يا رئيس بقى رئيس وزراء عادى يعنى غير بقاء البيع للوزراء زى بنك اسكندرية اللى اشتراه بنك مشارك فية اتنين وزراء غير و غير وغير
اسلام ممكن اخد الفيل لفة وارجعة تانى

رئيس جمهوريه نفسى يقول...

فى غلطه قصدى تمر هندى مش تامر هندى

adel يقول...

بص اني انا هندي دي قديمة....و اللي يقوللك غير كده كداب....كلنا هنود ياسيدي الفاضل
اما عن الخص خصة.....فا انا كتبتها زي مافاهمها....هي عبارة عن الخص...و بما اننا شعب بنقدر الخص فلازم نفهم الخصخصة صح ....و هما كلامهم صح يا سولم ياحبيبي :)
و بمناسبة الهنود ...بيقولك في واحد و مرايته لقوا بنت صغيرة خدوها ربوها و كبروها و بعد 20 سنه ....شوف بعد 20 سنة اكتشفوا انها ام ابو الواد ده ....ههههههههه

عادل
http://elbald-dy.blogspot.com/

mohamed ghalia يقول...

أخى العزيز
أنا فاهم كلامك كويس لانى طبعا بدرسه فى الكلية
وهما فعلا بيشتغلوا الشعب
ويقولهم أصلها خربانه
تحياتى دمت بود
وواضح انى لازم اعيش هندى
بالتوفيق

~*§¦§ Appy §¦§*~ يقول...

لاااااااااااا والله الهنود مظلومين يا سمسم
عيب عليك متقولش كده دول حتى عندهم ديمقراطيه وناس منظمه وسبقونا احنا مش محصلينهم
ممكن لفه بالفيل يا كابتن لاختك او سمحت
هههههههههههه
يا بنى ده لعب على كبير اوي نفسي اعرف بيجيبوا العقول الذريه دي منين فى النصب والسرقه عينى عينك واحنا مش بنقول بم ولا حتى بم بم فاكره هههههههههه

حاجات جوايا يقول...

فعلا كلنا هنود
والله لو كانوا شاطرين فى الادارة زى شطارتهم فى النصب كان زماننا دلوقت فى مصاف الدول
ربنا ينتقم منهم

شد حيلك يا اسلام ربنا معاك

ahmed_k يقول...

سرقه وبجاحه عيني عينك
فعلا الخصخصه اللي بتقوم بيها حكوماتنا الغراء هي قمة النصب والسرقه عالمكشوف,
بداية من وزارة الرجل الذي كان يتحدث من داخل فمه عاطف عبيد لحد الرجل الذي ناطح السحاب
والبلد منهوبه وعلى عينك يا تاجر,
العالم أجمع اليوم بدأت حكوماته في شراء المؤسسات الخاصه كالبنوك مثلا
ونحن مازلنا مصرين على بيع القطاع العام كبنك القاهره مثلا
في غباء أو سرقه عيانا بيانا

ولكي الله يا مصر

صبرني يارب يقول...

اها ما هي دي لعبة الخصخصه فعلا

استهبال فى استهبال

مع ان المفروض انهم بيشكلوا لجنه عشان تحدد سعر السوق مش القيمه الدفتريه ولا القيمه التاريخيه
بيحددوا سعر السوق الحالي
لكن طبعا اللجنه كمان واكله حلاوه عادي
وغير كده اصلا ما تنساش ان فى مؤسسات بتتباع على انها مؤسسات خسرانه
يعنى بيدخل الالتزمات بتاعتها الى قد تكون وهميه على انها خصم من قيمة الاصول
فبالتالي بيقل سعرها جدا

تحياتي لك على الموضوع الهندي
وياريتنا كنا هنود دول بقى احسن مننا يا اخي

nour shahen يقول...

اهو انا واحده من الناس قولت فعلا علي الشرح يبقى كسب لما باعها بس كدا لا نبقى بنلبس في حيطه هندى هندى تمام يعنى ههههههههههههه
متشكرين علي الشرح يا جناب المهراجا وربنا يخليك للشعب النايم اللى زى حالاتى
خالص تحياتى ليك

☼♫♪ عمــاد الدين يــوسف ☼♫♪ يقول...

عزيزي اسلام ....
ياريتنا نكون زي الهنود ... على الاقل الهند بقت دوله صناعيه واحدى نمور اسيا وكمان دوله نوويه .... احييييييييييييه
الهند اللي كانو ولازالو بيركبو فيله ...
شوفت يعم ... لكن حكومتنا الرشيده اخت بكار عايزانا نبقى زي شعب شونبونجو على اقل تقدير ....
وسلملي على جيمي مفجر ثورة التيييييييييييت

همس الاحباب يقول...

يا ريت يااسلام نبقى هنود
على الاقل بقوااحسن مننا وبيفهموا اكتر مننا بمراحل
اماالخصخصة سمك لبن تمر هندى
والكل بينهب ويسرق والسمسرة شغالة على ودنه وشيلنى واشيلك
وانسى اللى بتدرسه يا باشا
ولا تكلفة تاريخية ولا دفترية ولا قيمة سوقية بتتطبق
كله على الطريقة المهلبية
تحياتى
بس تعرف انا طمعان فى الفيل ممكن اخده لفة كده

سومه...مجنونه فى بلد عاقل يقول...

يييييييييييه ع الصبح بقى طيب نولى عصير تمر هندى ع النوته كالعاده

سومه...مجنونه فى بلد عاقل يقول...

بص يا ابيتاباتشان او اميتابتشان كلها فى نطاق العائله يعنى
ولا متبصش كله زى بعضه سلام بقى

جناب المهراجا الهندى سومه يقول...

بصفتى مهراجا كبير احب افهمك الاوضاع ماشيه ازاى الخصخصه صيغه مبالغه اشتقت من الخص والخص نبات يزرع فى الارض يحتاج لسماد والسماد مولع نار ومحتاج ميه ومكنه رى والمكنه ايجارها على ومحتاج بذور وطبعا البذور غاليه اذا لم تجد الحكومه مفر من اثنين يا تزرعه سريس وجعضيض وبرسيم يا تبيع الارض لناس معاهم فلوس الخص عشان يزرعوه
ولان اللى معاهم فلوس زراعه الخص هى الحكومه فالحكومه باعت للحكومه وعموما هى فى بيتها يعنى مراحتش بعيد والسلام عليكم ورحمه الله وبركاته
والله جاب الله خد الله عليه العوض

maha zein يقول...

قال هندي قال
انت فاكرني هندي يا عم انت
على فكرة دا انت كمان كلامك بيمثل فسوة من الحقيقة لكن اللى بيحصل العن واضل
بس هو ده الواقع
اللى هيجي يوم ويتغير
قريب ان شاء الله اكيد هيتغير
لان مفيش حاجة منذ الخليقة بتظل علي حال
اه وربنا
عموما انا هضطر امشي انا عشان الفيل بتاعي بدا يزهق من الركنة لوحده
سلامات
على فكرة انت دماغك عالية

اهو ده عيبه يقول...

ياحلوة ياولاد
ده اتارى الواحد لما بيبقى هندى مش بيحس بحاجه خالص
وبيلبس العمه بمزاجه كمان
لا والنكتة انهم فى القانون بتاع الضريبة العقارية الجديد عايزين يحاسبونا على القيمة الفعلية للعقارات مش قيمتها اللى اشتريت بيها
يعنى حلال ليهم حرام على غيرهم

يحضرنى القول الماثور للاخ هشام عباس :- نارى نارين

سلام يا سنجام

كـــيــــــــارا يقول...

معلش يااسلام علي التاخير بس كنت في اجازه تانيه واضح ان المشاكل ورايا ورايا

نيجي للبوست

اللي فهمته من الكلام ده فاكره اني اخدت في الاقتصاد حاجه اسمها التضخم النقدي

وده اللي انت قلت عليه في ان قيمه الجنيه بتقل لان الورق اللي بيتطبع ازيد من قيمه الدهب اللي في الارصده لو صح قولي لحسن ده فاكراه تشاش من حوالي 8 سنين

فاكره مستر عبد الحميد كان فهمني اللعبه دي بس مش فاكره التفاصيل اللي قالها عامه هما فاكرين ان الناس جاهله ومش فاهمه ومختومه لكن حتي لو الناس فاهمين مااحنا فاهمين اهو

قولي بقي يااسلام

عملنا اييييييه لما فهمنا ؟؟؟؟

enjy يقول...

مع انى كنت ادبى وعندى تاريخ مشرف مع مدرسين الرياضة وبطلع بالاحصاء مع ان تقديراتى جيد بس تصدق بالله؟؟؟ فهمت .. انا فهمت يا اسلام انت ليك السبق انك فهمتنى اى حاجة تتعلق بالارقام والحسابات والحاجات دى.... بس بما انى فهمت لازم اعلق وانا لو علقت هتغير فكرتك عنى عشان ممكن اقول كلام مش لطشيف خاااااااالص... بص انا هدى لنفسى فرصة ابلع الكلام واجى اعلق تانى يمكن اعرف امسك لسانى

enjy يقول...
أزال المؤلف هذا التعليق.
enjy يقول...

احم...سلاااااااااااامو عليكو... واحد سحلب فتلة يا ابنى... لا مغات فتلة اه منا هندية ولابسة السارى كمان ... ثوانى اركن الفيل... خلاص كله تمام ... نعلق بقى.. بص يا اسلام يا اخويا انا اتوصلت لحاجة مهمة جدا قوى خالص.. العالم دى مش معبرانا فى الجزمة القديمة عشان كدة مش بيهمهم انهم يمرروا لنا كلام ميدخلش عقل اى حد يعنى احنا مش مهمين لدرجة انهم مش بيخافوا اننا نقول ان دة غلط ودة ليييييييييييييييييييييه؟؟؟
اسم الله علييييك عشان احنا سلبيين وعايشين ناكل وبس ومرتاحين كدة ومش عايزين نتكلم والله والله انا كنت من فترة بعد تعليقك الاخير عندى عايزة اجى اقول لك لا يا اسلام اغزى الشيطان يا اخويا واستنى لما تشوف الحوار وبعدين قرر بس انا كدة ابقى هندية بجد لو اقنعت نفسى انى مصدقة الكلام دة اسوووووووووووووه يا اسلام لو تعرف حالتى النفسية من ام المجتمع الزبالة اللى احنا عايشين فيه دة كنت زمانك سافرت من زماااااااان حسن احباطى يعديك... حاجة تقرف والله العيب مش عليهم العيب عندنا احنا احنا اللى مبسوطين كدة ... كفاية كدة عشان لو قعدت اتكلم هخلص كلام على السبت الجاى وعليك خير....... طولت عليك معلش يللا سلام بقى احسن الفيل ياخد مخالفة واضطر ارشى البيه الظابط عشان يعديها

enjy يقول...

فى غلطة مطبعية فى التعليق انا كان قصدى ايوووووووووووه مش بالسين زى ما طلعت معلش اصلى كنت متغاظة وتقريبا مش شايفة قدامى.... اسلام انت شفت عاملين ايه فى المنشية؟؟؟؟
شفت الخراب اللى شوارعنا بقت فيه؟؟؟ شفت الباشوات اللى قاعدين على كل امة ومقفلين الشوارع؟؟؟
اسكندرية احتلوها ولاد ال......
انا لو منك تمنعنى من دخول البلوج بعد القلق اللى عملته لك النهاردة.. سلام

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
لنا عودة للتعليق علي بعض الموضوات بالمدونه الرائعه

قوس قزح يقول...

استنى اشد كرسى و اقعد و اطلب واحد لاتيه
بص يا سيدى من يومين كده جات الاخت مفروسة و قالت لى اسكتى هيبيع شركات البلد ..الله هو لسه فيها شركات .. المهم بالليل فى نفس اليوم على برنامج القاهرة اليوم جابوا كلام جيمى عن الموضوع و بردو مفهمتش يقصد ايه ..بعد كلامه ما خلص كان ضيف الحلقة سى محمودوالله رجل كده مبتسم و هادى النفس و قلت هيفهمنى بقى .. مسكوه يمين و شمال و كام شركة فاضلة و هنستفيد ايه .. قال ايه يا حلاوة يا ولاد الشعب هو اللى هياخد الفلوس دى لما يبيع حوالى 154 شركة و اللى هياخدوا هم الناس الغلابة و الناس ولاد الاغنيا لا دول كخة و اخدوا كتير من البيع قبل كده ..و قعد ساعة يشرح ازاى هيوصل للغلابة عن طريق البريد و دفاتر التوفير .. قلت حلو اوووى الشعب هيتنغنغ و يبقى فل الفل .. و فجاة قلت ده احنا 80 مليون طلع 10 اغنيا يفضل 70 و لو الشركة جابت 5 مليون مثلا اكمنها خسرانة وعدمانة
طيب هات صوابعك معايا كده و احسب
154× 5000000 ÷7000000 = هههههههههههه قول انت بقى هندى ولا مش هندى

هات الفيل هات

واحد من البلد دى يقول...

انا بعتذر عن التأخير بس و الله اول ما بلاقى فرصة انى اتنفس بدخل على طول
حتى لو مش بقدر اعلق لضيق الوقت
لكن بقرء البوستات الجديدة

تحياتى

الزباين

الزباين و يا رب ابعد عننا الضرايب