الأربعاء، 6 أغسطس 2008

الدنيا مدرسة و مفيش حد بيتعلم بالسهل بعيدا طبعا عن وزير التعليم



بصوا يا بشر

اولا بشكر كل حبابيى و اخواتى و اهلى و جرانى انا عاوز اخدكوا فى احضانى

(لا مش بتاعة عبد الحليم الاغنية دى : دى بتاعتى و هو اللى سرقها منى )


بما انكم دلوقتى حالا بتقروا البوست ده

اذا يبقى انا رجعت

اه رجعت

الحمد لله

بس اى نعم المواضيع اللى كانت خنقانى الحل فى الاخر طلع مش لصالحى و خسرت

بس كان لازم انهى اى موضوع حتى لو انى اخسر اى حد


و بما انى مصدوم اه و الله مصدوم بس عاتشى عاتشى خالص مالص

لانى عشان الموضوع ده ينتهى صليت صلاة استخارة و طلبت من ربنا ان لو فى صالحى يتم و لم مش فى صالحى ينتهى و ان ربنا يقدرنى انى ارضى عن اى مصير للموضوع

و انتهى بالفشل

معنى كده انه كان فى ضرر ليا

معنى كده انى كنت ماشى فى سكة غلط

معنى كده ان ربنا بعد عنى شر

معنى كده انى افرح ان ربنا بعد عنى الشر ده

معنى كده انى دلوقتى مصدوم من الفرحة عاتشى اه عاتشى خالص

و حهزر و حضحكم ان شاء الله اكتر من الاول

و اللى عنده كلمة يلمها


ايوه انا فايق لكم دلوقتى

دا بوست العودة

بس فى بوست ان شاء الله

ممكن دلوقتى او بكرة حفنن فيه

ان شاء الله يعجبكوا

ـــــــــــــــــــــــــــــــــــ

كان معكم العائد من الخنقة اسلام باشا الفرحان






8 قول و لا يهمك:

ندا منير يقول...

واو انا فرحانة ليك جدا جدا انك قدرت تتخلص من المشكلة اللى كنت بتمر بيها وان ربنا اختارلك الطريق الصواب
وبجد يا اسلام اللى يكون قريب من ربنا عمره ما بيغلط وربنا بيكون واقف جمبه دايما
وربنا يجعلها اخر مشكلة تمر بيها

والف مبروك على العودة

مهيج الجماهير يقول...

حبيب قلبى
مش قلتلك ؟
و عاوز أقولك على حاجة أنا ماشى بيها و مريحانى قوى
انى مزعلش على أى حد ولا على أى حاجة مهما كانت الظروف
و متتخيلش انا فرحان قد ايه انك رجعت تانى
تحياتى

appy يقول...

حمد لله على السلامه يا سكر انت مبسوطه انك قوي كده يا اسلام بجد

oRiGiNaL HeArT يقول...

ربنا يفرحك بجد
وخليك متاكد مدام استخارت ربنا يبقى اللى حصل دة فى صالحك
ومستنين البوستات الجديدة :)

يوميات نائمة في الأرياف يقول...

طبعا الف حمدا الله ع السلامة يا اسلام انا كنت واثقة ومتأكدة انك راجع راجع انشاء الله عقبال سمسمتي انشاء الله
بس طبعا لازم تحكيلنا
اية اللي بعدك
واية اللي رجعك؟
ها اية
ها ها؟

aya يقول...

طب الحمدلله انى دخلت بعد ما انت رجعت
كان هيبقى دمها تقيل لما ادخل القى المدونة مقفولة

على فكرة يا اسلام
كتير اوى مش بنبقى عارفين انه الشر او الحاجة اللى مش كويسة اللى حصلتلنا ديه منعت عنا ضرر اكبر

ربنا ده كريم اوى
ومش بيعمل فى حد حاجة وحشة ابدا

حمدالله على السلامة
ويارب دايما منور مدونتك
وملايها فرح وسعادة

بطوط حبوب يقول...

ايه ده يا اسلام؟؟ مينعش كده
احنا كنا خلاص قلنا مش هيرجع وزعلنا وانقهرنا وخلاص

تقوم ترجع تانى

لا مينفعش ... فكر تانى واختفى تانى

ههههههههههههههه
حمد لله على السلامه بس فكره برضه
:D

مواطن مصرى نايم يقول...

ندا منير
ـــــــــ
ربنا يكرمك يا رب
الف شكر بجد عالمتابعة
ادعى لى ان ربنا يصبرنى
بجد محتاج ان الكل يدعى



مهيج الجماهير
ـــــــــــ
يا حبيبى و الله انا مشكلتى بقى
انى مش بعرف اكبر دماغى
و اللى زاد عن كده
ان ده موضوع بجد كان صعب انى اكبر دماغى
و مازال صعب
بس انا بحاول اغلبة دلوقتى
الف شكر ليك



ايبى
ـــــ
ربنا يخليكى يا ايبى
و الله يسلمك
عارفة كله مش حيصدق انى بجد كنت فى قمة الخنقة يعنى و ما زالت شوية طبعا مش بالسهل انى انسى
محدش بقى حيقتنع انى فى حالة صعبة و لا عارف حاجة غيرك انتى
(وش بيغمز)


اوريجنال هارت
ــــــــــــ
ربنا يخليكى ان شاء الله ربنا يقدرنى
الف شكر بجد
مش عارف يا جماعة بس و الله اعمل اية معاكم



يوميات نائمة فى الارياف
ــــــــــــــــــــــ
الله يسلمك يا رب من كل سوء
انا فعلا و الله حزين على سمسمه
هى لو تعرف اللى انا كنت فيه
و ما زلت بحاول اتغلب عليه
ختعرف ان اى مشكلة بعد كده بسيطة
يا رب تعرف انى رجعت
انا رايح اقولها


ايه
ــــ
ربنا يخليكى يا رب
و فعلا عندك حق
الضرر ممكن يكون شال ضرر اكبر منه
الف شكر بجد
ربنا يكرمك



بطوط حبوب
ـــــــــــ
عارف يا حودة
انا و الله كنت حمسح البلوج فعلا
و فى ناس من المدونين كلمونى
بجد بشكرهم لان الكلام معاهم حتى لو لم يحل المشكلة
ريح نفسيتى
و الله لسه مخنوق بس اهوه بحاول ابان انى جامد
مش متعود انى اتكسر بسهولة
تحياتى يا جميل

و الف الف الف الف الف
شكر لكل اللى سأل عليا فى الغيبة و لما جيت و لما مشيت و لما وقفت و كل التحيات للحاج مرعى مورد المعسل للقهوة تبرع بتربة حشيش للبلوج مجانا
هدية لرجوعى

اسلام المخنوق سابقا

الزباين

الزباين و يا رب ابعد عننا الضرايب