الأربعاء، 23 أبريل 2008

الضرايب سبب النصايب



انا مش بحب اتكلم كتير
انتم مش ملاحظين ان من بعد ما ايرادات الضرايب زادت
و بقى بيدخل لوزارة المالية دخل عالى من الضرايب
الحكاية بقت دربكة على كل المصريين
و الاسعار ارتفعت
انا مش عارف اية العلاقة ؟
بس بجد انا لاحظت الحكاية دى
ــــــــــــــــــــــــــــــــــــــــــــــــــ
و محمد شومان عاوز ياخد فاتورة من الحلاق
بجد الناس المفروض تتجنن
ــــــــــــــــــــــــــــــــــ
شوفوا الفيديو ده حيعجبكوا جدا
هو عن اعلانات الضرايب

دول معايا فى الكلية

76 قول و لا يهمك:

ftafeet يقول...

ههههههههههههه الاعلان رهيييييب مش ممكن
العيال فظيعه بجد ربنا يحميهم دمهم شربات
بس بجد انا مش عارفه ليه اصلا بياخدو ضرايب من الناس مع ان عندنا فى الامارات مش ياخدو ضرايب وكده

هما الضرايب دى بياخدوها ليه بظبط


ميرسى بوست جامد


نوناااااا

ghoneem يقول...

باشا

جامد جداً بجد هموووووووووووووووووت م الضحك

كدة يابني انا هحسدك كل مرة أدخل عندك اضحك كدة مش هينفع

كمان زمايلك دمهم زي العسل وبالذات ابو نضارة اللي كان لازق علي يمين الشاشة بجد ضحكت جامد
سلملي علي ام تيتي
ههههههههههههههههههههههههههههههههه

تحياتي

بالتوفيق

الفارس الملثم يقول...

هههههههههههههه

فعلا بيقولك شر البلية ما يضحك ,واعلانات بتاعت الضرايب قمة المهزلة , يعني الواحد مثلا يجي يشتري فجل من بتاعت الفجل يقولها اديني فاتورة , عالم بتستهبل...

وفعلا كلامك صح هم يزودوا الضرايب من هنا والاسعار تولع اكتر , ولا عزاء للمصريين...

تحياتي

Yasser Hussein يقول...

صباح المعسل على معلم القهوة
:)
ضحكتني ع الصبح
صحابك دول ممثلين هايلين وعندهم مواهب اخراجيه رائعة
أنا اتفرجت على كل انتاجهم
أما بالنسبة لمحمد شومان
فأنا شايف إن الراجل ده بينتحر فنيا
لأن الاعلانات بتاعة الضرايب دي مستفزة جدا
ده غير أنها بتطلب أشياء غير منطقية بالمرة
ازاي أطلب من الحلاق فاتورة؟؟؟؟؟
خالص تحياتي

Tamer Nabil Moussa يقول...

مش لازم يخد فاتورة من الحلاق

عشان تخف علية هو

شغل بقى ههههه

تحياتى

mostafa rayan يقول...

حملةالضرايب الأعلانية في السنة الأولي اتكلفت 68مليون جنية وفي السنة الثانية33مليون جنيه - حسب تقرير روز اليوسف مجلة حكومة يعني - شوف هما بياخدوا فلوسنا يعملوا بيهاايه واذا كانوا صرفوا 101مليون جنيه علي الأعلانات طيب لموا كام واذا كانت الفلوس دي بتتصرف علي الأعلانات بس هل مستغرب الأسعار تزيد في كل حاجة
وحيد حامد كان له مقال في روز اليوسف بردة وانتقد الحملة وسأل سؤال منطقي ليه اعلان الحملة يتذاع
في الفضائيات وفي الأوقات المميزة لما هو اساسا بيخاطب المصريين وهل الحكومة بتاخد اموال المواطنين علشان تعمل بيها اعلانلات وهل المواطن بعد كدة ممكن يثق في الحكومة
ملحوظتك جميلةاحييك عليها

ٍSOU يقول...

طيب ماتنساش تدينا فاتورة الكومنت :))
عيال مسسسسسسخرة و الله ربنا يحميهم و يصورا كمان و كمان

Desert cat يقول...

ههههههههههههههههههه
جااااااااااامد
والله بيشرح حالنا والبلاوى اللى بنتعرض لها
ده البلد مشاركانا فى دخلنا
بس الولاد بامنة زى القمر
ربنا يحفظهم ويبعد عنهم الشديد القوى

مواطن مصرى نايم يقول...

ftafeet
شكرا جدا على التعليق الجميل ده
اما بالنسبة للامارات
دى عالم فى منتهى الرفاهية مينفعش نقارنهم بمصر
و هما هنا بياخدوا الضرايب قال يعنى حيصرفوا منها على الشعب
سلامى ليكى

مواطن مصرى نايم يقول...

غنيم
احسد يا باشا براحتك
و حاضر حسلم لك على التييتى نفسة
هههههه
سلامى ليك

مواطن مصرى نايم يقول...

Whispers just for a Night
انا روحت البلوج بتاعك
و مفهمتش اى حاجة من الموضوع ده
يعنى المفروض نعمل اية ؟
اصل انا غبى حبتين
سلامى ليك

مواطن مصرى نايم يقول...

الفارس الملثم
محمد
شكرا بجد دايما منورنى بتعليقك
شكرا جدا على التعليق و الزيارة
سلامى ليك

مواطن مصرى نايم يقول...

ياسر حسين
حبيبى
نورتنى بأول تعليق ليك فى البلوج بتاعى
و يا صباح السحلب و الحلبة و العناب
اما بقى بالنسبة للعيال
دول بيصوروا الفيديوهات بتاعتهم
الصبح بدرى جدا
بيعملوا مجهود بجد عشان يطلع الفيديو كده
دماغهم عالية
و محمد شومان اتشهر من الاعلانات
و هى السبب ان اجره يعلى
اما الفاتورة
دا الحلاق ممكن يغزنى لو قلت لك هات فاتورة
ههههه
سلامى ليك
و مبروك على الموقع

مواطن مصرى نايم يقول...

Tamer Nabil
خلاص بقى
لما اشترى باكو مناديل حاخد فاتورة
دى عالم بتستهبل و الله
شكرا يا باشا نورتنى
سلامى ليك

مواطن مصرى نايم يقول...

mostafarayan
بجد كلام جميل
و هما فعلا بيصرفوا كتيييير على الاعلانات
كتر خيرهم والله
عشان نتفوتر
نورتى يا باشا
تحياتى ليكى

مواطن مصرى نايم يقول...

ٍSOU
لا فاتورة ايه
انا هنا ضد الفواتير
ايون انا مش حبيع لحد تعليقات تانى
شكرا على التعليق و الزيارة
تحياتى ليكى

مواطن مصرى نايم يقول...

Desert cat
هو انتى بتدفعى ضرايب فى السيبر بتاعك ؟
هههههههههههه
و كمان متنسيش الفواتير كل واحد قعد على جهاز لازم و هو بيحاسب ياخد فاتورة
هههههه
سلامى ليكى

غير معرف يقول...

فعلااااااااااااااااا اثبتلي انو الصحاب لازم يكونوا مصايب زي بعض فكرتني بيا انا وصحابي كنا دواهي برضو بنعمل الحاجات دي كتير ربنا يحميكم ويخليكم لبعض

بس عارف ايه اكتر حاجة بحبها فموضوع الضرايب الاعلانات بتاعتهم

حلو البخور ده ماتبئيش تجيبي منو تاني
خخخخخخخخخخخخخخخ

بجد عسل

بس بص هى باظت اصلا مابئاش موضوع ضرايب استرها يارب استرها معانا والنبي يارب

مواطن مصرى نايم يقول...

نورة فينك يا بنتى بتختفى ليه
دا انتى كنتى مش بتقومى من على الكمبيوتر
ـــــــــــــــــــــــــ
دول مش صحابى دول معايا فى الكلية بس
واحد بس منهم اللى صاحبى
بس انا صحابى مصايب المصايب
يعنى لما بيتكلموا بس
ممكن تموتى على نفسك من الضحك
دا احنا بنعمل عمايل فى الكلية
بس بجد نورتى البلوج يا احلى نورة
سلامى ليكى

الشريف / جمال طة يقول...

ياولد انت شاب جدع وراجل

وسبق أن طلبت منك اتصالك بى تليفونيا

ولو نصف دقيقة بعدها اعرف رقمك واكلمك أنا
واليك رقم تليفونى 0104710778

تمنياتى لك بالتوفيق والنجاح والسعادة

zOzO يقول...

هههههههههههههههه
هههههههههههههههههههه
ههههههههههههههههههههههههههه


هستريا ضحك
طبعا جامد
بجد حلو
هنعمل ايه دا نصيبنا نعيش ويطلعوا روحنا هنا

ولو اتكلمنا هناخد فوق دماغنا
اهو نحاول
ويكفينا شرف المحاوله

واصحابك دول عسل
ربنا يبارك فيهم


وبعدين انت غريب اوي يعني الحكومه تصرف علينا
طبعا لازم تاخد ضرايب
عشانا مش بتوديها مكان بعيد
دماغك مش تروح بعيد


هههههههههه
هههههههههههههههه


تسلم ايديك انت واصحابك العسل دول
تحياتي

واحد من البلد دى يقول...

أنا مش حاقدر أعلق بكلام كتيييييير..خوفا من الضرايب..ولو قسمنا الكلمة لمقطعين حتبقى(الضر)بمعنى الضرر يعنى..و(آيب)بمعنى الرجوع...وذلك يعطينا معنى الكلمةكاملة(الضرر راجع)...يالا ورايا..راااااجع...راااااجع....راااااجع...كفاية كده...سلام يا إبن أختى

dina يقول...

بجد شكل المدونة يجنن و جوها تحفة...اتارى انا المفروض اخد منك فاتورة عشان دخلت المدونة هنا و سبت تعليق و كل اللى عندك فى القهوة لازم ياخدوا فواتير..افوترك ولا اظبطك
ههههههههههه

اوعى تفكر يقول...

لا جامده اوى الفيديو ده ماشاء الله عليه حاجه جامده اوى
انا عايز اعرفك انى انا ادمنت القعاد على القهوه دى لغاية ما خلاص
مش قادر اتحرك منها

اوعى تفكر يقول...

فين الفاتوره بتاعة المدونه دى

صحفية روشة يقول...

مين الناس دى
دول زمايلك
والله دمهم زى العسل انا ضحكت وقهقهت بصوت عالى والله
بس قولى بقة مين العبقرى اللى صمم الكليب دة
والله انا مش عارفة اقولك ايه
انا لو هتكلم عن البوست دة مش عاوزة تعليق
انا عاوزة بلوج بحاله
____________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية
____________________________
ميفوتكش البوست الجديد (اوزه سينى هدوم اروسه)

Empress appy يقول...

نيهاهاهاها
انا عاوزة اعرف انت مين فى دول
وبعدين افوترك ولا ايه مفهمتش التانيه وتصدق عيب نزلين تشتروا ميكى
خخخخخخخخخخخ

بص هو طبعا قانون الضرايب انا مش ضده لان بصراحه بتعود علينا بشويه حاجات مش كلها طبعا حاجات حاجات بس بينوبنا من الحب جانب يعنى رصف طرق وهدها تانى ههههههه
لا بجد الرصف الدعم مرتبات الموظفين ومننكرش انهم اوفر فى بعض حاجات
بس اسلوبك حلو كالمعتاد وقولت عليك دماغ

مواطن مصرى نايم يقول...

الشريف / جمال طه
والله مش حكاية دقيقة و الا نص
بس انا لما الامتحانات بتقرب
بيكون عندى فى البيت
محظورات
منها الموبايل
لانى مدمن موبايل
بس فى اقرب فرصة حكلمك ان شاء الله
و شكرا على تشريفك لى بالزيارة
تحياتى لحضرتك

مواطن مصرى نايم يقول...

zOzO
بجد يا زوزو
انا بشكرك على التعليق الجميل ده
و الحمد لله انه عجبك
بس لعلمك انا بشجع ان الحكومة بتاخد ضرايب بس نعرف بتتصرف فى ايه؟
و شكرا يا عسل على الزيارة
بجد نورتى البلوج
سلامى ليكى

مواطن مصرى نايم يقول...

واحد من البلد دى
و كمان بتقسم فى التعليق
قسم يا سيدى و سمعنا
الضرر راجع
هو راجع راجع لا محالة
بس لما يرجع اقوله مين سأل عليه ؟
سلام يا خال
بوس لى مودى

مواطن مصرى نايم يقول...

dina
نورتى البلوج
اول زيارة و عاوزة فاتورة
طيب طالما حتيجى تانى لو خدتى فاتورة
افوترك
هههههه
سلامى ليكى

مواطن مصرى نايم يقول...

اوعى تفكر
شكرا جدا على التعليق الجميل دا يا باشا
و اعتبر قهوتى هى قهوتك
دا انت تنورنى
سلامى ليك

مواطن مصرى نايم يقول...

اوعى تفكر
خلاص
افوترك و الا ازعبرك
هههههههه

مواطن مصرى نايم يقول...

صحفية روشة
نورتى البلوج
دول يا سيتى معايا فى الجامعة
بس مش صحابى
واحد بس اللى صاحبى
هما فى حقوق و تجارة
و هما اللى بيصمموا الحاجات بتاعتهم كلهم
و ليهم حاجات تانية كتيير
و جامدة جدا برضوا
تحياتى ليكى

مواطن مصرى نايم يقول...

appy
هههههههههه
لا و الله يا ايبى انا ما ليش دعوه
برئ من هذا الاعلان
انا مش فى الاعلان خالص
و هو بيقول افوترك و الا
(ازعبرك)
كلمة كده يعنى اطلع عينك
(ابهدلك)
كده يعنى
بالنسبة لميكى
اللى كان نازل يشتريها
اتضرب فى الاعلان
و اتبهدل
هههههههه
اما بقى انا مش ضد الضرايب نهائى
بس يكون فى حكومة رشيده
تقدر تمسك مسئولية الضرايب من غير
ما الشعب يتبهدل
انتى عارفة
فى فالمحاسبة حاجة اسمها الاهلاك
و ليها عده طرق للحساب
فى طريقة فيهم
لو اى شركة طبقتها بتخلى الشركة ما تخسرش حاجو وترجع لها فلوسها و تكسب كمان
انا ناسى اسم الطريقة
بس غالبا هى طريقة الاموال المخصصة
لو عملتى الاقرار الضريبى بتاعك بيها
يقولوا لك لا
اعمليها بالقسط الثابت
و دى بتخسر الشركة
و تخلى الضرايب تاخد فلوس اكتر
و فى اى حتة فى العالم ممكن تطبقى اى طريقة انتى عاوزاها الا فى مصر
شفتى بقى
دا عيب فى الحكومة مش فى الضرايب
سلامى ليكى
و مبروك على الظهور ان شاء الله فى قناة الحرة

مدحت محمد يقول...

ههههههههههههههه
انت مدونتك كلها تحفة والله
والتصوير والتمثيل والفكرة رائعة جدا
والضرايب مصلحتك عند ام التيتى
ههههههههههه
وسلملى على المترو
الف تحية ليك

مواطن مصرى نايم يقول...

مدحت محمد
يا حبيبى ربنا يخليك
شكرا انك مداوم على الزيارة
بجد بتنور البلوج
و حاضر دا انا اجيب لك ام التيتى تسلم عليها بنفسك انت تؤمر
ههههههههه
سلامى ليك يا باشا

غير معرف يقول...

ماهو انت لو معبرني كنت عرفت من لحظة ماالبوست اتكتب انما انت نايم على ضهرك خخخخخخخخخخخخخخخخخخخ

نورت هناك وهنا كمان

اهو ده عيبه يقول...

الضرايب مصلحتهم اولا

انا بعد كده مش حمشى غير وفى جيبى دفتر الفواتير واى حد اشترى منه حاجه هفوتره على طول

الا هما الساده العملاء فى مصلحه كبار الممولين بيدوا فواتير برضه؟
وهل الناس دى بتتحاسب زى الممولين الغلابه ولا دول الحساب بالنسبة لهم يوم الحساب وبس؟

micheal يقول...

بما أنهم معاك في الكليه فسلمي عليهم أوي أوي و قولهم أني عاملهم
subscribe l psycommody
من زمان ع اليوتيوب و أنا متابع كل أعمالهم و ده أشدهم حتي الان
تحياتي

Ahmed Al-Sabbagh يقول...

هههههههههههههه

تعرف

شومان جه فى الجرايد وقال

انا بطلت اعمل الاعلانات دى عشان اكتشفت ان الحكومة بتنصب على الناس

ههههههههههه

تحياتى

احمد الصباغ

رامى اشرف يقول...

يا جماعه مفيش شىء فى البلد دى مظبوط والفساد موجود فى كل قطاع فى البلد دى بما فيها الضرايب دنا اساسا دمى بيتحرك من العلانات وتخلف ايه بتاع فاتورة الحلاق دى حاجه تجن والله قمه السخريه من عقولنا سيبين الوحوش وشراكات المحمول والناس الى بتبعزق ملاين على الفنانين والمطربين الى موش نقصين فلوس اساسا وجين يقولو فاطورة من الحلاق بعيدن عن تفكير فى عادات عندنا ان دا عمرة ميحصل شىء متخلف انا اتخنقت بجد

Ehab يقول...

يا معلم انت
عايز ايه بس من الضرايب اللي هتبني بيتك وتربي عيالك
هههههههههههههههههه
مش عارف حاسس بعد كده هيقولولنا ان الضرياب هي اللي هتدلعنا وتهشكنا وتودينا حمامات السباحه كمان علشان تبقى العيشه فله
قال ايه ناخد فاتوره من الحلاق
طيب انا لو قلت لسيد الحلاق عايز فاتوره مش بعيد يخلص عليا بالموس
هو اصلا بيجيب صابون نحلق بيه بالعافيه هاقوله هات فاتوره ايه بس


نورتني جدا في المدونه وفرحت بوجودك قوي وضحكت كتير على تعليقك الفقري
واتمنى فعلا نكون اصدقاء وتنورني على طول
علشان نزود العنصر المذكر في مدونتي لحسن بيقولا اني معظم اللي بيعلقوا عندي بنات
طيب وانا اعمل ايه بس اصلا معظم المدونين بنات نسبة البنات بقت كتير قوي
شد حيلك بقى وبقيت الرجاله المدونين معانا علشان هم كده هياكلونا

سعيد بمعرفتك يا كبير
سلااااااااااااااااااااااااااام

Ahmed El-Agouz يقول...

بجد ضحكتني
فيديو جامد
ربنا يسعدك

*****واهم حاجة انك تتفوتر لحسن
العجوز
اتمني ان نتواصل دائما

غير معرف يقول...

بكره يعملوا ضرايب على الكلام علشان الكل يخرص

مواطن مصرى نايم يقول...

نورة
انتى مشكلة
و الله انا بدخل على طول و مشفتش
انتى نزلتية امتى
اكيد نزلتية بعد ما انا خرجت من البلوج على طول
يالا خيرها فى غيرها
سلامى ليكى يا لماضة
ههههههههههه

مواطن مصرى نايم يقول...

اهو ده عيبه
فعلا الضرايب مصلحتهم اولا
و الكبار كبار محدش يقدر يجيب سيرتهم
ابدا
دول عالم
(محترمة)
ربنا
(يعنهم)
تحياتى ليكى ودايما منورانى

مواطن مصرى نايم يقول...

micheal
اوك يا مايك
حوصل لهم السلام و الله
اول ما اروح الكلية
بس فى اعلان تانى جامد برضوا بتاع مانتن ديو
حلو برضوا
سلامى ليك يا جميل
دايما منورنى

مواطن مصرى نايم يقول...

Ahmed Al-Sabbagh
عارف يا صباغ
شومان عقده لسه مع مصلحة الضرايب مخلصش
هو متعاقد لحد اخر 2008
على ما اسمع يعنى
بس لو قال كده
يبقى حيتظبط من اللى بالى بالك
و حيطلع فالاخر من المتهربين من الضرايب
هههههههه
سلامى ليك و دايما منورنى

مواطن مصرى نايم يقول...

رامى اشرف
اولا نورتى باول زيارة ليك
ثانيا
لعلمك زى ما فى فساد فى ناس شريفة كتييير
بس الفساد بيغطى على الحاجات الكويسة
و لازم تاخد فاتورة من الحلاق
انت حر
لقد انعر من ازعر
ههههههههه
سلامى ليك

مواطن مصرى نايم يقول...

الشنكوتي الكبير
ههههههههههههههههه
نورتنى باول زيارة ليك
متقلقش دا انا حلزق فى البلوج بتاعك بعد كده
ان شاء الله
عشان نكون اغلبية
و بعدين حكاية ان الضرايب هى اللى حدلعنا و تهشتكنا
ممكن يعملوا على كل اقرار ضريبى رحلة لدريم بارك هدية
عشان الناس تقدم الاقرارات
و اهو احمد بهجت حبيبهم
ههههههههههههه
سلامى ليك نورت البلوج

مواطن مصرى نايم يقول...

Ahmed El-Agouz
نورتنى يا عجوز
و الحمد لله ان البوست عجبك
و ان شاء الله
نتواصل على طول
سلامى ليك

مواطن مصرى نايم يقول...

hend...hanady
لا الكلام بيعملوا عليه رقابة
زى ما احنا عارفين ان اللى بيتكلم
بيروح .........فين ؟
احنا غلابا ربنا يبعد عننا عيونهم
نورتى البلوج
سلامى ليكى

إخوانى حتى النخاع يقول...

جميل أوى أوى الإعلان دا


الضرائب مصلحتك أولا


تشكر يا باشا على البوست

موناليزا يقول...

بما ان الفيديو مرضيش يتحمل فهعلق على كلماتك بسؤال
ياترى المليارديرات بيدفعوا ضرايب برضه؟

مواطن مصرى نايم يقول...

إخوانى حتى النخاع
انت اللى جميل
و نورت يا عسل
سلامى ليك

مواطن مصرى نايم يقول...

monaliza
عارفة هو السؤال له شقين فى الاجابة
على حسب نوع الملياردير يعنى
واحد زى عز معتقدش انه بيدفع المبلغ اللى هو المفروض يدفعة
و واحد زى ساويرس
اعتقد انه بيدفع بس بيكرموه
عشان هو ماسك جزء هام من اقتصادنا
اما عمنا احمد بهجت
فكما اشاع بعض الناس فى فترة انه شريك
جمال و علاء مبارك
و هكذا يعنى
نورتينى
سلامى ليكى

مواطن مصرى نايم يقول...

موناليزا
انا و الله حاولت افهم الاستاذ صاحب البلوج اللى فيه الموضوع
عايزنى اعمل ايه بس شعرت انى غبى
بس ححاول افهم المرة دى
سلامى ليكى

سبهللة يقول...

هههههههههه
ضحكت من قلبى
بس حلو ام التيتى دى
بالتوفيق ان شاء الله
تحياتى

مواطن مصرى نايم يقول...

سبهللة عالآخر
اولا نورتنى باول زيارة
و يا رب تضحك على طول
و انت الاحلى
مش ام التيتى
تحياتى لك

رامى اشرف يقول...

شكرا لتعليقك فى مدونتى يا نجم
نورتنى بس للاسف فعلا انا محبط جدا لان موش عارف بعد كدا ايه بينى وبينك فى ايجابيات كتير حصلت بس احنا بنتكلم فى تغيير شامل لنظام الحكم من وجهه نظرى مفيش حد قادر عاليه ولا اى قوة معارضه لان قوة المعارضه الوحيدة دلوقت فعلا هما الشباب الباقى معارضه من اجل المعارضه لعب بعوزاطف الشعب لمكاسب شبه شخصيه فاهمنى
وعلى فكرة انا اخت من عندك بعض الصور عجبتنى موت
سلامى ليك يا نجم

مواطن مصرى نايم يقول...

رامى
يا جميل
لا يغير الله ما بقوم حتى يغيروا ما بأنفسهم
دى تلخص كل شئ
اما بالنسبة للصور
انت تاخد اللى انت عاوزة يا جميل
و ديما منورنى
سلامى ليك

أبو نزار عبد الرحمن الشرقاوى يقول...

كليب بديع جدا حاولت اطبع السايت عشان أحمله من يوتيوب ومش عرفت يا ريت مشكورا تبعت ليا السايت بتاعه أو تعرفنى أزاى ممكن آخده

مواطن مصرى نايم يقول...

ابو نزار
نورت البلوج
لو حضرتك عاوز الكليب على اليوتيوب
اعمل سرش على اليوتيوب
و اكتب
إعلان مصلحة الضرائب الممنوع من العرض
حتلاقى الكليب على طول
سلامى ليك

حاجات جوايا يقول...

هههههههههههه
شطار والله
بس الحكومة دى يعنى المفروض توفر تمن الفواتير
مش الفواتير دى بفلوس برضه ولا ايه
بلاش بعزقة بقا فى الهالك كده

حكومة ورق صحيح

أخبار المذاكرة ايه ؟
بالنجاح ان شاء الله

دمت بخير اخى
سالى

مواطن مصرى نايم يقول...

سالى
سلامى ليكى
و شكرا على التعليق الجميل ده
و فعلا صحيح مين اللى حيدفع ثمن الفواتير ؟
اكيد احنا برضوا
يالا حسبى الله و نعم الوكيل
و الحمد لله اهوه شغال فى المذاكرة
ربنا يسهل الترم ده
شكرا على السؤال
تحياتى

la3lahakhier يقول...

ههههههههههههه
منك لله
ايه ده ؟؟
لالالا انا لااوافق انتوا بدمروا الاعلانات كمان لالالالالالالالالا دا اضطهاد واضح وصريح
ههههههههههههههههه
الا انت بتدى فاتورة على الشيشة دى ولا لا انت كمان
تحياتى يا مواطن

Asmaa mahaba يقول...

ههههههههههههههه انا حطلع اجرى من هنا قبل ما البسها
تحياتى ليك سومه_87

مواطن مصرى نايم يقول...

la3lahakhier
يا سلام كل الغيبة دى
احنا عشان خاطرك
لازم ندى فواتير
دا انتى نورتينا
هههههههه
سلامى ليكى

مواطن مصرى نايم يقول...

somaa
ههههههههههههه
لا متقلقيش
لو حد مسكك
انا حعترف عليكى على طول
هههههههههههه
سلامى ليكى

أشرف حمدي يقول...

برافو
برافووووووووو
تعرف بقى ؟؟؟ العيال دي مش بس جامدة ، لأ فاهمة اخراج كمان
عجبتني جدا القطعات وأسلوب التصوير ، ده تقريبا أفضل ما يمكن الحصول عليه من كاميرا ديجيتال صغيرة
الفكرة كمان جامدة جدااااااااا
والنهاية (القفلة يعني ) مظبووووطة
هو ده الشغل

انا بقى عندي فكرة وعملتها في كاريكاتير من فترة
عن الراجل اللي راح شقة مشبوهة ونسى ياخد الفاتورة من مدتشيحة
ايه رأيك ؟ :)))

أشرف حمدي يقول...

هههههههههههه
علي فكرة لما الراجل بتاع الضرايب كان بيتكلم ، الواد اللي كان عاوز ياخد الفاتورة كان بيعمل بيعبر بإيده حلو جدااااااا
بليييييييغ
ههههههههههههه يخرب بيوتكوا يا مجانييييييين

مواطن مصرى نايم يقول...

أشرف حمدي
ههههههههههه
حبيبى يا اشرووووووف
واحشنى جدااااا
فينك مختفى ليه
انا قلقت عليك
الحمد لله انك كويس
و على فكرة انا شفت كل الكاريكاتير بتاعك اللى على موقع ماشى
و كان باين من ضمنهم الكاريكاتير
اللى انت بتقول علية
و موتنى من الضحك
جااامد جدا برضوا
تحفة سلامى ليك

مواطن مصرى نايم يقول...

أشروووووووف
هههههه
نسيت ارد على حركة الواد اللى عاوز ياخد فاتورة
هههههههههه
هو انت خدت بالك
دا عيل مشكلة
تحياتى ليك

سالي محمد يقول...

حلو اوى موت جدا خالص بالهبل ومن الاخر انا واختى وقعنا على الارض من الضحك انا حتفرج تانى اشوف حركه ايه اللى بيقول عليها الناس دول
انت شاطر كده ليه؟؟؟

مواطن مصرى نايم يقول...

سالى

ربنا يخليكى انا مش شاطر و لا حاجة
دا انتى اللى بتجاملى
بس بلاش حكاية الحركة دى
اصلها عيب
نورتينى انتى و اختك
eslam

الزباين

الزباين و يا رب ابعد عننا الضرايب