الاثنين، 16 فبراير 2009

فيلم الكيت كات بين السينما و الواقع المهبب

بقالى فترة مش عارف اكتب

و خصوصا بعد وفاة محمد الفارس الملثم

بس حاولت اكتب اى حاجة

و لقيت موضوع جه على دماغى كده

بجد اول مرة اخد بالى منه

ـــــــــــــــــــــــــــــــــ

كلنا نعرف فيلم

الكيت كات

بطولة
محمود عبد العزيز

لما كان طالع اعمى

كان اسمه
الشيخ حسنى

ــــــــــــــــــــــــــــــــــ

تذكرت مشهد فالفيلم خير مثال على حال البلد حاليا

=========

المشهد اللى كان نفسه يركب موتوسيكل و هو اصلا اعمى

و صمم انه يركب

الموتوسيكل

و ركبه بردو

و نتيجة لانه اعمى

و كمان اول مرة يركب موتوسيكل



عمل حادثة و خبط فالحيط

و بهدل الدنيا

ــــــــــــــــــــــــــــــــــــ

ايه بقى علاقة المشهد ده بحال البلد

~~~~~~~~~~~~~

اولا

~~~~

كان محمود عبد العزيز

طالع اسمه الشيخ حسنى

بركاتك يا ريس

و له فى ذلك حكم

و لله الامر من قبل و من بعد

و إنا لله و إنا اليه راجعون

و اقعدوا بالعافية

ــــــــــــــــــــــــــــــ

ثانيا

~~~~

ركب الموتوسيكل و صاحب الموتوسيكل كان مش موافق

و اللى ماسك البلد ماسكها من غير ما حد فينا يوافق بردو

( بس يا ترى كان ماسك البلد منين بالظبط؟؟)
سؤال يطرح نفسه
لا لا مش من زورها



ما عدا اختى هى الوحيدة اللى موافقه عليه و الله

مش عارف ليييييييييييييييه

ــــــــــــــــــــــــــــــ

ثالثا

~~~~

كل الناس فالفيلم كانت خايفة منه و هو سايق الموتوسيكل

و اللى ماسك البلد كل الناس خايفة منه و هو ماسك البلد

(اكيد اللى ماسك البلد مش دراكولا يعنى بلاش ظلم بقى)
لأن فى فرق بين مصاص دم الشعب
و مصاص الدماء العادى


ـــــــــــــــــــــــــــــ

رابعا

~~~~

طول ما هو سايق الموتوسيكل كان بيخبط الناس و بهدل الدنيا

و اللى ماسك البلد بيخبط فالشعب و مبهدل الدنيا



(حد قال للشعب يقف قدامة - امشى من قدامه عشان متتخبطش)

ـــــــــــــــــــــــــــــــ

خامسا

~~~~

كانت نتيجة كل ده فى الفيلم حادثة فالاخر و الموتوسيكل خبط فالحيط

و حال البلد قرب جدا جدا من الحيط و قربت جدا الحادثة

اللى بشايرها بدأت تهل

و سمعونا زغروطة كده تجلجل

و احتمال اشوفكم على خير

(معتقدش بعد البوست ده ممكن نتقابل اصلا)

ـــــــــــــــــــــــــــــــــ

كفاية كده عليا بقى

لسه

محمد عادل بيتحاكم

و احمد دومة فالسجن

اتحكم عليه سنة سجن

لما يخرجوا

ابقى انا ادخل بقى




سلام يا بشر
take care


Eslam

53 قول و لا يهمك:

Mohamed يقول...

هههههههههههههههه
و الله عندك حق فعلا
الله ينور عليك

مواطن مصرى نايم يقول...

نورنتى يا محمد
شكرا ليك

تحياتى

رئيس جمهوريه نفسى يقول...

ربنا يحزك يا شيخ ويضحكك زى ما ضحكتنى بالبوست دة المقارونه والتشابه فى الجون

Appy يقول...

قررت انا ابى هانم
القبض على صاحب القهوه دي علشان ظلم الشي حسنى اللى فى الفيلم قلى ليه قل وانا اعلقك قول
هقول انا من غير ما تسال
بتاع الفيلم كان هنده سينس وبيفهم ههههه

مواطن مصرى نايم يقول...

حودا باشا حبيبى اجدع صعيدى
واحشنى جدا يا باشا
و الله هى الحكاية هم يبكى و هم يضحك
بلدنا مليانه هموم
الاغلب منها نضحك عليها من قلة الحيله
و الحمدلله ان البوست عجبك يا ريس

مواطن مصرى نايم يقول...

ابى هانم بتنجانى انا برئ و الله انا مليش دعوة بقى هو انا اللى كتبت الفيلم
انا اتفرجت بس
و الا اليومين دول بياخدوا اللى بيتفرجوا
بس الشيخ حسنى فالفيلم الناس كانت بتحبة و كان بيفهم جدا و بيشوف كل حاجة رغم انه اعمى

ما بالك بقى واحد مش اعمى بس مش بيشوف و لا حاجة
و مفيش حج بيحبه

ربنا عالظالم

وينكى يقول...

لولولولولوليييي
وادى احلى زغروطه من عندى
وبالصاجات كمان
:q
مش ده فرح ابن العمده برضة؟؟؟
انا مابتكلمش فى الشيكو شيكو يا ريس

marmar يقول...

حمااااااده
يعني تستغل اني في الجامعه وتنزل البوست من ورايا هااااااااااا
مااااااشي
هو في فرق بسيط اوي ما بين الفيلم وما بين الواقع ان الفيلم كان قصه خرافيه اتكتبت من قبل الكتاب عشان يعملوها فيلم يتعرض للناس ويفهموه
اما الواقع الأليم بقى
قصه حقيقيه اتكتبت من قبل الشعب الغلبان واتعرضت غصب عنهم وعن تمانين مليون مصري عشان يضحكو على خيبتهم من غير ما يفهموه كمان

فرق كبييييير
بوست جامد وموضوع سياسي حواري اجمد واجمد واجمد
ووحشتني اجمد من كوووووووووووول دول

mohamed ghalia يقول...

أولا حمدا لله على السلامة
ثانيا عندك حق محمد الفارس عمل فجوة كبيرة
ثالثا مش عارف مبيعرفش يسوق بيركب ليه
رابعا زعلان لانك محضرتش إفتتاح مدونة نظرة
دمت بكل الود أخى

كيــــــــــــارا يقول...

اعمل حسابسي بقي في عيش وحلاوة :)

عالم حبيب يقول...

الله يرحمه محمد

تحليلك بين المشهد من الفيلم والواقع تحليل عشرة على عشرةةة

فتح الله لك : )

مهندس مصري يقول...

معاك حق

enjy يقول...

حمدالله عالسلامة يا اسلام باشا نورت الدنيا.......حلو اوى البوست وظريف كالعادة هم يضحك

maha zein يقول...

يا ربي
يا ربي بجد عليك
ليك وحشة فوق الوصف
تعرف اني انا بقالى يجي عشروميت سنة مبدخلش النت
ولا اعرف مدونتي عفنت ولا لسة
كيتكات
كيتكات يا ظالم
ما البلد حلوة وعال العال اهه
عاوز ايه يا شرير
عاوز تركب موستليك
بردو مش هتركب
وبعدين شكلك مغلول انت ومتغاظ من ساعة لما الموستليك خبطك وبهدلك وطيرك
صح ولا ايه
انهار يا احمد انا عارفة
يلا مش مشكلة
خليها علينا المرة دي
بس صدقني الانتخابات الجاية
الشيخ حسني هيقول لابنه ائزح ورايا يا جمال ائزح
قول يا رب الموستليك ياخدهم ويئزح بيهم
قول امين

نهر الحب يقول...

نورت المحكمة
اية الربط دا
ازاى جة فى دماغك ؟؟
بس عارف دى من عجائب افلامنا

زيزو باشا يقول...

أنت فين ياراجل؟ حقيقي وحشتنا تعليقاتك وخفة دمك؛ بالله عليك بلاش الغيبة الطويلة دي

أيمن بدر يقول...

جميلة الملاحظة دى يا أبو حميد
بس الفرق بينهم ان الشيخ حسنى كان اعمى
انا اسف على الانقطاع والله غصب عنى نفسى ارجع اتابع زى الاول وهيحصل ان شاء الله لانى هصفى المدونات الكتير اللى عندى واتفرغ للناس اللى عجبانى كتاباتهم بس
مستنيين جديدك
انت عارف احلى حاجة فيك ايه
ان اسمك أحمد ودلعك إسلام
على اسم إخواتى الاتنين
سلام يا صاحبى

norahaty يقول...

السلام عليكم ورحمة
الله تعالى وبركاته
كان نفسى ياأفندم
انفذ الكلام واسمعك
الزغرودة أو الزغروطة
مثل ما كتبتها انت لكن وفاة محمد الفارس مزعلانى ومنعانى من تنفيذ الامر
وكمان عايزة اقولك تصدق وتؤمن بالله
عدد المرات اللى الفيلم ده جه فى الدش او فى التلفزيون العادى انا ما شفته ولا مرة كامل على بعضه لاما حته فى النص او فى الاول او فى الاخر (والحتة )
بتاعة سواقة الموتوسكل او متهيأللى الفسبا دى شفتها فعلا لكن عجبتنى
اكتر لما عملها (آل باتشينو)فى فيلم
(عطر أمرأة=woman scent)بصراحة هو
الاصل وعلى الاصل دور على رأى عمنا
محمد طه الله يرحمه ويرحم امواتنا جميعا
واخر حاجة اقولها لك لو لا قدر الله حصل حاجة واتقبض عليك ابقى ابعت وقولنا
...........نخلى بالنا بس مش اكتر:)

dr.lecter يقول...

عليا النعمه اول مرهاخد بالي من ده

يالهوي انا مالبيش دعوه يخرب بيت دااود عبد السيد هو ومحمود عبد العزيز هيودونا في ابو نكله

صدى الصمت يقول...

كدة تمام قوى
ربنا يتولاك برحمتة ويكون فى عون ال بتحبك
تحياتى

مواطن مصرى نايم يقول...

وينكى
=======
ههههههههههههههه
الفرح خلص يا وينكى
و ابن العمدة طخوه فالفرح
و العروسة اتجوزت العمدة

اهوه بعيد عن الشيكو شيكو اهوه

مع انى لو اتمسكت حقول انك كنتى عاوزة تغنى قصيدة نام يا مصرى
ههههههههههههههه

p:

مواطن مصرى نايم يقول...

ريموووووووو
===========

((يعني تستغل اني في الجامعه وتنزل البوست من ورايا هااااااااااا
مااااااشي))
--------------
بذمتك انا استغليت انك فالجامعة
اذا كان انتى اول حد شافة
و كمان قلتى لى على حاجات اعدلها و عدلتها
و الصورة اللى قلتى مش تنزلها
--------------
((هو في فرق بسيط اوي ما بين الفيلم وما بين الواقع ان الفيلم كان قصه خرافيه اتكتبت من قبل الكتاب عشان يعملوها فيلم يتعرض للناس ويفهموه
اما الواقع الأليم بقى
قصه حقيقيه اتكتبت من قبل الشعب الغلبان واتعرضت غصب عنهم وعن تمانين مليون مصري عشان يضحكو على خيبتهم من غير ما يفهموه كمان))
---------------
و الله يا قمر لخصتى الوضع كله فالجملة دى
عندك حق فعلا يا ريمو
بس و الله فى ناس بتفهم و بتعمل نفسها مش فاهمه لمجرد انهم بيخافوا
غلبتينى بكلامك اللى جمل من البوست و الله يا ريمو
---------------
((بوست جامد وموضوع سياسي حواري اجمد واجمد واجمد))
---------------
و الله العظيم تعليقك اجمل من البوست و الا بوستاتك اللى الواحد بيعجز يكتب فيها اى تعليق لانى عارف مهما علقت مش حدى البوست حقة و الله من جماله و رقته و الاسلوب الرائع يا قمر و الله
و ده اكيد كله يرجع لدماغك الكبيرة و قلبك الابيض و رقتك
---------------
((ووحشتني اجمد من كوووووووووووول دول))
---------------
سيبك انتى بقى من كل ده
انا اصلا منزل البوست و الله و الله عشان انتى قلتى
و قعدت افكر فبوست عشان كلامك و الله
و ديماااااا وحشانىىىىى يا قمر و الله
(k)--(;

مواطن مصرى نايم يقول...

mohamed ghalia
================
الله يسلمك يا رب
و الله فعلا محمد اثر فينا اووووووى
ربنا يرحمه و يغفر له يا رب
و انا عارف انى مأثر معاك و الله و الله اسف بجد
و مكنتش اعرف بموضوع المدونة الجديدة دى و الله
و الله بقالى كتير مش بدخل و لا بلوج و الله من ساعة وفاة محمد بالذات
نفسى مش جايه خالص للتدوين
بس بدأت افك شوية اهوه
و ربنا يسهل
و متزعلش منى انت و الله ديما بتفتكرنى و انا بقصر معاك

مواطن مصرى نايم يقول...

كيــــــــــــارا
===================
شوفى حد يقف بقى فطابور العيش
و انا حجيب الحلاوة

مواطن مصرى نايم يقول...

عالم حبيب
==========
و الله ربنا يفتح عليك انت انا زورت بلوجك كده عالسريع بس ليا عودة عشان اعلق و اقرى بوستاتك اللى فاتت
نورتنى بزيارتك

مواطن مصرى نايم يقول...

مهندس مصري
===========
مش كده و الا ايه بس يا رب يفهم بقى

مواطن مصرى نايم يقول...

enjy
=====
دا نورك يا انجى و الله
و الله يسلمك يا رب
و البوست يجى جنب مقالاتك ايه بس
ديما منورانى
بس كالعادة انا مش حابب البوست و الله

مواطن مصرى نايم يقول...

maha zein
===========
اييييييه يا دكتور
فينك بس
و ايه اخبار الرسالة
ربنا معاكى يا رب
و بعدين هو مش موتوسيكل فالفيلم بقى هو كان فيزبا بس انا قلت موتوسيكل عشان فى ناس مش بتفهم يعنى ايه فيزبا

يعنى ليس لى اى عداء معاه نهائى
هههههههههههههههه

و بعدين دول مش عاوزين موتوسيكل بس
دول عاوزين قطر يعدى على رقبتهم و الله

مواطن مصرى نايم يقول...

نهر الحب
==========
المهم ان الحكم يكون فصالحنا فالاخر مش ننور المحكمة و خلاص

و الله الربط ده جالى و انا نايم و الله
و كان ربط بين الاسم بس
و بعد كده كبرت فدماغى بقى

الفيلم ده بغض النظر عن البوست هو فيلم رائع بجد
لان محمود عبدالعزيز ابدع فدور الاعمى و شريف منير كان فى بدايتة و بالرغم من كده تألق فالدور بردو

من كنوز السينما المصرية بجد

مواطن مصرى نايم يقول...

زيزو باشا
===========
و الله و الله واحشنى جداااااا
و الغيبة دى و الله كانت بسبب الامتحانات و سبب وفاة احد المدونين
بس و الله مفتقدك جدا و ححشنى الكلام معاك
ايه اخبارك و اخبار ابن حضرتك يا رب تكونوا بخير

مش لازم تتعب نفسك و تكتب بالعربى انا عارف ان عندك مش بيكتب عربى

ابقى اكتب انجلش و انا حفهم بإذن الله

نتكلم قريب ان شاء الله

مواطن مصرى نايم يقول...

أيمن بدر
========
مون حبيب قلبى و الله وحشتنى تعليقاتك
ان شاء الله ترجع زى الاول و تتحفنا ببوستاتك بجد اللى بتعجبنى جداااا
و انت من اكتر المدونين احتراما و اخلاقا بجد
و ديما كده منورنى يا رب
و ان شاء الله نتقابل تانى فلقاء بردو زى المرة اللى فاتت

مواطن مصرى نايم يقول...

norahaty
=========
و الله يا دكتورة انا بردو مأثر فيا جدا وفاة محمد
و الله و هو سبب كبير انى معرفش اكتب اى حاجة من ساعة رجوعى من فترة الامتحانات
ربنا يغفر له يا رب و يجعل مثواه الجنه

اه هى كانت فسبا بس فى ناس مش بتعرف يعنى ايه فسبا
فقولت موتوسيكل عشان يبقى الكلام عام
و حشوف الفيلم ده حدور عليه عشان اشوف المشهد ده بجد

و حبقى اقول لكم لما اروح المعتقل حاضر
بس لو ساعتها عرفت اتكلم اصلا
ههههههههههه

مواطن مصرى نايم يقول...

dr.lecter
===========
و الله مصدقك انك اول مرة تاخد بالك
لانى كمان انا اول مرة اخد بالى بس دا نزل عليا الوحل و انا نايم و الله
هههههههههههه
و يا عم احنا فحالنا ملناش دعوة بحاجه عندهم محمود عبدالعزيز يروحوا يسجنوه هو احنا مالنا بقى

انا دخلت عندك البوست طويل جدااااااا اخر بوست
قريت جزء منه و حرجع اقرى تانى
لحد ما اخلصه لانى مش بحب اعلق من غير ما اقرى

منورنى

مواطن مصرى نايم يقول...

صدى الصمت
==========
ههههههههههههه
اه كده تمام فعلا
و ربنا يتولانى و الله
و الله و اخدت توصيه جامده انى أأقل فالكلام فالسياسة
منورانى ديما

Zanooba (Zeinab sab9n) يقول...

ههه معاك حق يا إسلام ...ربنا يستر عليك عموماً العبدة لله على كامل الإستعداد تزورك في السجن بعيش وحلاوة!! و ربنا يرحم محمد إن شاء الله
مستنيين جديدك
آه على فكرة أنا أخوية بيؤيد الريس مش عارفة ليه لدرجة عشان يغزني علق صورته في الأودة غصب عني!! كفاية كده بقى عشان منتبهدلش
سلاااااام

كيكى يقول...

ياااااااااااااااااة وانا كل ده استغرب من اسم البطل محمود عبد العزيز عبيبى عبيى
مممممممممممممممممممممممممم
لقيت الزر الخطير دة عندك**
بس الفرق انم الشيخ حسنى ركاب موتسكيل
ام الله يحفظنا راكب توك تك صنع فى مصر**
ماعلينا
بجد مش عارفة ازاى جبت الموقف دة والى احنا فى
دمااااااااااااااااااااااغ
ساااااااااااااء الخير يامعلم
عووووووووووووووووووووووو

سميرة يقول...

والله بالنسبةللفيلم انا بحبه جدا
بس الفيلم ساعتين وبيخلص
ولو مش عاوز تكمل انت حر
ممكن تقفل التليفزيون او تقلب على حاجة تانية

ودا الفرق بين السينما والواقع الاليييييم
طبعا انت فاهم قصدي :)))

بس انا بحب المشهد اللي بيتكلم فيه في الميكروفون اكتر
فضايح يعني

انا مبسوطة انك رجعت للتدوين مرة تانية

اه ملحوظة صغننة
ركوب الموتوسيكل متعة
بس خلاص
تحياتي

يوميات نائمة في الأرياف يقول...

يخرب عقلك يا اسلام
اية الجمال ده؟
طبعا كالعادة بوست مميز جدا
وربنا يوفقك ولما الاخوة اللي في السجن يخرجو ان شاء الله متدخلش باليي انت كاتبه ده
هههههههههههه
اعد بالعافية
وابقى زورني

°ˆ~*¤®§(*§ نـــوارة §*)§®¤*~ˆ° ° يقول...

تشابه رهييييييب فعلا

ربنا يصلح الحال

انا مليش بالسياسة يا خويا

السجن للرجالة هههههههههه

متقلقش سير و نحن مش خلفك هههههههه

مدونة جميلة جدا

ربنا يوفقك

اختك : نوارة

أسماء علي يقول...

على فكرة الحادثة حصلت
و احنا حاليا في مرحلة دمار ما بعد الحادثة
:(

dina يقول...

اشهدوا يا مدونين مصر....انا معرفش المدون دا ولا بدخل مدونته ولا بحب الاغنية اللى شغالة دلوقتى دى....انا ماشية جوا الحيط لا و فى الاخر(تيك كير)....تيك انت كير اوىىىىىىىى
ههههههههه
عاوزة اقولك ان انا الوحيدة فى الشعب المصرى اللى مشفتش الفيلم دا انما حعتبرك تقصد مشهد قيادة الطيارة بتاع عادل امام فى امير الظلام(كل واحد يحكم على اللى شافه)......وجه الشبه باين جدااااا بين المشهد اللى انت اختارته و بين الحالة دلوقتى...انا بردو لسا عندى امل بعد ما نخبط فى الحيطة و نقع عالارض نفوق و نقوم و ننفض هدومنا و نشوف سكتنا بقى و نصحى من الغيبوبة الدايمة دى
قول امييييييييييييييييييين

آه وكفى يقول...

ايه ده هو دومه لسه مسجون
لا اله الا الله
ده ولد ممتاز خالص انا قابلته مرة .. يخرب بيت كده

وفعلا تصدق .. وكمان في جملة شهيرة في الفيلم انا مؤمنة بيها جداااااااااا بتاعة شريف منير لما قال

مشكلة ابويا انه مش عايز يصدق انه اعمى!

وهى دي الاراده يااسلام .. نياهاهاهااااااااااااااااااا

انت مخفي فين يامخفي ولا مكتئب ززي من ساعة اللي حصل شكلك كده .. تخيل انا كمان ماليش نفس اكتب بس نزلت فالبلوج حاجة من اللي شيلاهم تحت البلاطة .. هى اه مكنتش عجباني لكن عجبت الناس ليه معرفش

ماعلينا

سي يو

dodda يقول...

البوست حلو اوى

ربنا يسترها معاك

متخفش مش بيقبضوا على الكوميديانات اصل الشعب كل بيضرب نكت

هو دا اخرنا ننكت
الله ينكد عليه

سومه...مجنونه فى بلد عاقل يقول...

الاول البقاء لله انا والله ما عرفت غير دلوقت
اصلا انا حاسه انى بعيده جداا مش عارفه ليه وحاسه كمان مليش نفس اكتب ولا اقرا ولا اعرف اى حاجه
موضوع كيت كات دا:))
تحليلك هايل
بس خد بالك شكلك ناوى يكون دا اخر موضوع تكتبه
اشوفك فى مارينا يا مواطن
سومه

الحرامي يقول...

الووووووووو
الحقني يا اسلام
البت ابو سنوفه
(مش عارف ابو ستوفه ازاي وهي بنت)
استولت علي الحكم واول ما سرقت
سرقتك يا معلم
انت اتسرقت يا ريس

الحرامي يقول...

معلش يا ريس
سرقتك من غير ما استأذن
اصلي كنت بظبط البوسن
فيظهر البلوج كان عايز يسرقك
فراح متشور لوحده
غصم عني

fashkool يقول...

تصدق يا مواطن انت نشنت صح
البلد عامله زى ما يكون اتوبيس نازل من فوق الجبل ومن غير فرامل .. تفتكر ايه اللى ممكن يحصل للاتوبيس دهـ
متهيأ لى حتكون مصيبه وان كل الركاب حيموتو
برضه البلد حالها زى كدا بالضبط
زى الشيخ حسنى ..

تصدق اول مره اخد بالى من الرمز ده
مش عايز اكلم عندك كتير عشان انت آخرتك قربت وحنشترى لك عيش وحلاوه وحنروح نزورك
فريره بقى أجرى من عندك قبل ما يقفشونى
تحياتى

بس خلاص ... يقول...

الفيلم ده انت شفته وانت نايم وعمره ماهيخلص طول ما انت نايم ..يعنى الفيلم عرض مستمر يا صديقى
جميل جدا وفائك للفارس الملثم ..رحمه الله واسكنه فسيح جناته وجزاك كل الخير
دعواتنا له بالغفران والرحجمة
ولك منى كل التقدير

عالم ماريونت يقول...

اسلام ازيك اخبارك اية؟
انا بس كنت بقولك اني غيرت لينك المدونة وخليتها عالم ماريونت لو دخلت على البروفايل بتاعي هتلاقيها
مستنية تعليقك وبجد عايزة اعرف رايك اية؟
رنا

فارس عبدالفتاح يقول...

شكراً لك اخي الكريم على احقاق الحق وتوضيح كلامي الذي اساء فهمه الاخ الموقر فشكول


لكم منا كل التحية والتقدير

واحــ الفكر و القلم ــة يقول...

ههههههههههههه
فعلا صح عندك حق
يوسف بيه وهبى قالها زمان
" وما الدنيا إلا مسرح صغير "

المهم ان العامل المشترك فى الفيلم والحياة هو الجمهور ( الشعب يعنى )

فينك من زمان اخى الفاضل
انا مقصرة معاك انا آسفه .. سامحنى
يارب تكون بخير

كل سنة وانت طيب بمناسبة المولد النبوى الشريف اعاده الله عليك وعلى اسرتك الكريمة وعلى الامة الاسلامية بالخير والبركات

marmar يقول...

كل سنه وانت طيب ومن قلبي قريب
يا اغلى الحبايب يا سكر ودايب يا كل الحبايب حبيبي كلك خير وطيب
وعمري اللي جاي هشيلك بين عيوني شيل ولو هقدر يا روحي اجبلك نجوم الليل حبيبي معاك الحب طعمو جميل
كل سنه وانت طيب

maxbeta3zaman يقول...

تصور انى النهارده كنت على وشك احط الكام بيت اللى بعتهم لك مرة فى ميل " الكرسى -الورث" وخلاص كنت حاعمله البوست ...لكنى ترددت تانى وحطيت حاجات دنيا عادية قلت بلاش افكر الناس بالهم ..بس تصدق انى نسيت ان اسمه كان كده "مشمش " يعنى وعلى فكرة محمود عبد العزيز جارنا واخوه صديقى جدا ..بس انت برافو عليك انك خدت بالك من المفارقه دى ..بس هو كمان ضرب قفص الفراخ ودى زى انفلونزا الطيور لما أعدمو الفراخ ساعات السيما بتكون انعكاس للعكوسات الواقعية ..موش بقوللك انك نايم صاحى

الزباين

الزباين و يا رب ابعد عننا الضرايب