الثلاثاء، 28 أكتوبر 2008

حكومة صوباع الرجل المدوحس

حمار

تحــــــــــديث
=======
نهى رشدى
فتاة التحرش
من عرب 48 يعنى معاها جنسية اسرائيليه
و فى حاجات جديدة ظهرت فالقضية بعد الحكم
يعنى نهى رشدى كانت بتمثل قدام القاضى
مش كانت منهارة بجد
و معاها جواز سفر اسرائيلي
و فى فيديو اتصور لحادثة التحرش
و المحامية بتاعتها بتقول
لو كل حاجة كانت واضحة قدام القاضى
مكنش اتحكم على المتهم اصلا
و هى بتقول انها مخرجة لافلام وثائقيه
و المحامية بتتهمها بتشوية سمعه مصر
و التخابر لاسرائيل
ــــــــــــــــــــــــــــــــــــــــــ

اسم البوست غريب شوية ؟؟

حتفهم ليه

اولا عاوزين الشعب يكون واعى شوية


يعنى لو حصل لك حاجة معينة تبقى عارف مين فالبلد اللى مسئول عنها


زى مثلا


الضرايب مسئول عنها وزارة الماليه


فهمت قصدى



ليه لازم يكون فيه وعى ؟؟


لان الوعى ده اول الطريق لانك تاخد حقك


ــــــــــــــــــــــــــــــــــــــــــــــــــــ


يعنى ممكن تلاقى واحد بيقول لك


صوباع رجلى الكبير مدوحس...و يكمل الكلام و هو بيقول منها لله الحكومة



طيب ايه علاقة الحكومة بصوباع رجلك المدوحس


يعنى مثلا هى الحكومة فيها وزارة اسمها


حكومة صوباع الرجل



طيب الامراض تبع ايه..؟؟


تبع وزارة الصحة



يبقى تروح اى مستشفى حكومى


و بعد كده تدعى على حكومة صوباع الرجل



ــــــــــــــــــــــــــــــــــــــــــــــ


و الا واحد تانى تلاقى مراته ضرباه بالشبشب عالصبح


و تلاقيه بيقول


منها لله الحكومة



يعنى هى الحكومة ناقصه دعوات



يعنى يا جماعة عاوزين نكون موضوعين شوية


ايه علاقة مراته بالحكومة



ماشيه مع وزير مثلا ؟؟؟



لا اكيد انت عملتلها حاجة قبل ما تنزل تستحق انها تديك بالشبشب



دور عالسبب



و انت مش حتلاقيه اصلا


ــــــــــــــــــــــــــــــــــــــــــــــــ


و الا تبقى راكب مع سواق ميكروباص


و طول الطريق تلاقيه


بيشرب سجاير و ينفخ الدخان فوشك و هو بيكلمك على اى حاجة


و يفضل يكح



و مرة واحده تلاقيه بيقول الواحد صدرة تعبه من السجاير دى


منها لله الحكومة



يعنى هى الحكومة قاعده جوا صدر حضرتك بتعد شعر الصدر مثلا


يا راجل الحكومة زفت و نيله و قطران اه انا معاك


و مش بطيق اسمع كلمة حكومة


بس لازم نعرف سبب الحاجة ايه


عشان لو العيب مش مننا يبقى نفكر


مسئوليه مين فالحكومة بقى


حتلاقى ان كل وزارة بترمى المسئوليه على وزارة تانية


عادى دا الطبيعى


بس احنا نفضل وراهم لحد ما ناخد حقنا


ــــــــــــــــــــــــــــــــــــــــــــــــ



احنا علينا عبء برضوا مش كله عالحكومة


يعنى حاول انك تتحمل جزء من المسئوليه


و ابدء بنفسك


عشان لما تلعن ابو الحكومة


تبقى بتلعنها على حق


مش مجرد لعنة


و الا هى دى لعنة الفراعنة يعنى



لا يا جماعة


لازم يبقى عندك وعى


لازم يبقى عندك اراده


لازم يبقى عندك تسامح


=====


زى القصة دى بالظبط

كان فى راجل و ابنه ماشين و جنبهم ترعة


كان معاهم حمار


وقع فالترعة


حاولوا يطلعوه من الترعة


معرفوش


راحوا جابوا رمله و ردموا عليه بيدفنوه يعنى


و حيموت و خلاص بقى


نصيبه و قدرة


و بعد ما ردموا عليه


مشى الراجل و ابنه


الحمار ما عجبوش انه يموت كده


قعد يرفس لحد ما طلع فوق الرملة اللى ردموا عليه بيها


و عرف يطلع من الترعة


و مرة واحده الراجل لقى الحمار وراه بيجرى عليه



الراجل خاف بيحسب الحمار حيضربه


لقى الحمار بيتمسح فيه فرحان انه طلع



قال لابنه الراجل


احنا بكده نتعلم من الحمار ده تلات حاجات



انه عنده وعى عرف ازاى يطلع من الترعة


و انه عنده اراده استخدمها فطلوعه من الترعة


و انه عنده تسامح يعنى كان ممكن يرفسنى اول ما طلع من الترعة لانى كنت حموته


و برضوا تسامح و ما عملش كده



يبقى يا ابنى انا عاوزك كده


عاوزك تبقى

حماااااااااااار


و السلام ختام


ESLAM

47 قول و لا يهمك:

Ahmed Al-Sabbagh يقول...

ههههههه
بجد خرافة
تعرف
لسه قارى مقال للعذب فى اليوم السابع انهاردة
اسمه رجل الحمار

مش قادر امسك نفسى
:))

اقصوصه يقول...

ههههههههههههههههه

استمتعت جدا بقراءة التدوينه

ومنهم نستفيد

ههههههههههههه

mohamed ghalia يقول...

هههههههههههههههههههههههههههههههههه
حلوه قوى قصة الحمار
بس مشكلتنا بقى إلى تعبانا إننى بنفكر مش حمير زى الحمار المتسامح
تحياتى
دمت بود

adel يقول...

ههههههههه

تعرف تقزل عمري بحترم الحمار لكن مجاش علي بالي اني ابقي زيه ....بس ممكن افكر برضه

و اهو علي راي عمنا صلاح جاهين :
الدنيا اوده كبيرة للانتظار
فيها ابن ادم زيه زي الحمار
الهم واحد و الملل مشترك
بس عمرك شفت حمار بيحاول الانتحار.

و عجبي

عادل
http://elbald-dy.blogspot.com/

Empress appy يقول...

بس يا سمسم انا ليه وجهه نظر تانيه فى ده الحكومه مسئوله عن الامراض النفسيه اللى وصل لها المجتمع من كتر الضغط بس هو احسن خاحه فعلا ندور على السبب ومنعلقش خيبتنا على شماعه غيرنا ده اللى تقصده بس ده لايعفيها من المسئوليه برضه

فشكووول يقول...

قوم يا مصرى ..اصح يا مصرى .. برضه نام يا مصرى .. كلها محصله بعضها .. ازيك يا اسلام .. انت ما بتزورنيش ليه .. يا راجل انا مستنيك اصل واحد زيك بيكتب كلام حلو وخصوصا عن الحمار لو ما زارنيش حاكون زعلان .. تعالى حتلاقى كل حاجه متفشكله وحاول تفشكل عندى يمكن تعدل الفشكول.. سلام

الكحيان يقول...

إلى القهوجي اللذيذ:

أمتعنا تدوينك كثيرا ياسيدي، ولكني أرى أنك ظلمت شعبنا ظلما كبيرا، لأنه على وعي شديد جدا بمن أفقروه وأمرضوه وأجاعوه وهو عندما يطلق لفظ ((الحكومة)) فإنه يطلقه من باب العموم الذي يراد به الخصوص؛ فالمواطن الذي دحس أصبعه كان على حق عندما دعا على الحكومة، لأن وزارة النقل والمطبات التابعة للحكومة - فيما أعتقد- لم تسو له الطريق حتى وقع في الدحادير والحفر، واضطرته بإهمالها إلى السير كثيرا مما عرضه إلى الدهس والدحس بواسطة السيارات الضالة. وأما الزوجة التي تهف زوجها بالبراطيش في كل صباح فإنها تهفه لأن يقصر معها في المصروفات وفي أداء الواجبات السريرية التي تقتضي حالة نفسية جيدة،والسبب في ذلك هو الوزارة التي يعمل فيها- وهي تابعة للحكومة أيضا- وأما عن الدخان فإن الحكومة تترك شركات الدخان اللعينة حرة طليقة وتكتفي بأمرها بالكتابة على أدبار العلب عبارة (( التدخين ضار جدا بالصحة)) والحقيقة أن الحكومة هي التي تضر جدا بالصحة. ومع طرافة قصة الحمار أقول يجوز التشبه بالحمير في بعض فعالهم لكن ليس على الإطلاق خاصة في مسألة التسامح هذه ولعل ذلك الفعل صدر عن الحمار لعبطه وجهله وبلادته وربما صدر عنه لذكائه لأنه يعلم أن ذلك الرجل هو الذي يقدم له البرسيم والتبن كل يوم، فينبغي له أن يحافظ على مصدر قوته مع تحياتي الكحيان

فشكووول يقول...

قوم يا مصرى ..اصح يا مصرى .. برضه نام يا مصرى .. كلها محصله بعضها .. ازيك يا اسلام .. انت ما بتزورنيش ليه .. يا راجل انا مستنيك اصل واحد زيك بيكتب كلام حلو وخصوصا عن الحمار لو ما زارنيش حاكون زعلان .. تعالى حتلاقى كل حاجه متفشكله وحاول تفشكل عندى يمكن تعدل الفشكول.. سلام

عالم ماريونت يقول...

صباح الخير يا اسلام
انا لسة شايفة البوست الجديد بتاعك وبجد فرحت بيه جدا جدا
بس هعلق انا هنزل دلوقتي عشان متأخرة جدا ولما ارجع اعلق براحتي
بجد مبروك البوست الجديد

فاتيما يقول...

أولاً
أسفة على الغياب و بقالى مدة مدخلتش القهوة الحلوة دى
ثانياً
فرحت جدا لما قريت الخبر عنك بتاع جروب حلاقة تامر حسنى فى وشوشة و قعدت أقول لأخويا أسلام دى زميل عزيز فى سماء التدوين و فرحت بيك قوى بجد
ثالثاً
مبروك على فرش القهوة الجديد و تعيش و تعمل نيولوك ...
رابعاً
حكاية الحمار دى حاسة كدا إنها تريقا على المواطن الغلبان و لا إيه قصدك يعنى ؟؟؟
خامساً
تحياتى الخالصة ليك يا عزيزى

كـــيــــــــارا يقول...

معاك في كل كلامك يااسلام وبايده

بس بلاش حمااااااااااااااار دي

كمان بقي سوال هو ليه الحمار محاولش يطلع وهو صاحبه وابنه بيساعدوةه للطلوع

وليه حاول يطلع مع اخر لحظه

ليه دايما بنلحق الحاجه علي اخر لحظه

Unknown يقول...

احلى سلام للمعلم اسلام طاخ طاخ طاخ (دة ضرب نار حضرتك)
حلوة يا اسلام بس انا مش حمااااااار
ومش هبقى حمار ومنها لله الحكومة (وش بيستهبل) يا اسلام يا اخويا احنا بنعمل نفس اللى بتعمله الحكومة احنا بنرمى بلانا عليها وهم بيرموا بلاهم على بعض.......... ابقى سلم لى على اختك وخليها تبعد عن دكتور عادل الله يكرمك مش عايزين البت تتعقد ولو مجنونة زيك يبقى هتفضحه فخليها بعيد احسن ماشى؟؟؟

Unknown يقول...

اه معلش نسيت اطلب.......عايزة واحد سحلب عشان الشتا جه وبعدها واحد شكولاتة باللبن وخللى الحساب على احمد عبد الله

مواطن مصرى نايم يقول...

الصباغ
========
و الله يا ابو حميد كلها بقى عندها توارد افكار من حاله النهيق الحكزمى اللى بنمر بيها
ربنا عالظالم بقى

مواطن مصرى نايم يقول...

اقصوصه
========
نورتينى و الله و سعدت بتعليقك
و شكرا جدا على الاطراء ده

تحياتى

مواطن مصرى نايم يقول...

محمد غاليا
==========
ده الهدف فعلا ان اللى مش بيفكر يبدأ يفكر
دايما لما بتصدم الواحد بالحال اللى هو فيه بيفوق على طول و بيحاول يتغير

تحياتى

مواطن مصرى نايم يقول...

عادل
=====
لا يا ريس اوعى تفتكر ان قصدى من البوست اننا نكون حمير
لالالالالالالالالالالالالالالا
بالعكس
دا تنبيه بالوضع اللى احنا رايحين نحيته لو سكتنا


تحياتى

مواطن مصرى نايم يقول...

appy
=======
بالظبط ده اللى اقصده
بس كمان عاوز اوصل ان الواحد لو معرفش ازاى ياخد حقه يبقى عمرة ما حياخده
يعنى اعرف مين واخد حقك و روح خده منه

منورانى يا اجدع اخت فالكون كله

مواطن مصرى نايم يقول...

فشكول
=======
يا سلام بس كد ازورك يا فندم دا يبقى وسام على صدرى دعوة حضرتك
منورى دايما ان شاء الله

تحياتى

مواطن مصرى نايم يقول...

الكحيان
========
ده اللى انا اقصده
انك تعرف حقك فين
مش ترمى الهم على اى حد و خلاص
او تقول كلام مبهم غير مفهوم
لازم كلنا نفوق
منورنى و اسعدتنى جداااا زيارتك

تحياتى

مواطن مصرى نايم يقول...

يوميات نائمة فالارياف
=====================
رنا
الله يبارك فيكى يا ام المصريين
ربنا يكرمك ان شاء الله و تبقى ام لاولادك بس ان شاء الله
و مستنى تعليقك يا اجدع رنا

تحياتى

مواطن مصرى نايم يقول...

فاتيما
=======
ام يوسف عندنا يا مرحبا يا مرحبا
حمدالله بالسلامة و انتى ما غبتيش و لا حاجة دا انا اللى مقصر فالسؤال عنك معلش
و بجد انا فرحت اكتر لما عرفت ان حد اعرفه قرء المقال مش مهم ان الناس تعرفنى المهم ان اللى يعرفونى يشوفوه دى عندى اهم

اما بقى حكاية الحمار مش تريقه ابدا
دا انا بستعمل فالمقال ده اسلوب الصدمة
زى اسم البلوج بتاعى
نام يا مصرى

هو انا يعنى عاوزة ينام لا انا عاوزة يصحى جدااا

بالظبط كده مع الحمار
عاوز الكل يعرف ياخد حقة ازاى

لو اتريقت عالمواطن يبقى بتريق على نفسى

منورانى يا ام يوسف و يا رب ديما بخير و بصحة و ربنا يريح بالك

تحياتى

مواطن مصرى نايم يقول...

كيارا
=======
لا لا اللى كانوا بيطلعوه من الترعة كانوا بيطلعوه غلط
يعنى مش بيستعملوا دماغهم
و لما استعملوها استعملوها فأنهم يموتوه و يردموا عليه
لما ردموا الحمار طلع فوق الرمله ده و عرف يخرج بره الترعة

يعنى هما بغباءهم ساعدوه برضوا


منورانى دايما يا كيارا

تحياتى

اسلام

Mahmoud البطراوى يقول...

ازيك يا اسلام ليك وحشه ياااااااامان بجد بجد بجد

ومتخافش احنا هبنقى حماااااااار بس بطريقتنا

هههههههههههههه

Mahmoud البطراوى يقول...

ازيك يا اسلام ليك وحشه ياااااااامان بجد بجد بجد

ومتخافش احنا هبنقى حماااااااار بس بطريقتنا

هههههههههههههه

مواطن مصرى نايم يقول...

انجى
====
أآى آآى آآآآآه
(لا دا الطلقات اللى ضربتيها كلها جت فيا)
ههههههههههههههه
معنى البوست اننا منكونش حمير يعنى بقول للحمار افضل حمار لو عاجبك
فاهمه قصدى
لازم احنا اللى نغير مش نستنى التغيير

و انا ححاسب عالمشاريب عشان التعليق الجامد ده

ححاسب عالمية بس

ههههههههههههه

حقول لاختى على دكتور عادل ده
بس انا بس اللى مجنون على فكره
هههههههههههه

منورانى يا بنت بلدى

تحياتى

مواطن مصرى نايم يقول...

بطوط حبوب
===========
حبيب قلبى يا حوده باشا
انت اللى ليك وحشة يا ريس
و الله انا برضوا مقصر فحقك بس و الله لو شوفت اخر بوست و اللى قبله حتفهم السبب
ايوا يا ريس
انا حبقى برضوا حمار بطريقتى
شكلك فهمت قصدى يا حودة
ايوا كده يا عم

منورنى يا جميل

تحياتى

غير معرف يقول...

بس ياإسلام ياأخويا لما يكون أبو الكهول الجوي هو الحمار يبقى ساعتها لازم كلنا نردم على جابو أهله

Beram ElMasry يقول...

عـــين الشــــمس عيانـــــة ومعصوبــــه بشـــال الليـــل
وفــــــــاس الحـــــزن منكـــودة ومرفوعـــة تهـد الحيـل
هجمـــت علينـــــــا عصابــــة زى الطوفــــان والســـيل
خلــــــــوا شبابنــــــا منكســــــر راضــــى يكـون الذيـل
باعـــــــــوا علينـــــــــا وهمهــم ووفـوا من دمانا الكيل
ولا خلـــوا فى البلـــد فــــارس ولا حتــى حداهــا خيــل

zOzO يقول...

هههههههههههه
يخربيت عقلك يا اسلام

البوست بجد حلو
وبيطمنا عليك
الحمد لله انك خرجت من اللي انت فيه

معلش بقي النت عندي زفت وقطران
عارفه اني تعليقي متاخر
عليك الاستحمال بقي

همس الاحباب يقول...

تسلم ايدك يا اسلام
تدوينة جميلة جدا
هههههههههه
وفعلا لو الحمار كده
يبقى كلنا لازمن نبقى حمير
تحياتى وتقديرى

فشكووول يقول...

انت يا عم معقدها ليه عمال اضور اخش على التعليقات ازاى لحد ما ربنا سهل يا عم يا صاحب القهوه .. دى قهوه لازم تخلى بابها مفتوح طول النهار .. وما تعقدهاش على اللى يخش عندك .. اشكرك على زيارتك لى وعلى العموم انا رايح اسكندريه يوم الاثنين عندى شغل فى الفرع اللى فى شارع فرنسا فى المنشيه اما الحكيان والفركشاوى فهم والله ما هم قرايبى ولا حاجه .. بس هما احسن من قرايبى هما حبايبى .. يا ريت انت كمان تكون من حبايبى .. سلام

فشكووول يقول...

على فكره انا كاتب بوست جميل عن اسكندريه يوم 11 اكتوبر 2008 وحتلاقيه فى الاولد بوستold post يا اخى تعالى واقراه .. اصلى انا شغلى بروح كل الفروع بتاعتنا فى جميع المحافظات عشان كدا بيفتح لى مجال للكتابه كتير .. سلام

شفـقــة و إحســــان يقول...

حمار ايه وبهيمة ايه يا اسلام واللهى انت هتودينا فى داهية هتودينا
عموما لو اتمسكت انت ما تعرفناش ماشى

ندا منير يقول...

هههههههههههههههه
حلو قوى يا اسلام
وانا معاك فى رايك
فعلا كل حاجة نشتم فى الحكومة
يعنى مثلا الناس تفضل تجيب اطفال كتير قوى
وبعدين يدخلوا مدارس ويخلصوا جامعة
ومش لاقين شغل فى مجالهم
مه طبيعى هيلاقوا ازاى كام واحد بيتخرج من كلية معينة الحكومة هتوفر لكام الف نفس الوطيفة ازاى
والكل عايز يشتغل فى مجاله
ويفضلوا يشتموا فى الحكومة
طيب ميقللوا هما عدد السكان

يعنى العيب ف تفكيرنا احنا كمان
وعلى فكرة دى فكرة تحقيق انا بعملها دلوقتى

م/ الحسيني لزومي يقول...

شارك في الحملة الشعبية للقيد بالجداول الانتخابية بوضع بنر الحملة علي مدونتك.
البنر موجود علي مدونتي

blue-wave يقول...

ههههههههههههههههههههه
اول زيارة ليك
وبجد تسلم دماغك

مواطن مصرى نايم يقول...

زيزو باشا
==========
ساعتها انا بقى حجيب الرملة على حسابى
بس يا رب يحصل كده
احنا بإيد كل واحد فينا انه يغير بس مشكلتنا اننا شعب غلبان
بيفرح بإى عضمة تترمى له
و فنفس الوقت اللى رمى له العضمة بياكل الخروف كله

منورنى يا كبير بتعليقاتك الجامده دى الله ينور

مواطن مصرى نايم يقول...

بيرم المصرى
==========
جميلة جدا يا استاذ الابيات
الله ينور

تحياتى

مواطن مصرى نايم يقول...

زهرة هانم ( مش تريقة) بجد
=====================
احنا نستحمل سيادتك انتى و نت حضرتك دا انتى الخير و البركة
ربنا يكون فعونك بسبب النت بتاعك
دا ممل
هههههههههههههههههه
منورانى يا اجدع زهرة

مواطن مصرى نايم يقول...

همس الاحباب
==========
خالد باشا حبيب قلبى
ربنا يخليك تسلم ايدك انت اللى كتبت التعليق ده
و فعلا لو الحمار كده
انا عن نفسى حبقى تنين مش حمار بس
هههههههههههه

منورنى يا ريس

تحياتى

مواطن مصرى نايم يقول...

فشكول
======
عم فشكول عندنا يا مرحبا يا مرحبا
و الله مش معد التعليقات و لا حاجة
دا البلوج بتاعى حتى من اسهل البلوجات فالتعامل
و التصميم بسيط
مفيهوش اى مبالغه
و ان شاء الله ابقى صديق لحضرتك زى الكحيان و فركشاوى كده
حتنور اسكندرية ان شاء الله اكيد
تحياتى لحضرتك

اسلام

مواطن مصرى نايم يقول...

شفقه هانم
=========
انا اصلا حعترف عليكى على طول بعد البوست اللى انتى كاتباه على احسان ده
دا احسان حبيبى
و حقول ان انتى رئيسة التنظيم
هههههههههههه
منورانى يا شفقه

مواطن مصرى نايم يقول...

ندا منير
========
لا انا كمان عاوز ان اى حد قبل ما يتكلم يبقى عارف بيتكلم فإية ميبقاش عاوز يتكلم و خلاص
و نبقى من اشهر الشعوب اللى بتتكلم و خلاص
من غير ما تفهم
دا عيب فحقنا اصلا
و انا بجد بتضايق من الحكاية دى
ابقى بكلم واحد و تلاقيه بيفتى كتير
و انا احاول اقنع فيه ان كلامة غلط و هو ابدا بيأس و بسكت
حنعمل ايه فشعب مش راضى يتغير

مواطن مصرى نايم يقول...

م/ الحسيني لزومي
=============
ان شاء الله ححط البانر يا استاذ حسينى

مواطن مصرى نايم يقول...

blue-wave
==========
عمرو باشا منورنى
و يا رب متكونش اخر زيارة ان شاء الله
و تسلم دماغك انت كمان عالروايه اللى بتكتبها

نورتنى

اسلام

maxbeta3zaman يقول...

أجمل تحليل سمعته لدور الحكومة هو ما ورد على لسان هانى رمزى فى فيلم عاوز حقى فهو يعتبر الحكومة دى شوية موظفين عند الشعب بيعنوهم عشان يديروا أملاكه ويخدموه ..موش عشان يعملو فيه عمايل الديك بتاع السطوح ..هانى رمزى كان فاهم دور الحكومة صح ...دلوقتى هى بتعمل اللى كان هو ناوى يعمله وتراجع عنه ..بتبيعنا وتبيع نصيبنا من غير توكيل حتى ...وبتفتشنا وبتاخد اللى فاضل فى جيوبنا ...ماتقولليش كمان انك موش عارف نكتة مصباح علاء الدين ...!!!

الزباين

الزباين و يا رب ابعد عننا الضرايب