السبت، 27 سبتمبر 2008

اللى خطف السياح من مصر-- صااايع..صاايع..صاااايع

تأثرا بالافلام العربى
(جواز عتريس من فؤاده - باااطل..بااطل..بااااطل)
اللى خطف السياح من مصر- صااايع..صاايع..صاااايع
******************
ايه رأيك فموضوع اختطاف السياح ؟؟
سؤال يجيب عليه كل من :
ـــــــــــــــــــــــــــــــ
القرموطى : اشوفها والعه..اشوفها والعه عشان عم بوش يعرف ان احنا مش بنهزر..مش بنهزر اه احنا بناخد على قفانا بس بمزاجنا و اسألوا مرعى بتاع الكلامه
ـــــــــــــــــــــــــــــــ
اللمبى : ايه فى ايه يا بنى ادمين..هو فى حد اخ صايع غريب دخل فقلب المكان و بيتبلطج فمنطقتى ماشى يا منطقة
ـــــــــــــــــــــــــــــــ
اتش دبور : يوو يوو يووو دااااام يو..فى ايه يا ناس يا لوكل يا شعبيين خطفتوا ليه الاجانب ولاد الناس الكويسين..خور ياض منك له
ـــــــــــــــــــــــــــــــ
صدام : حتى يعرف العلوج الامريكان ان العراق سيظل حرا..و ان العراقيين مسيطرين عالموقف
ـــــــــــــــــــــــــــــــ
بوش : هذا الاختطاف له علاقة باحداث الحادى عشر من سبتمبر و هذا يدل على وجود اسلحه نوويه بمصر و سيتم ارسال البرادعى عشان يقول ان مصر فيها نووى
ــــــــــــــــــــــــــــــــ
اسامة بن لادن : لن تنعم امريكا و انا فاضى و مفيش حاجة ورايا غير انى اضرب امريكا على قفاها
ــــــــــــــــــــــــــــــــ
ياسر عرفات : (رافعا يده بعلامة النصر) انى اسمع مأذن القدس فى اذنى..قريبا سنسترد ارضنا..و اطالب الخاطفين بتحرير الاسرى مقابل استرداد كافة الاراضى المحتله
ــــــــــــــــــــــــــــــــ
حبيب العدلى : احنا مسيطرين عالموقف و حنعاقب المقصرين من رجال الامن العقاب حيكون عبارة عن تعذيب احد المواطنين امام اعينهم و حنحرمهم من انهم هما اللى يعذبوه
ــــــــــــــــــــــــــــــــ
د/احمد نظيف : معدل البطالة سبب رئيسى فتلك العمليات و انا احب اقول لكم ان معدل البطالة فى تناقص مستمر و معدل النمو بيزيد بنسبة سبعه من عشرة فالميه و ده حيساعد بشكل كبير فاطلاق صراح المختطفين
ـــــــــــــــــــــــــــــــــ
طلعت السادات : (متحدثا بصوت مرتفع) الحكومة اهتمت دلوقتى بالسياح و سايبه الدويقة و الصخور اللى تحتها مصريين بالالاف و البلد كلها مهتمه بالسياح اللى اتخطفوا..و على فكرة احمد عز له علاقة بخطف السياح بقه
ـــــــــــــــــــــــــــــــــ
تامر حسنى : (يرد بالنفى للاشاعة المنتشرة بأن السياح تايهين داخل شعر صدره) انا بعلن انى على استعداد تام لتفتيش صدرى و ممكن اساعد فالبحث عنهم بالعربيه الهامر بتاعتى و لما نلاقى السياح ممكن اغنى لهم كل مرة بشوفك فيها ببقى نفسى ااآآآآ
ـــــــــــــــــــــــــــــــــ
مهند : انا واد موز و البنات بتحبنى و انا بصراحة مش بحب نور لو فى مع السياح بنات انا ممكن اتجوزهم و لو نور زعلت ابقى اصالحها و هى ترفض زى ما بتعمل معايا على طول
ـــــــــــــــــــــــــــــــــ
نور : (متحدثة بالصوت المدبلج )لا اريد لعل كيف جدى يرضى عن هذا لابد اذا ربما انه كان له علاقه بها و لن استطيع لانه يجب و لكى فذلك الوقت تماما
ـــــــــــــــــــــــــــــــــ
كفاية الشخصيات دى بقى نبقى نعمل شخصيات تانية فموقف تانى ان شاء الله
ESLAM

27 قول و لا يهمك:

فاروق عادل يقول...

هيييييييييييية اول تعليق

جامدة جدا ههههههههههههههة حلوة بالذات الحتة بتاعت العادلى ونور بس بتاعت مهند معجبتنيش علشان انا مبطيقهوش اساسا دة واكل الجو منى خالص

غير معرف يقول...

هههههههههههههه
لا حلوه التعليقات بجد ياواد
كل سنه وانت طيب صحيح
اخبار الحياه عندك ايييييييه
مت على روحى م الضحك على الأخ( شعر الصدر حسين)
جامده

خالد كامل يقول...

طب و مكتبتش تعليق مهيج الجماهير ليه ؟؟
مكانش العشم يا اسلام
المهم البوست جامد جداً
و خصوصاً : (( و على فكرة بقى أحمد عز ليه علاقة بالموضوع )) .. عجبتنى قوى

رئيس جمهوريه نفسى يقول...

جميل تعليق h.دبور ولو انى لية اكسبريشن تانى يعنى بس حظى حلو بعلق قبل الفطار اللهم ما انى صائم
كل سنة وانت طيب يا اسلام ويتقبل اللة منا ومنكم صالح الاعمال وعيد سعيد ان شاء اللة

Empress appy يقول...

مع الاحتفاظ بحك حكوك الملكيه لسعادتك
خور يالا دي معناها ايه بس علشان اختك معجمها بايظ اخر حاجه دي لغه جديده ولا ايه هههههههههه

غلبان ... وليا لسان .... DeXTeR! يقول...

هههههه الدماغ دي متكلفه اوي اوي

انت راجل مزاجك عالي اووي اووي اووي

وكل سنه و انت كويس :)

غير معرف يقول...

ههههههههههههههههههههههههههه
جامدة اوييييييي
ههههههههههههههههه
بجد خيالك واسع على الاخر
هههههه
كل سنة وانت طيب بمناسبة العيد
نيرة احمد محمود

غير معرف يقول...

اسلام صحيح معلش
سؤؤؤؤؤؤؤؤؤؤؤؤؤؤال
الاغنية مكتوب عليها داونلوود
اوكى
تمام
بدوس وبعدين يجيلى اختيار مابين حاجتين مع الاتنين مرديتش تنزل بردو
اشكرك
بجد شكرا جدا
سلام
انا هحاول انزلها من النت انا شاء الله
نيرة

غروب يقول...

هههههههههههه
اطلب ليه واحد قهوه كده عشان امخمخ ف الكلام واقدر احدد مين الفاعل
انا بصراحه شاكه ف ان الاستاذ شعر السدر حسين له علاقه بالموضوع فعلا
هيلاقوا مكان اكتر من ده امان فييييييين بس ؟؟؟؟؟؟

عموما يا اسلام بيه تسلم ايديك

ضحتنى جامد وعزمتنى على قهوه كمان

نردهالك ف الافراح ان شاء الله

يلا سلالامووووووووووز

وعيدك سعيد ان شاء الله

AHMED SAMIR يقول...

تتعدد التعليقات ولكنها في النهاية مأساة
بيعجبني اوي الشرطة المصرية...اسد على وفي الاختطاف نعامة
تحياااااتي واحتراماتي

ندا منير يقول...

والله يا اسلام الموضوع دا يحزن قوى
يعنى احنا اصلا صورتنا كمصريين بقت تحت الصفر قدام الغرب
الموضوع مش ناقص اننا نطلع كمان بنخطف سياح عشان فلوس
واصلا السياحة فى مصر تدهورت على الاخر
والموقف دا هيخليها تتدهور بالزيادة
هى الدنيا كدة لازم يطلع ناس تسئ للى حواليها
واتمنى بجد من قبلى ان السياح يرجعوا سالمين
واللى خطفوهم
ميطلوش اى فلوس خالص
ويتحاكموا جامد قوى

Zianour يقول...

ههههههههههههههههههههههه

بجد ضحكتني

وجميل التصور ده اهو الكل يدلو بدلوه ف الموضوع

بس طبعا لاني واحده باحب السفاري لازمن اتخض لاي درجة التسيب بقى ضارب ف مصر

التسيب وصل الصحرا يا جدعااااااااااان
عععععععع
هذا وكل عام وانتم بخير
:))

كـــيــــــــارا يقول...

حبيب العدلى : احنا مسيطرين عالموقف و حنعاقب المقصرين من رجال الامن العقاب حيكون عبارة عن تعذيب احد المواطنين امام اعينهم و حنحرمهم من انهم هما اللى يعذبوه


هههههههههههههههههه اشطه اشطه

وكارثه المسرح هيقول كدا برده

عااااااااااااااااااا

انا تعبت من البلد دي

بس بحبها وملهاش زنب في اللي بيعملوه اللي فيها

ربنا يصلح الحال

تحياتي ليك

kochia يقول...

شر البلية ما يضحك
والله عندك حق

عجبني اكتر حاجة من التعليقات حبيب العادلي ونظيف
كلام كبير والله
حلو

تحياتي

ahmed_k يقول...

هههههههههههههه
أنا قلت في الأول إسلام حيكتب تحليل سياسي أتاريها آراء الناس الحلوه دي
بجد جديده
وعجبني رأي بوش ونور هههههههههه

عالم ماريونت يقول...

هههههههههههههههههههههههههههههههههه
اية يا اسلام
بجد عجبتني اوي حتة نور دي
عارف بقى
مكنتش بتفرج على المسلسل ده
بس لما كان بيشتغل وانا قاعدة بقى
نور ومهند دول على طول متخانقين
يروح يصالحها ويبوس جزمتها
تقولو مهند انا ما بدي ياك
ويرجعو يتصالحو عشان يتخانقو تاني
اقولك حاجة احلى
شخصيات المسلسل ده كانت بتتغير
اه والله
كان في شخصية واحد اسمة فجر في نص المسلسل متعرفش اية اللي حصل لقيناه واحد تاني!!!!!
اقولك حاجة احلى
اهتمامنا بالمسلسلات دي اكبر دليل على اننا شعب تافه
كل سنة وانت طيب
قولي
انت جاي المنصورة ولا اية؟

قوس قزح يقول...

هههههههههههههههههههه
حلوة اوى
و فعلا كل شخصية ممكن يكون رد فعلها و اسلوبها كده
بس نسيت تقولى طريقة اسلام هتكون ازاى

بوست صايع صايع صايع :)

ojg يقول...

ممممم
ايه ده
مين ده
كده يرضيك يبقى ده اول بوست اقراه عندك وأقع ضحك كده؟؟
البوست دمه خفيف جداااا
أكتر كلام عجبني كان كلام ياسر عرفات
والعادلي
انما طلعت السادات ومهند دول بقى حكاية
بجد بوست جامد
هروح ادعبس في المدونة
:))

ojg يقول...

يووووه اتلخبطت
كنت اقصد نور مش مهند
بس الظاهر ان العدوى صابتني
:))

immigrant يقول...

حلوة تسلم إيديك :)
عالم كلام صحيح :D

مهرة سالم يقول...

هذا الاختطاف له علاقة باحداث الحادى عشر من سبتمبر و هذا يدل على وجود اسلحه نوويه بمصر و سيتم ارسال البرادعى عشان يقول ان مصر فيها
هههههههههههههههههههههههههه
بجد بوست تحفه...

سميرة يقول...

اسلام
البوست موز موز موز على رأي عمنا عمرو اديب..
خدت بالك انت من تعليق حبيب العادلي ويقصد ايه؟؟؟
آه يا بلد
بس اللي غايظني اوي ان السياح ليهم حكومات تسأل عليهم الخاطفين المغفلين واخدين مصريين يعملوا بيهم ايييييييه؟؟؟
عموما كل سنة وانت طيب
عيد سعيد
تحياتي

Asmaa mahaba يقول...

نسيت تضيف تعليق سومه:
اقطع دراعى لو مكانتش دى عمله الواد بطيخ واصرح انا سومه بسماحى لتخريطه للوز...وادينى زغروطه عشان انا بقا ليا ظهر فى المدونات ياد يا مواطن اى والله خالى فشكول اصبح مدون بس هو كان مش عارف بيدونوا ازاى فحط مدونات اختباريه ههههههههههه فى البدايه
يعنى كدا حتلاقينا عيله

Unknown يقول...

يا لهويييييييييييييييي على الضحك يا نهار اسوح ايه يا ابنى الحلاوة دى بس والله ضحكت لما شبعت خصوصا نور والصوت المدبلج فظيع يا اسلام الله ينور

Unknown يقول...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

عابر سبيل يقول...

بجد كلامك جامد جدا وعجبنى كل كلامك انت راجل هزلى جامد بجد بس خلى بالك من نفسك وربنا يستر وكل سنة وانت طيب تشرفت بزيارتك........وليد

adel يقول...

هههههههههه
بجد ضكنمي مع ان الموضوع اصلا مهزلة لوحده

و عاوز اشوف رايك في المدونة ديه بما انك مدمن قديم (قصدي مدون قديم) :

http://elbald-dy.blogspot.com/

و كده كده هحطك عندي لان كلامك عاجبني :)

الزباين

الزباين و يا رب ابعد عننا الضرايب