الثلاثاء، 23 سبتمبر، 2008

نظرية اللى شبع...تلازمها نظرية دارى على اكل ابوك




نظرية اللى شبع...تلازمها نظرية دارى على اكل ابوك
ـــــــــــــــــــــــــــــــــــــــــــــــــــــ
نظرية اللى شبع
ـــــــــــــــ
فى الفترات الاخيرة تصاعدت اصوات مؤيده لتولى جمال مبارك كرسى الرئاسة بعد ابوه
و كانت لهذة الاصوات مبررات لذلك
و من الملحوظ ان هذة المبررات فى شكلها الخارجى و مظهرها انها صحيحة
و هى : ان عهد جمال مبارك سيكون افضل بكثير مما سبق و سيكون افضل بكثير عن تولى شخص اخر الرئاسة
و ذلك لان جمال مبارك خلاص (شبع) فى عهد والده
و لن يجد متسع فى معدته لاكل المزيد من قوط الشعب
و لذلك سيكون عهد رخاء و تنمية و فخفخينا و حنعوم فالرز بلبن و حنستحمى كلنا بالشامبو
و حيبقى فى دعم اضافى على الانترنت
و سيتم منح كل مدون موقع ملاكى ليدون فيه و يكتب عن مدى الرقى و الفخفخه اللى مصر وصلت لها
و اشياء من هذا الهزل و الكلمات الرنانه التى تطرب بها اذان الشخص الغير واعى لما يحدث ببلده
اى الشخص النائم
خلاصة النظريه : ان جمال شبع خلاص لو مسك الحكم مش حياكل تانى

ـــــــــــــــــــــــــــــــــــــــ
نظرية دارى على اكل ابوك
ــــــــــــــــــــــــــ
و فى ظل هذة النظرية احب ان اوضح شئ بسيط
و ذلك بنظرية اخرى يجب ان تلازم نظرية اللى شبع
و هذة النظرية تتمثل فى
اذا مسك جمال مبارك الحكم لن يجعل من حال البلد افضل مما هى عليه بل من الممكن ان يتدهور الحال اكثر و اكثر
و ذلك لانه اذا حاول ان يجعل البلد افضل ذلك سيوضح للعالم كله
ان من كان قبله كان رجل اكول
و يتغذى على قوط المواطن المطحون
فلابد لجمال مبارك ان يدارى على هذا الشخص الذى ظل فترة كبيرة يتغذى على اموالنا
وذلك لانه والده و لن يسمح لشخص ان يتفوه بكلمة واحدة تعيب فيه
خلاصة النظرية : ان جمال مبارك لازم لو مسك الحكم ياكل و يمص دمنا برضوا عشان يدارى على ابوه
و الا ايه رأيكم انتم ؟؟؟
ــــــــــــــــــــــــــــــــــــــ
و ممكن حد يقول لى
لو جمال مسك
الشباب حيشتغلوا ؟ الشباب حيتجوزا ؟ الشباب حيلاقوا ياكلوا ؟
انا بسأل عن الشباب بس عشان جمال مؤسس جمعية جيل المستقبل
اللى هما الشباب
اللى هما احنا
اللى هما مش عارفين يتجوزا
اللى هما مش حيعرفوا يشتغلوا
اللى هما عاوزين يهاجروا
اللى هما عماد المستقبل و امل لبلدنا المنكوب
اسأل الله ان يرحمنا جميعا
و ان نتحرر من زل الرق و الاستعباد
و ان يأتى الوقت الذى يستطيع كل مواطن مصرى
ان يقول لا
و يكون هو لوحة التحكم و اطار القيادة فى هذة البلد
و حسبنا الله و نعم الوكيل
التوقيع
(شاب عاوز يهاجر)
او
(شاب منكوب)
او
(شاب مصرى)
Eslam

24 قول و لا يهمك:

رئيس جمهوريه نفسى يقول...

واللة ما حيحصل ولا حيكون الناس اللى بتقول انى جمال يمسك متعرفش انى جمال ماسك فعليا وانى طقم الوزراء واللى بيعملوة هو كلة الفكرة الجديد اللى اتحفنا فية ولا مش واخدين بالهم انى كل كلام عن حاجة فى البلد انى بيسبقها موضوع لجنة السياسات الملاكى بتعته

كيارا يقول...

هو انت مش تعرف انها ملكيه مستتره ولا ايه جمال ماسك اصلا مش رسمي لكن مستتتر زي الملكيه المستتره

حسبي الله ونعم الوكيل

A.SAMIR يقول...

يا باشا والله القصة مش قصة جمال او ابوه
القصة من الاخر في الحاشية
ودي في الحالتين موجودة
ولو في حد تالت برضة عتبقى مشكلته في الحاشية
هي دى الازمة
تحياااااااتي

Appyplanet يقول...

النبى انا قولت عليك دماغ انت جبت الصور دى منين يا مصيبه اخر واحده بشعه بجد حد بياكل كده فى فطار عام او معرفش ايه ده
نيجى للاهم بقى
هى السياسات مين بيدرها مين ممشى الدنيا شمال ويمين تقدر تقولى مين عامل مراقبات حتى على بتوع الحزن اللى هما رجالته ما هو
ابوة بقى ريموكلاش وخلاص يا اسلام
الموضوع ماشى من زمان بس مش بشكل رسمى غير كده ما احنا شايفين سياساته الهبله اهى عامله ايه
انا مش عاوزاه وهفضل اقولها لاخر يوم فى عمرى

مـجـنـووون يقول...

رائي في موضوع أن جمال مبارك حيمسك الرائسة

حيبقي صعب شويه ومش حيبقي سهل زي ما أنت معتقد

لأن في حاجه اسمها الحرس القديم ، إلي داب وطلع عين أهله واتبهدل في خدمة الرئيس طبعا مش علشان خاطر عيونه ولكن علشان الكرسي مش حيفوت الفرصة لما تجيله
كان أكتر واحد مرشح للموضوع له وكان له قوه كبيرة هو كمال الشاذلي ، وعاطف صدقي ، ومحافظ الإسكندرية عبد السلام المحجوب ، بس طبعا لأزم كله يروح في بعيد علشان الطريق يخلي لولي العهد

أنا عارف أن حسني مش هو إلي ماسك وبرده مش جمال إلي ماسك إلي بيحرك الشعب دلوقتي هي ماما سوزان وأحمد عز

وعلي فكرة الغنوه إلي أنت حطتها حلوه قوي

تقبل جنوووني
مجنووون

قوس قزح يقول...

بص يا اسلام
انا هبص للموضوع من زاوية تانية
سيبك من مين ماسك و مين سايب
و مين واكل و مين مش واكل
المهم الشباب
اللى عايز ينجح تحت اى ظروف هينجح
لكن للاسف احنا اخدنا على اننا نتساق و نمشى زى ما الدنيا ماشية و خلاص
لو الرجل ده عامل بتاع شباب و بيشجعهم و بيعمل مشروعات
ليه منكوش احنا كمان اكيلة و نروح و ناكل معاه ونستغل الفرص اللى بيعرضها حتى لو كان هدفها لشىء تانى
ليه متاخدش فرصة شغل جاى لك بدل ما نقول الرجل ده وحش و نبعد عنه
لو كل واحد فكر لنفسه صح و بقى حاجة وقتها بس نقدر نقول ده عايزه و ده لا
لكن منبقاش راضين و نايمين فى العسل و بنتفرج و نمصمص شفايفين و عايزة ده يمشى و ده يشبع
هو فى حد اهبل هيشبع ولا هيمشى بدون سبب ؟
احنا بس اللى فاكرين كده
..............
الصور جبارة جدا
صفوت الشريف يوسوس له و هو ياكل على الجاهز :)

ana ga3an يقول...

زي ما يكون صفصف بيقولة
ياجمال هات حتة
طب سمبوسكاية
طب لحسة شوربة
قطايف بقي خلي في دم

ابوك علي امك

ندا منير يقول...

تؤتؤتؤؤتؤتؤؤتؤتؤتؤتؤتؤؤتؤ
لالالالالا
لسه بس الكلام فى السياسة وداخل فى جمال مبارك على طول
انت كدة ممكن تضر نفسك
وربنا هو القادر على حل المشاكل والازمات اللى بتمر بيها مصر واللى لسة هتمر بيها
كلامنا فى الموضوع دا عمره ما هيحل حاجة
لكن احنا كشباب ممكن نعمل حاجات تانية
لكن اننا نتكلم ان جمال مبارك ميمسكش الحكم فكلامنا مش هيغير حاجة

سومه...مجنونه فى بلد عاقل يقول...

بص يا مواطن انا كنت تبع النظريه بتاعه شبع دى بس مش كنت بقولها كدا انا كنت بقول مش حيبدا يسرق من الصفر لا حيكمل من الميت مليون وانت طالع يعنى حيوفر علينا ميت مليون جداد
ودا فى حد زاته اونجاز
ثانيا كلامك يدل على ان القزافى اذكى بمراحل من سونه ليه بقى اقولك انه عنده ولدين واحد ضده والتانى معاه عشان لو الناس بتحبه تنتخب اللى ماشى على خطاه لو بتكرهه فياخدوا اللى بيشتم فى ابوه من الاول
وبكدا ميتحرجش الراجل
ثانيا خد بالك فى الف حجه وحجه لو البلد حالها اتصلح مع عمك جيمى
مثلا
1_ان حالنا كان متدهور بزياده لكن دلوقت بقينا استقرار فحيبنى على بنى ابوه
2_الواد خريج الجامعه الامريكيه ابوه خريج الجيش المصرى ومدارس حكوميه يعنى فى فرق ثقافه وتفكير
3_دا شاب لكن دا كان كبير من يومه
4_دا متطور التانى دقه قديمه
يعنى مش حيلوث سمعه ابوه لو مسك والحال اتصلح لان فى الف حجه وحجه
وبعيد عن مين يمسك ومين يحكم انا اتمنى يجيبوا قرد يحكمنا بس ياكل الجعانين ويجوز الغلابه المساكين ويفرج عن المساجين ويحكم بالعدل ويعدل جيشنا عشان نحرر فلسطين ....الخ الخ...الخ
بعدين انت ناسى الدكتور ابنه بيطلع دكتور الحرامى ابنه بيطلع حرامى الظابط ابنه بيطلع ظابط اشمعنى سونه الغلبان ابنه مش حيمسك الرياسه ليه ملوش نفس
:))
مع السلامه يا ابو عمه مايله

سومه...مجنونه فى بلد عاقل يقول...

اه نسيت اقولك بطل حقد على الواد وسيبه ياكل بالهنا والشفا
يا باى على دى ناس

الدفاع يقول...

اسمحلى دى نظرية الناس اللى مش عايزه تشارك ولا عايزه تقول رايها اصل لما يتبنى النظريه دى فخلاص هو كده ريح نفسه
واقنع نفسه انه ده قدرنا ومفيش حاجه تتعمل
اتمنى من كل قلبى ان الناس بس يكون عندها رغبه من جواها رغبه فى اللى هما عايزينه لو الناس فعلا رغبت فى شئ صح ورغبت فى الحق من داخلها ساعتها هانبقى على اول الطريق
والمشكله مش فى مين هايمسك المشكله فى المنهج اللى هايتم اتباعه
فهل الناس عندهم رغبه فى منهج معين
ولا بس الناس كل همها تاكل وتشرب وتتجوز؟؟؟؟؟
صدقنى يا اسلام يوم مانعرف احنا عايزين منهج معين هانعرف نطبقه ازاى
تحياتى

سميرة يقول...

اسلام
انت متأكد انك بتتكلم عن مصر يعني كل دا هايحصل اكيد ولا انت نايم كالعادة
اسلام اصحى ، فوق ، احنا في مصر ولا انت بتهزر ، لا انت اكيد بتهزر مش كدا؟؟
بس اللي عجبنى في اللي هايحصل موضوع البلوجات ، يعني هايكون لي بلوج ملاكي بتاعي انا بس ، ياسلاااااااام
ياللا خلينا نقب على وش الفتة بقى كفاية كدا
:)))))))
آه انت غيرت صورة البروفايل ليه؟؟؟
لعل المانع خير ، انت كويس ؟؟
تحياتي

غير معرف يقول...

السلام عليكم
اية دة يا اسلام
جامدة حامدة اوى الصور
انت جبتها منين
وبعدين تحس انة هيشفط طبق الشوربة وبعدين هو فى حد اصلا دة لو كان انسان طبيعى يعنى بياكل السمبوسك فى بوء واحد
هو مش جيمى بردو
يعنى المفروض يعنى ياكل بايتيكيت شوية
والا الصورة الاخيرة اعتقد انها مش تبع صور العزومة بس تحس انة بردو لسة متغدى وتارسها على الاخر ومش عارف يتنفس
معلش انا كتبت كتير على الصور
بس الموضوع كويس
بس اعتقد على فكرة انو لو فعلا كويس (جيمى يعنى)مشهيدارى على اكل ابوة
دة لو هو عايز البلد تتغير يعنى
وبعدين انا حاسة انى غلطانى انى اتريأت علية
لان الاكل عورة اصلا
اسغفر الله العظيم
هو مين الاتم الى صورة الصور دى
نيرة احمد محمود

صبرني يارب يقول...

اخي الفاضل
انت مش متخيل انا استمخيت من البوست بتاعك اد ايه

لان اصلا الكلام الساذج بتاع شبع ده ولا الى نعرفه احسن من الى ما نعرفوش ولا البتنجان المخلل ده او المدألج ممكن يضحكوا به على عقل معزه

انما احنا لا لسه بدري على ما نبقى معيز

وانا معارضه واشد معارضه لجمال بصرف النظر عن شخصه ونسبه واي حاجه

الا انه امتداد لرأس الفساد ولومسك الحكم هاتبقى منظومة الفساد الى على مر 30 سنه ضربت جذورها فى الارض هاتفضل زي ما هي

انا مؤمنه انه زيد اسخم من عبيد
يعنى لو زفت مشي هايجي واحد يمكن يكون ازفت منه

لكن الفساد الاول هايموت ويبدأ فساد جديد ورور لسه على وش الارض

ولو استمر التغيير هايفضل دايما على وش الارض

انما الفساد الى ضارب جزوره فى قلب أرضنا موتهاااااااا
وموتنا والله او نحن على وشك ذلك ده بس عشان احنا حمولين .

تحياتي لك سعدت بزيارتك جداا

بنت مصريه يقول...

صباح الخير يا اسلام انت صحييت
والله اذا الرئيس جمال (باعتبار ما سيكون ولا مفر منه) هيبقى رئيس بعد ابوه فأنا اقدر ااكدلك ان احنا فعلا عيشيتنا هتبقى هنيه وفخفخينا
واحتمال احنا نفسنا نتفخفخ

وبالنسبه للشباب اللى هم ولاد ستين ف سبعين
ف دول بقى يولعوا بجاز هو فاضيلهم يا راجل ههههههههههههه
بوست جميييل
احييك يا اسلام

enjy يقول...

واحد قهوة سادة يا ابنى عشان خاطر الكلام الحلو دة........ انا مش معاهم على فكرة جمال دة راجل زى العسل وباين من اسمه اساسا انت بتتكلم فى ايه.... ما عليييييييييينا المهم الرز بلبن هيبقى بالمكسرات وللا سادة؟؟؟

بنت مصريه يقول...

انا مش موجوده ضمن المدونات الشديده يا اسلام
كده يا اسلام المفروض تعرف ان مدونتى شديده من غير ما اقولك
انا زعلت

تابعوا الجديد يقول...

مشكلة الصباغ والدكتور زعبولا
بنظرة حيادية لصديق كليهما
مدون يدعى محمد الجوهري
http://goharyblog.blogspot.com/
شوفوها ضروري

ahmed_k يقول...

ههههههههه الصور لذيذه يا إسلام
هو أيه كا بياكل زلابيا
يعني أكل وبيحللي كمان ههههههههه
والبيه صفوت عمال يبصلو في أكله ربنا يستر عليه وبطنه متوجعهوش
ولا توجعو انا مالي ههههههههههه
في دكاتره جاهزين بالمحلول جمبه هههههههه
والنظريه مش سليمه لسبب بسيط
أن البني آدم ميملاش عينه إلا التراب
ربنا يرحمنا منهم كلهم

وسبتلك تعليقات في البوستين اللي فاتو

سلااااااام يا صاحبي

MaherAlshial يقول...

شوف يا أستاذ مسألة التوريث مسألة لابد أن تخضع للتحليل السياسي يعني تخش معمل ،والكلام فيها مهم على كل المستويات ،وأنت بتطرح وجهتين نظر في منتهى الخطورة لأننا لابد أن نرسخ لدى الناس إن مسألة التوريث مرفوضة بشكل قاطع لأننا مش تراث أوعقار زي ما قال عرابي ،والأكيد إن اللي مايتسماش أسوأمن أبوه وكلاهما عدوللشعب المصري ،ويعمل ليل نهار مناوبة يعني على إذلاله وكسر إرادته ونهب آخر مليم أحمر مخروم في جيبه ،علشان كده لازم نقول لأ للتوريث في كل وقت وكل مكان لأن ما تكرر تقرر ،وربنا يورينا فيهم يوم قريب لأن أنا زعلان جدا إن في ناس غاية في الوطنية والاحترام رحلت عن عالمنا وماشافتش فيهم يوم زي الدكتور أحمد عبد الله رزة زعيم الطلاب في السبعينات والدكتور عبد الوهاب المسيري زعيم الشعب منسق كفايةوغيرهم ،يارب لوإحنا مانستاهلش الناس دي واللي زيهم أكيد كانوا يستاهلوا يشوفوا في الطغاة يوم ،بس لازم نعلم الناس تقول علشان تكسر خوفها ،لأن النظام الإجرامي جبان وبيرتعش من أقل شيء...وعندي إحساس إنها قربت قولوا يارب .

maha zein يقول...

يخرب بيت دماغك يا اسلام بقولك ايه
انا خلاص هفكر بقه اعمل رسالتي في نظرية الشبعة بعد جوعه
او نظريه داري علي ابوك يا جمال
يعني بعد اذنك طبعا
يخرب بيت دماغك فعلا
جبت منين الصور دي يا سوسة
الا بقه لو كنت شغال ويتر ولا سقا في الفندق اللى جمال طفح فيه

Dexter! يقول...

طب اتطمنا ان ابن الريس بوقه كبير

و قلبه كبير اكيد

انا حاسس ان اللي هميك مصر بعد جدو مبارك نسخه منه

سواء جمال او غيره .. هيمشينا بنفس الاسلوب

الضرب علي القفا

وربنا يكرم

اهو ده عيبه يقول...

ازيك يا اسلام
كل سنة وانت طيب
ايه الصور الغريبة دى بجد خلتنى اصدق مقوله ان الزعيم يلهط على طول
هو ده ابن الشبع ابو عين مليانه اللى حينغنغنا

الظاهر الحاج كان مضيقها عليهم وعلشان كده عايزة يمسك بداله ويكون نفسه بقى بمعرفته

تحياتى لك

Zianour يقول...

اسلام

كيف الحال

حبيت بس امر واقول لك كل عام وانت بخير

وما شاء الله مدونتك ف تطور مستمر

وفقك الله
بالنسبة بقى لجمال والشباب والاب والكلام الكبير ده فربنا كبير

والصبر على الجار السوء من الايمان
ربنا يصبرنا جميعا

كل عام وانت بخير
تحياتي

الزباين

الزباين و يا رب ابعد عننا الضرايب