السبت، 21 يونيو 2008

www.وزارات نص كوم.com

www. وزارات نص كوم . com




اقتراحات لتغيير اسماء بعض الوزارات و انشاء
اخرى جديدة
____________

وزارة التربية و التعليم : يتم تقسيمها الى وزارتين
وزارة امتحانات الثانوية العامة
و وزارة تسريب الامتحانات
و تكون برئاسة : يسرى (سفينة الصحراء) الجمل
.......................
وزارة المالية : يتم تقسيمها الى وزارتين
وزارة الضرائب
و وزارة اعلانات الضرائب
و تكون برئاسة : محمد شومان
......................

وزارة البترول : يتم ضمها مع وزارة الشباب و الرياضة
و يكون اسمها وزارة البترول و الرياضة
و ذلك بسبب اهتمامها بالرياضة اكثر من اهتمامها بالبترول
و تكون برئاسة : الكابتن سامح فهمى
.....................

وزارة الصحة و السكان : يتم الغاءها نهائيا
و ذلك لان الشعب كده كده ميت من قلة الاكل
و يتم انشاء بدل منها وزارة الوفيات و قتل السكان
و تكون برئاسة : اى حانوتى
.....................

وزارة الاتصالات : يتم اخراج وزارة مشتقة منها
ويكون اسمها وزارة قطع و مراقبة الاتصالات
و ذلك لتدخلها فى مراقبة الانترنت
و تكون برئاسة : الباشمهنذز المخبر طارق كامل
....................
وزارة السياحة : يتم تسميتها وزارة رعاية الاجانب
وذلك بعد منع المصريين من دخول الاهرامات الا فى المناسبات
و السماح للاجانب بذلك فى اى وقت
و تكون برئاسة : الكونت زهير جرانه
.....................

وزارة الداخلية : حبايبنا و منقدرش نغير الاسم
لاننا ممكن نزورها فى اى وقت و اسمها ينطبق على المواطنين بداخلها
( بيكونوا بالملابس الداخلية )
و نسمع سلام عزبنى يا معلم
و تكون برئاسة : الادميرال حليب العدلى
...................

وزارة التضامن : يتم تقسيمها الى وزارتين
وزارة الرقابة على الدقيق المدعم
و وزارة طابور العيش
و تكون برئاسة : عم احمد صاحب الفرن اللى ورا
.....................

وزارة الاعلام : يتم تسميتها وزارة الاعلانات
بجد تستحق اللقب ده عن جدارة
انا مش بشوف فى التليفزيون غير اعلانات او برامج فاشله
و تكون برئاسة : محمد بحرية صاحب وصلة الدش
....................

وزارة الخارجية : يتم تسميتها
وزارة تنسيق العلاقات الاسرائيليه
و نقول الف مبروك للسيد الرئيس راعى الشباب و الرياضة
و تكون برئاسة : اى حد يختاره الكينسيت
.....................

دا الحال بتاع بعض وزارات بلد ما على كوكب ما فى حته ما
على جنب و انت داخل يمين خبط عليهم مش حيفتحوا
ادخل على طوووووول
ESLAM
________________
تحديث
امبارح كنت فى السينما رحت فيلم نمس بوند
فيلم غير محترم بجد
لا يرقى لمستوى المشاهدة العائلية
لا يخلوا من مشهد يوجد به كلام خارج
فيلم فى قمة التفاهه
بس اللى لفت نظرى من افيهات الفيلم
افيه واحد
هو زى الجزء بتاع وزارة الداخلية اللى انا كاتبة فوق
بس مختلف بعض الشئ
هانى رمزى كان بيفتش دولاب دوللى شاهين
قالت له الجزء ده خاص بالملابس الداخلية
رد و قال لها
دا فى صميم شغلى هو انا مش داخلية
(طالع ظابط لو متعرفوش)
انصحكم بلاش تدخلوا الفيلم ده

66 قول و لا يهمك:

ٍSOU يقول...

بسم الله ما شاء الله شكلك انت اللى شارب الكرابتشينو و مخمخ فى البوست دة ...بس غريبة انت مش هتمسك حاجة فى الوزارات لية؟؟؟

ياسر حسين يقول...

أوعى الفحت
لتقع تحت
:)

خالص تحياتي

سالي محمد سالم يقول...

والنبى فكره
ابعتها للريس لو شاطر
:)

نوره الخشن ــ آي و كفاية يقول...

ااااااااه طبعاً هما فاضينلك عشان يفتحوا متدخل هى وزارة منغير بواب اصلها
بس حلوة اوي وزارة الداخلية دي جامدة مووز على فكرة وسمعني احلى طرقعة على الأفا وتحية لجناب الادميرال

حاجات جوايا يقول...

مش بقولك مش ناوى تجيبها لبر

طيب انت نسيت وزارة التجارة والصناعة
مقرها قصر عزو باشا
برئاسة حماده بيه عزو
للقيام بتصنيع لعب الأطفال الحديـــــدية

وسلملى على ماما نونا
ههههههههههه

سالى

ناجي العلي 2000 يقول...

بس انت نسيت اضافة وزارة مهمة جدا ... هي موجودة بس بشكل غير رسمي

(((((وزارة شؤون رجال الاعمال وتسهيل المسائل علي قفا الشعب))))))

الشريف / جمال طة يقول...

ياولاد أصبروا

على رأيى خالتكم الحاجه

أصبر على الرئيس السو يايرحل ياتجيله مصيبه تأخذ ه طبعا قلالة ألأدب ولسانكم طويل وحتقولوا آمين
أما انا مليش دعوة بيكم

آمين آمين آمين آمين آمين آمين أمين

appy يقول...

يا كارثه يا مصيبه عليك وعلى اللى بتعمله هههههههههههههههههههههه والله حلو بجد انا موافقه

EmY يقول...

البوست جميل جدآ جدآ و تغير الوزارات دي فكره جميله اوي و الاسماء المقترحه و النشاطات فعلآ انسب للوضع ده

تحياتي

Desert cat يقول...

زين ما فعلت تغير كل حاجه وتيجى عند الدخلية وتقف
هو انت ساكن قريب من لاظوغلى ولا ايييه
الداخلية دول ناس عسل عسل عسل
الصورة جامدة
واجمل صورة عجبتنى اللى بياخد محلول معالجة الجفاف
قصدى القهوة
اصل انا باقى لى يومين وابقى زيه بالظبط

Wael يقول...

وزارة الداخلية : حبايبنا و منقدرش نغير الاسم
لاننا ممكن نزورها فى اى وقت و اسمها ينطبق على المواطنين بداخلها ( بيكونوا بالملابس الداخلية )
و نسمع سلام عزبنى يا معلم
و تكون برئاسة : الادميرال حليب العدلى

-------

ههههههه
بوست جميل
وكالعاده : هم يضحك وهم يبكى

سومه...مجنونه فى بلد عاقل يقول...

افترى يا مفترى وكمان بتقاطعنى فى اكل عيشى يا مواطن
ماشى حوريك البلد دى ليها ريسه واحده بس وهى الى تقول التقسيم شكله ايه بس بما انك اثبتت انك بتفهم فى الوزارات مستعده اديك رئيس الوزراء وتقسم زى ما انت عاوز
تحياتى ليك سومه_87

الفارس الملثم يقول...

ههههههههههههههههه

لا بجد يوست جامد

بس تعرف اول مره اكتشف ان الباشوات اللي بيحكموا البلد مخططين لكل حاجه من زمان يعني لما سموها وزارة الداخليه كانت عالم عندها بعد نظر جامد

تسلم ايدك يا باشا

تحياتي
محمد

مواطن مصرى نايم يقول...

sou

انا مش بحب الكرابتشينو
مفيش حاجة ساقعة دايت
اما حكاية ممخمخ
و الله البوست ده اتكتب فى ربع ساعة
يعنى مفيش مخمخه و لا حاجة
لا انا الاول اشيلهم و بعد كده ابقى امسك اللى انا عاوزة
حتى لو كانت هيئة الصرف الصحى
نورتينى
eslam

مواطن مصرى نايم يقول...

ياسر حسين

واخد بالى انا يا فنان
بفحت من تحتهم برضوا
يمكن هما اللى يقعوا
تــــــحـــــــــت


تحياتى
eslam

مواطن مصرى نايم يقول...

سالى محمد سالم

و النبى برضوا فكره
الريس شكله شافها فعلا
و اتدخل فى مشكلة الثانوية العامة
و كمان فى بلاغ للنائب العام
يطالب بإستقالة يسرى الجمل
عقبال الباقى
تحياتى
eslam

مواطن مصرى نايم يقول...

نوره الخشن ــ آي و كفاية

هههههههه
ضحكتينى مع انى مش قادر اضحك
بجد انتى مشكله
و ربنا ياخد الادميرال على اللى مشغل الادميرال
على اليوم اللى الواحد اتولد فيه
تحياتى يا نوره
eslam

مواطن مصرى نايم يقول...

ام دودو

سالى
بجد عندك حق راحت منى دى
بس ممكن بقى ماما نونا تكون ماما سوزى
و ربنا على الظالم
تحياتى
eslam

مواطن مصرى نايم يقول...

ناجي العلي 2000

خلاص نسميها وزارة القفا
و كل اللى يعدى من جنبها يضربها
و ربنا على الظالم
تحياتى
eslam

مواطن مصرى نايم يقول...

الشريف / جمال طة

خلاص خالتى تمسك الرئاسة بعد
الريس السو
بعد ما نقول امين
تحياتى
eslam

مواطن مصرى نايم يقول...

appy

ايه انا بعمل ايه
انتى حتلبسينى تهمه
هو مش انتى اللى قلتى لى اعمل كده
عشان تمسكى انتى رئاسة الوزرا
لا انا من اول قفا
حقر و اعترف
و وعدتينى انى حمسك وزارة الصرف الصحى
(مفيش وزارة بالاسم ده)
تحياتى
eslam

مواطن مصرى نايم يقول...

EmY

ربنا يخليكى
اول زيارة كده ترشقى فى البوست ده
طب كانت تبقى فى حاجة طرية شوية
مش حاجة تودى فى داهية
ههههههههههه
نورتينى
تحياتى
eslam

مواطن مصرى نايم يقول...

Desert cat

اه انا ساكن جنب لاظوغلى
و شكلى حتقفش من قفايا
من العسل العسل العسل
و ربنا يستر
اما بقى صورة اللى قاعد على الكمبيوتر و بياخد محلول القهوة
دا انا
مع انى مشربتش قهوة و لا مرة فى حياتى
بالنسبة لى زيها زى السجاير
بس شكلى حشربها
نورتينى
eslam

مواطن مصرى نايم يقول...

Wael

وائل (حليب)* قلبى
فعلا (عدلى)* يبكى و (عدلى)* يضحك

واخد بالك انت
عدلى = هم
نورتنى
eslam

مواطن مصرى نايم يقول...

سومه...مجنونه فى بلد عاقل

ماشى يا ريس انا موافق
بس لعلمك انا مش بفهم فى الوزارات بس
انا بأمر الله اللى بكون عاوز اتكلم فيه
لازم اكون لامم كل المعلومات
و التفاصيل عنة
يعنى رئيس الوزراء شوية على
ممكن امسك حاجة غيرها
بنك مثلا
هههه
نورتينى يا سومة
eslam

مواطن مصرى نايم يقول...

الفارس الملثم

محمد اه فعلا عندهم بعد نظر
لدرجة انهم من كتر ما هما بيبصوا لقدام
مش شايفين الشعب خالص
الا بالملابس الداخلية
واخد بالك
تحياتى يا باشا
eslam

appy يقول...

انت يا مصيبه لك رد فى مدونه الضاحكون من خالتك فرنسا علشان تنضم لينا وتكتب وكمان تغير التمبلت روح ابعت لها على الميل بتاعها وقولها هتلاقى ميلها فى مدونتها يالا اخلص

حنين.. يقول...

ههههههههههههههههه وكل الشعب هيوافق على التغيرات الوازريه دى, والعاشره مساءا هتجى تصور والجزيره والدنيا تتقلب... بس انا لازم اطلع فى مشهد.... واقول..... انا طبعامع التغيرات الوزاريه الجديددى, وعلى كل مواطن ان يدلى بصوته حسب الماده حاجه وستين او اربعين او خمسين مش فاكره.. وان التغيرات ان شاء الله تتم فى منتهى االشفافيه....... هبدع بقى ... وتحياتى ليك...... تقبل مرررررورى

mostafa rayan يقول...

بوست جامد قوي
وبالنسبة لوزارة البيئة اعتقد ممكن يمسكها عبدة تلوث
سلاموز وتحياتي .. قصدي وزراتي

عروسة ننوسة يقول...

انت بجد ممتاز يا اسلام
صحيح كلامك يودى فى داهيه لكن بجد بتصيغ الموضوع بطريقه لذيذة وهايله

enjy يقول...

وعندك واحد بن تقيل سكر مافيش عشان الموضوع الجامد موت دة بس عايزين نقسم وزارة الصناعة قسمين قسم استيراد وبس برئاسة اى واحد صينى وقسم الحديد برئاسة احمد عز فى فيلم الشبح

ghoneem يقول...

السلام عليكم

اسلام باشا حبيب قلبي وحشني جداااااا
والله بجد زيارة مدونتك افتقدتها

وزارات مين ياعم
احنا عندنا وزير واحد ووزارة واحد بيديرها أحمد بيه عز
والباقي كله كومبارس

ربنا يريحنا من الأشكال دي

تحياتي ليك
ف انتظارك وانتظار تألقك دايماً

تحياتي ليك

semsem يقول...

اولا شكرا على التنويه اللى انت كاتبه بخصوص الفيلم جزاك الله الف خير
_____________________
نيجى بقى للبوست
يابنى بقلق عليك يابنى
يا دي النيلة احسن تتمسك يا احمد
:((((
البوست حلو مقدرش انطق ربع كلمه
وعندك حق ف كل كلمه
بس احنا خايفين عليك ياعم
اختك سمسم

نوره الخشن ــ آي و كفاية يقول...

ايه ياعم اسلام هتفضل متقوقع كده كتير
ربنا يفك ازمتك يابني

ayman badr يقول...

انا بقى همسك الوزارة المسئولة عن إقالة الوزراء
عشان امسك كل الوزارات دى واظبطها
تحياتى على البوست

كاميليا يقول...

هههههههههههههه

حلوة اوى الاسماء الجديدة

طيب والباقيين؟؟

التانيين يعنى ...

ولا بلاش

خليك فى السيف سايد

اول زيارة
وعجبنى البوست جدااا


تحياتى واحترام

شفقة هانم واحسان بك يقول...

بحيك على كلامك الجرىء

ذربونة هانم يقول...

لذيذ شكل البلوج اوى و تصميمه
و لذيذ البوست اوى

اما عن الفيلم فانا هانى رمزى مادخلوش سينما
كفايه اوى لما ييجى على التلفزيون اتفرج عليه اضيع وقت

نوره الخشن ــ آي و كفاية يقول...

ايه اللي يخليك تدخله اصلا مهو باين انو متخلف

انا بصراحة اللي دخلته واتصدمت صدمة العمر فيلم عمر حرب أخييييييييييييييييييه
هى الفكرة حلوة بس مقززة ججداً انصحك ماتكلش قبليها بيومين لو عايز تدخله

مواطن مصرى نايم يقول...

appy

شكرا يا اجمل ايبى
انا روحت و عملت اللى قلتى عليه
يا رب منتحرمش منك ابدا
eslam

مواطن مصرى نايم يقول...

حنين

لا دا انتى مش تطلعى فى مشهد
دا انتى اللى حتكونى مسئولة عن
الاحاديث الاعلامية يومها
عشان برضوا الشفافية
عينتك المتحدثة الاعلامية
كوسة اه كوسة
نورتى البلوج
تحياتى
eslam

مواطن مصرى نايم يقول...

mostafa rayan

وزارة البيئة كمان يفضل اسمها زى ما هو
لانها بيئة لوحدها
و انا موافق على عبده تلوث
تحياتى
eslam

مواطن مصرى نايم يقول...

عروسة ننوسة

ههههههههه
ربنا يخليكى
شكرا جدا على الكلام الجميل ده
بس لازم يكون حد فينا بيقول الكلام ده
حتى فى شكل هزار زى ما انا بعمل
عشان توصل بطريقة اسهل
نورتى البلوج
eslam

مواطن مصرى نايم يقول...

enjy

ههههههههههه
تعليق جامد جدا
عجبنى جدا بجد
اهم حاجة ان القهوة سكر مفيش عشان الدايت
و احمد عز مش لازم يشرب قهوة معانا بقى
لا انتى كده اسكندرانية على حق
تحياتى
eslam

مواطن مصرى نايم يقول...

ghoneem

باشا باشا
نورت البلوج
وحشتنى تعليقاتك
و يا عم انا مليش دعوة انت اللى جبت سيرة احمد عز
ههههه
انا من اول قفا حعترف عليك على طوول
نورت البلوج يا دكتور
تحياتى
eslam

مواطن مصرى نايم يقول...

semsem

ربنا يخليكى يارب
انا برضوا بقلق عليا بس مش مشكلة
الساكت عن الحق شيطان اخرس
لازم نتكلم يا سمسم
و الا انتى مش معايا
تحياتى ليكى و لكل اهل المنصورة
و شكرا على التعليق الجميل ده
eslam

مواطن مصرى نايم يقول...

نوره الخشن ــ آي و كفاية

نورة خلاص الحمد لله
انا قريب حنزل بوست ان شاء
يا رب يعجبك
و انتى كمان مش حتنزلى بوست و الا ايه
هو انتى دخلتى عمر حرب
دا انا شفت الاعلانات قلت مش حدخله
يالا مش مشكله
نورتى البلوج يا اجمل نورة
eslam

مواطن مصرى نايم يقول...

ayman badr

يا مون انت تمسك اللى عاوز تمسكه
انت تؤمر
ابقى ادينى رنه و انا امسكك الوزارة اللى انت عاوزها
بس قدم عرضحال
و انا اوقع عليه
ههههههههه
نورت البلوج يا باشا
eslam

مواطن مصرى نايم يقول...

كاميليا

نورتى البلوج بأول زيارة و إن شاء الله متكنش الاخيرة
و انا السيف سايد بالنسبة لى امر مستحيل
خلاص ما قلنا و اللى كان كان
ور بنا يخليكى يا رب على التعليق الجميل ده
تحياتى
eslam

مواطن مصرى نايم يقول...

شفقة هانم واحسان بك

و انا بحييك جدا
على تعليقك و زيارتك و بلوجك الجميل
و اسلوبك التحفة
تحياتى
eslam

مواطن مصرى نايم يقول...

ذربونة هانم

ربنا يخليكى يا دكتورة
اتفضلى البلوج اعتبريه بلوجك
نورتينى
و عندك حق فى حكاية هانى رمزى دى
تحياتى
eslam

مواطن مصرى نايم يقول...

نوره الخشن ــ آي و كفاية

انا مستنى بوستاتك
بلاش كسل بقى
و بلاش كأبه

تكملة الرد فوق

egyboy يقول...

ايه يا عم الحاجات الجامده دى انا لو منهم الغى الحكومه وخلاص


مصطفى

zOzO يقول...

انت شكلك كده يا اسلام راسم
ع 100000000 سنه ولا حاجه ف السجن

بجد حلو
بحب اقرا النقد بتاعك ده
بيعجبني اوي
تحياتي ليك

وانت عامل ايه ؟
طمنا عليك

سومه...مجنونه فى بلد عاقل يقول...

هههههههه ايه اللى موديك السيما يا مواطن
وبعدين مش تنزل التحديث فوق الموضوع مش تحت
اه الميل اهو
asmaamahaba@gmail.com
مستنيه الاضافه
سومه

نوره الخشن ــ آي و كفاية يقول...

طب ياسيدي انا مستنية جديدك وانا كمان نزلت جديدي

وياسيدي اختك ملهاش فالتليفزيون خالص وماشفتش الاعلان غير بعد مدخلت الفيلم لأني تقريباً دخلته تاني يوم عرض وكنت دخلاه انا وماما ومتخيلين انو فيلم سياسي

وأجارك الله على الصددددددددددمة

أشرف حمدي يقول...

هههههههههههههههه تمام يا حبي
حلو موضوع الوزارات ده
تخيل بجد لو محمد شومان مسك الضرايب
ههههههههههههههه
ويبقى قاعد في الوزارة لابس العمة

بالنسبة للفيلم
انت كده عملته دعاية مجانية بدون ما تدري :) انا من بعد كلامك عاوز أشوفه
بس طبعا لوحدي

بس عندك حق ، هاني رمزي بقاله كتير بيخرف

تحياتي يا باشا
وعذرا على الغياب

مواطن مصرى نايم يقول...

egyboy

نورتنى يا مصطفى
خلاص يا عم نلغى الحكونمة
من النهاردة مفيش حاكومة انا الحاكومة
اى خدمة
تحياتى
eslam

مواطن مصرى نايم يقول...

zOzO

لا يا زوزو
كل ده سجن
لا انا اتعدم احسن
هههههههه
ربنا يخليكى يا رب
هو دا نقد دى حاجات تافهه
انا مش بكون عاوز انزلها و الله
بشكرك بجد
و انا الحمد لله كويس
ربنا يخليكى
eslam

مواطن مصرى نايم يقول...

سومه...مجنونه فى بلد عاقل

ههههه
روحت السينما عشان كنت مضايق
رجعت متغاظ
ههههه
سالا اللى حصل بقى
و التحديث من المفترض انه يكون تحت
عشان راس الموضوع فوق
و انا بعت لك الدعوة
يالا بقى
اسرعى
eslam

مواطن مصرى نايم يقول...

نوره الخشن ــ آي و كفاية

ايه ده دخلتى الفيلم
لا إله الا الله
صدمة دى وكسه
هههههههه
انتى و ماما بس
طب خييييييير خييييييييير
ههههههه
انا حنزل البوست اهوه و رايح اشوف بوستك
eslam

مواطن مصرى نايم يقول...

أشرف حمدي

حبيبى يا فنان
منور البلوج
و انت ما اتأخرتش و لا حاجة

اما بقى محمد شومان
يبقى الزى الرسمى لمصلحة الضرايب
انه يكون بالعمة
و كل موظف لازم يكون لابس العمه
تبقى جامده و الله
ههههههههه

اما بقى الدعاية للفيلم
كنت ممكن تدخل انت و الاسرة كلها
لكن دلوقتى حتدخل لوحدك
يعنى فى تذكرتين
تم الغاءهم
من ايراد الفيلم
شفت بقى
و هو لعلمك موجود على النت تصوير سينما بس واضح
لا هانى رمزى بياخد سكه تانية
حتخلى الناس تفكر مائة مرة قبل دخول افلامة بعد كده

تحياتى يا اشرووووف
و ايه اخبار البطيخة
هههههههه
eslam

أشرف حمدي يقول...

هههههههه
بمناسبة البطيخة
شفت فيلم أعتقد على قناة موجا كوميدي كان فيه الراجل بتاع : ساعة تروح وساعة تيجي

نفس الراجل كان طالع مع فؤاد المهندس في مستشفى المجانين بيقول :
برّة البطيخة ,, جوه البطيخة ,, برّه البطيخة ,, هاااا ,, جوّة البطيخة
هههههههه بالصاجات برضه

مواطن مصرى نايم يقول...

اشروووووووووووف

لا انا حموت على نفسى من الضحك
بره البطيخة جوه البطيخة
دا يبقى مشهد تحفة
هههههههههههه
و صاجات
و الكرش بتاعة
هههههههههه
لا لا بجد
انا ميت من الضحك
حلو
كاريكاتير البطيخ انا شفتة جامد جدا
الله ينور

تحياتى يا باشا
eslam

dina يقول...

هههههههههههههه
و الله موضوع تحفة

مواطن مصرى نايم يقول...

dina
ربنا يخليكى
الحمد لله انه عجبك

الزباين

الزباين و يا رب ابعد عننا الضرايب