السبت، 15 مايو، 2010

لقاء تدوينى .. قديم بس ننزله بردو













كشف الحضور و الانصراف
و العهده على الراوى (فاتيما) و اللى اسمه مش مكتوب يقول
ــــــــــــــــــــــــــــــــــــــــــــــ


انجى المهم هات من الآخر : كانت عاوزة تلعب من ساعة ما جت و فالاخر رجعت البيت تعبانة و مش قادرة تتكلم حتى و فضحانى عندها فالبلوج و الاسم انها جارتى و مجرسانى اخر جرسه :D بس بجد انجى من اجدع البنات اللى ممكن تقابلهم فحياتك و طبعا بما اننا ناقر و نقير مسبناش بعض بقى الا اما رخمنا على بعض و ده اقل حاجة يعنى :D

ريم بين ضفتى عقلى : حد هادى جدا متكلمتش خمس كلمات على بعض يعنى مفتكرش حاجة غير و هى نازلة من المشروع (الميكروباص) قالت شكرا يا احمد و هى صاحبة انجى :D

فاتيما روح قلب ماما : بجد بجد بجد بجد اتبسطت جداااااااااااااااا انى شوفتها فالاول معرفتهاش و لا هى عرفتنى و فجأه بسأل عادل مين بعد ما انجى سلمت عليها قال لى دى امى فاتيما ام يوسف و انا بجد مش عاوز اقول لكم انا بحترمها اد ايه و فرحت جدا انها جت


خالد همس الاحباب : اول ما روحت لهم عند الزعيم ( كانوا بياكلوا ) فمسلمتش على حد بس و انا قاعد لقيت حد قاعد بعييييييد بيبص لى سألت عادل بردو مين قال لى خالد همس الاحباب قمت بسرعة من مكانى سلمت عليه بجد من الشخصيات اللى بحترمها جداااااا و معرفتوش بس عشان خاسس شوية

عادل البلد دى فيها حكومة : عادل بقى اصلا انا كنت رايح و معرفش حد هناك غير عادل بجد واد زى العسل بغض النظر انى شيلته و كنت هرميه فالبحر بس صعب عليا و قلت اسيبه بس بجد عسل جدا و كملنا اليوم انا و هو و سوو و وصلتهم لحد الموقف ( على الله يطمر فيكوا ) هههههههههههههه

سووو : اول ما دخلت كان منسجم فالاكل و سلمنا سلام ( نهارك سعيد ) و الحوارات دى :D كملت اليوم انا و عادل و هو و كانت لماضة معانا عند سيفانو بولو كل واحد طلب حاجة و انا و عادل طلبنا شيكولا جلاسيه و انا اول مرة اشرب البتاع ده طلع كاكاو ساقع و مروة عامر ( لماضه ) روحت و كملت انا و سوو و عادل بقى و صورتهم عند المكتبه و كده يعنى و دوخنا على قهوة عدله جمب المكتبة طبعا مفيش عشان مكان ثقافى و سياحى :D


حنين القلب : اتكملت معاها و احنا عند الشيخ وفيق حد عاقل جدااااااااا و محترم جداااااا و طيب جدااا و بجد سعدت انى اتكلمت معاها و كانت مش عرفانى و بعد كده عرفتنى و انا كمان عرفتها و اتكلمنا فكام حاجة كده


دودو عاشقة الرومانسية متكلمناش خااااااااااااالص و لا هى اصلا تاخد بالها منى بس انا اخدت بالى روحها خفيفة و بتضحك و بتهرج بس متكلمتش خالص معاها بحكم انى واد بتحرج من خيالى اصلا :D

داليا ماى كورنر : للاسف معرفش هى انهو واحده من اللى جم بس اكيد لو شوفتها هعرفها بس حد يقول لى :D - ان شاء الله فلقاء تانى

Hannooda : العيب فيا انى اتاخرت و كمان متعرفتش على كل الناس للاسف معرفش مين

ضياء بيتوفل مايند : اتعرفت عليه بعد ما طلعنا من عند الزعيم و متكلمناش كتير لان هو اصلا مش بيتكلم كتير بس حد محترم جدا بجد

م. رانيا على القدر و انا و بنتها و ابنها : التقصير منى اكيد انى معرفتهاش اسف بجد
سالى حروووف : عرفت انها حرووووف و هى ماشيه بس :D

15 قول و لا يهمك:

adel يقول...

انا مبعلقش بقالي زمان
وانتي مختفي علي الفيس و هنا من زمان
تصدق اجبرتني اعلق ياواد :)

واحشتني
واليوم من غيرك ولا يسوي ياعم بخ والله :):)

مواطن مصرى نايم يقول...

دولااااااااااا
و الله يا عم انتى واحشنى بجد جدااااا
انت ايه اخبارك
انا قلت انزل البوست ده اجدد بيه نفسى
لحد ما ارجع كدا
ناوى ارجع ان شاء الله
بس بجر رجلى واحده واحده
و اليوم ده كان من اجمل ايام حياتى و الله
و كل الناس دى وحشتنى

مهيج الجماهير يقول...

ايه يا عم الغيبة الطويلة دى
و الله وحشتنا

حمد الله على السلامة

على فكرة انا بحب اللقاءات دى جداً
ان شاء الله فى أى فرصة تانية لو عملتوا لقاء لازم تقولى

سلام

khaled يقول...

هههههههههههههه
صح النوم يا ريس
انا نسيت اللقاء ونسيت انى شفتك يا جدع
ده احنا هنعمل لقاء قريب فى اسكندرية اخر الشهر
وانت بتتكلم فى لقاء من قرن
فعلا مواطن نايم بجد ههههههههه
تسلم الايادى يا حماده
اخبارك ايه يا كبير ليك وحشة من هنا لحد بحرى رايح جاااااااى كمااااان
وحمدلله على سلامتك ونورتنا من جديد
تحياتى

همس الاحباب يقول...

على فكرة التعليق باسم khaled
ده تعليقى انا
للعلم بس

كيكى عوووووو يقول...

ايييييييييييييييييييييييييييييه
طب عووووووووووووووووو
ايه الغيبوبة الطويله دى بس!!!
ياااااااااااااه اللقاء دة من قرن ياعمونا
انجى كاتبه عليه من زمن كدة
الصور حلوة اوى بتاعت سووو وابو جودة بنضارة ايييييه حكايه
كع كع كع كع
اوعى تروح اللقاء الجاى بتاع اسكندرية لاحسن تكتب عنوا بعد سنتان ولا حاجة
ياسيدى حمد الله ع سلامتك
واهتم بقى شوية بمدونتك ومتغبش كتير اوى كدة

مواطن مصرى نايم يقول...

مهيج الجماهير

خالد واحشنى و الله يا عم جدا
ان شاء الله المرة الجاية ابقى اقول لك على اللقاء ان شاء الله

مواطن مصرى نايم يقول...

همس الاحباب

خلووووووود
اهو صحيت بقى
و الله الشغل و الدراسه مش لاقى فرصه منهم اعمل اى حاجة
اقصى حاجة بقدر اعملها انى افتح الفيسبوك
و ان شاء الله اللقاء الجاى ابقى معاكوا بردو بإذن الله
و كنت عاوز اقول لك ربنا يبارك لك على اللى بتعملوه
بجد انا فخور انى اعرفكوا و الله العظيم

مواطن مصرى نايم يقول...

كيكى عووووووووو

اييييييييييييييييييييييه
كل شوية تخضينا كدا
:D
غيبوبة من الشغل و الدراسة و الله
و اهو بحاول ارجع ربنا يسهل بس
و هروح اللقاء الجاى و ان شاء الله ابقى اكتب عليه بعد سنه واحده بس
:D
انا باعت لك ادد عالفيس يا بنتى بأسم احمد عبدالله
اجرى روحى اقبلى
:D

ahmed_k يقول...

اللقاء ده يابوحميد شكله كان في أسكندريه صح ؟؟؟
بس فعلا لقاءات المدونين بتكون غاية في المتعه والألفه
أتمنى أقابلك في أي لقاء تدويني قريب
دمت بكل خير

marmar يقول...

هوا امتى اللقاء ده؟؟
ده اللي كان في شهر واحد تقريبا؟

يلا يوووووووووم سعيد عليكم ويارب تكرروه تاني

حنين القلب يقول...

انت لسه فاكر

الف شكر ليك على كلامك الرقيق
انت اللى انسان محترم بجد وطيب جدا
واتمنى انك تنورنا اللقاء الجاى

هنستناك ماااااااااااشى

مواطن مصرى نايم يقول...

ahmed_k

واحشنى اوووووووووووى بجد يا ابو حميد
اه كان فأسكندرة اللقاء يا ريس
و يا رب اشوفك بجد المرة الجاية
فى لقاء جاى فأسكندرية يا رب ينفع تيجى

مواطن مصرى نايم يقول...

marmar

اه يا ريمو
دا اللى قلت لك عليه وقتها
يا رب المرة الجاية تبقى موجودة فيه

مواطن مصرى نايم يقول...

حنين القلب

ههههههههههههه
اه لسه فاكر
لا بس و الله انا اللى قلته دا اقل من الحقيقة
انتى بجد انسانه محترمة جدا و اتشرفت بمعرفتك
و ان شاء الله المرة الجاية اكون معاكوا بردو

الزباين

الزباين و يا رب ابعد عننا الضرايب