الجمعة، 12 ديسمبر 2008

النشرة التدوينية فى عصر المهلبيه


منعاً للتكرار
دا بوست كنت منزله ايام الامتحانات
نشره الاخبارالتدوينية فى عصر المهلبية

ــــــــــــــــــــــــــــــــــــــــــــــــــــــــــــ

(1)

هروب احد خرفان (المعارضة) من الذبح فى معركة انتخابات العيد

و فوز الخروف الاكبر بالرئاسة

ـــــــــــــــــــــــــــــــــــــــــــــــ

(2)

تم القبض على (خروف) ضال كان لسه شارب بيريل

و شاف اعلان بيريل الجديد

(اخر حاجة تعلق عليها فالبنت شخصيتها)

امال نعلق على ايه ؟؟؟

و يقولوا التحرش منتشر فالبلد

(استرجل و اشرب بيريل)

(واخد بالك يا عمر)*

ـــــــــــــــــــــــــــــــــــــــــــــــ

(3)

بعد انحطاط مستوى الاخلاق لدى بعض المدونين

قررت ادارة مكافحة المدونات

اطلاق حملة

(علمنى العوم و النبى يا احمد)

و هى تهدف الى تنمية العلاقات التدوينية فى اطار انتمائى منحدر للسلاسل الزمنية و الوقت الا معلوم فالطبيعة التدوينية

و تستضيف الاستاذ

زعبله المفش لشرح نظرية الفصل المطبخى و الحمامى فى ريسيبشن الشقة

(واخد بالك يا عمر)*

ـــــــــــــــــــــــــــــــــــــــــــــــ

(4)

بعض الاجراءات الامنية لتلافى ضرر

التدوين على العقل المصرى فى احتواء مؤسسات الدولة لعمليات الخطف العشوائى للمدونين

و تكون برئاسة السيد المبجل

حليب قلبى

(حليب العدلى)

(واخد بالك يا عمر)*

ـــــــــــــــــــــــــــــــــــــــــــــــ

(5)

اذا كنت تريد ان تصبح مدوناً مشهوراً

فتعلم ما لذ و طاب من الالفاظ الخارجة

و سب و العن فأبو اللى جابوا ام بت خالة ام اللى جابوا

اى مدون حاسس انه ممكن ياكل الجو منك

و اوعدك

امريكا حتساعدك فالموضوع ده

(المعنى فى بطن الشاعر)

(واخد بالك يا عمر)*

ـــــــــــــــــــــــــــــــــــــــــــــــ

(6)

اذا كنت انت المدون الذى لُعن ابو اللى جابوا ام بت خالت اللى جابوك

اسكت و اعمل نفسك عبيط و ادخل اضحك مع اللى شتمك عالجايكو

حتى لو كان سبب الشتيمة جملة انت كاتبها فالبروفايل

(و انا اقصد حد معين على فكرة)

(هكذا تصبح خيخة جدا و راجل يعتمد عليه)

(واخد بالك يا عمر)*

ـــــــــــــــــــــــــــــــــــــــــــــــ

(7)

بعد نجاح حملة عملنى العوم و النبى يا احمد

تقرر عمل جزء تانى لها على ان لا يتضمن هذا الجزء اى مشاهد تعذيب

على ان يقوم بإخراج هذا الجزء

المخرج خالد يوسف

و ذلك يؤكد خلو الجزء من مشاهد التعذيب

و احتواءة على مشاهد خارجة فقط

و يتم منح جائزة الخروف الذهبى للمدون المبدع

(واخد بالك يا عمر)*

ـــــــــــــــــــــــــــــــــــــــــــــــ

(8)

اذا وجدت اقبال على بلوجك

و مدح الناس ان دمك خفيف و ساخر جداا

اذاً

عليك ان

تستهبل

تستعبط

تستظرف

تتعالى

تتكبر

تتفشخر

على المدونين

(هكذا يتعامل بعض المدونين بالفعل)

(واخد بالك يا عمر)*

ــــــــــــــــــــــــــــــــــــــــــــ

(9)

اذا كنت ممن تم ذكرهم سابقا

فلماذا انت ما زلت على قيد الحياة

(الخرفان كلها اتدبحت فالعيد)

هربت انت كده

(واخد بالك يا عمر)*

ـــــــــــــــــــــــــــــــــــــــــــــــ

(10)

لو حد غلط فحد من المدونين ادخل عنده و امسح جوخ

عشان تبقى صاحبة و ينوبك من الشهرة جانب

(الفلاحة ماتت و لازم نسلم نفسنا)

(واخد بالك يا عمر)*

ـــــــــــــــــــــــــــــــــــــــــــــــ

*واخد بالك يا عمر : مقتبسة من فيلم احمد ادم الجديد

36 قول و لا يهمك:

عالم ماريونت يقول...

اسلام
كل سنة وانت طيب
بقالي فترة مش دخلت عندك معلش انا بمر بفترة غيبوبة فكرية بس الحمد لله نفسيا كويسة
===========================
عمر مين يا اسلام؟
شوف
انا فاهمة جزء كبير من الموضوع
ومع ذلك
مش حابة اللي بيحصل ده
والامام الشافعي مرة قال ان السكوت احيانا بيكون افضل من الكلام
تعالى نجرب نسكت شوية
كفاية الي قلناه
وخلينا نشوف هيحصل اية؟
اختك رنا

adel يقول...

÷ههههههه
ايه يابني انت شايل و معبي علي الاخر
و علي فكرة مش كل الخرفان اتدبحت في العيد ....ههههههه
زي ما الحيتان مش كلها بتعيش في المياه

ابقي قالي مين هيدي في الكورس بتاع علمني العوم و النبي يا احمد ... عشان انا شفت اشكال مايعلم بيها الا ربنا من ساعة ما قررت ابقي مدون .....
واخد بالك ياعمر

ههههه

عادل
http://elbald-dy.blogspot.com/

marmar يقول...

ههههههههههههههههههههههههه
حماااااادة وحشتني اوي
بس عايزة اقلك لسه في خرفان أمريكية "مصرية سابقا" مدبحتش
واللي على راسه "جايكو" يحسس عليه..
عايزة اقلك كل سنة وانت طيب عشان اكون اول واحده "كالعادة" و بوستك جاري التحميل اهو .. كلها دقائق معدودات..
واخد بالك يا حمادة

Kiara يقول...

كل سنه وانت طيب يااسلام

وربنا معاك في الامتحانات


اما عن النشره فوصلت ياباشا

صبرني يارب يقول...

نفسي تفضك من الكلام ده

ومعلش يا اسلام انا بازعل اوي من طريقة تلقيح الكلام دي

يا اخي خلي الكلام ده للحريم خلينا احنا رجاله بلاش الكلام يبقى كده يا اسلااااااااام

انا طبعا مش فاهمه اي حاجه خالص خالص لانى ما اعرفش اساسا انت بتتكلم عن مين ولا ايه

لكن مش عارفه اعمل فيك ايه بصراحه

وزعلانه اوي من الوضع الى وصله له عالم التدوين واتمنى ان الحكايه تتظبط قريب

يارب تكبروا مخكم بقىىىىىىىىىىىىىىىىىىىىىىىىىىىىىىىىىى

حاجات جوايا يقول...

هو عمر بس هياخد باله من ايه ولا من ايه ؟؟؟؟؟؟؟

ربنا يكون فى عونه

..................
ربنا يوفقك يا اسلام
وابقى طل علينا كل ما تلاقى نفسك فاضى
يمكن تلاقى المدونين قتلوا بعض ولا حاجة وحد سايبلك وصيته
(واخد بالك يا عمر )
ههههههههههههه

منتظرين عودتك
بالنجاح ان شاء الله

... amr يقول...

وعندك واحد تورتة بالايس كريم محلاة برقائق من الشكلولاتة البيضاااا للمعلم صاحب القهوة ... بسرررررررررررررررررررعة يا جدعاااااااااااااااااااااااااااااان

كل سنة و انت طيب يا معلم .. وبمناسبة هذة المناسبة السعيدة .. احب ابلغ سياتك ان جميع طلبات الناس اللي جاية تهني هنا عندي :) .. و عقبال 100000000000000000 يا معلم

Empress appy يقول...

اولا كل سنه وانت طيب يا كميله كبرتى اهو يا لهوى وزعلان انى بقولك اختى دى اكبر منك كمان
كل سنه وانت جدع واقرب لربنا يا اسلام
اما عن البوست بقى
اممممممممممممم انتهتظلم الخرفان يا اسلام ولا ايه مش قولنا الخرفان بتفهم
بس اموت واعرف عمر مين ده
ان شاء الله اعدمه يا رب اذا كنت عارفه عمر مين يا ابنى بطل الالغاز دى الناس بتفتكر انى فاهمه وبتكلم وبيزعلوا منى وانا ان شاء الله اعدمهم ما فاهمه هههههههههه
الاصطباحه بقى

سميرة يقول...

كل سنة وانت طيب

ربنا معاك وشد حيلك وركز في المذاكرة

لو احتجت اي مراجعة احنا في الخدمة

تحياتي

maha zein يقول...

يخرب بيت دماغك بجد
يا ابن اللذينا
بوست فعلا مزااااااااااااااااج
عجبتني كام حتة فيه كده انما ايه

شطور
بص يا ابني بقه نصيحة من الدكتورة مها امو دم شربات العسل السكر
افصل النت احسنلك بدل ما اجي اقطعه عليك واولع في الراجل بتاع النت هو والسيرفر بتاعه

ادخل ذاكر يا احمد احسنلك
نهارك شكله هيقلب معايا

هيكون ليك وحشة بجد
وعيد ميلاد سعيد بجد
هابي بيرزداي تويو ياكلك قطر
هابي بيرزداي تو يو ياكلك قطر
والى اخر الاغنية بقه

اروح فين واجي منين انا دلوقت

صدى الصمت - عاشقة الورد - يقول...

بوست جميل قوى وكلة مواعظ وعبر
كل سنة وانت طيب وعقبال 100سنة ونشوفك بعد الإمتحانات إن شاء الله

مهرة سالم يقول...

السلام عليكم....
كل عام وأنت بخير ....
و إلى الله أقرب...
..........
الله يوفقك وترجع بالسلامه..
........
دمت بخير

mido يقول...

أيوة واخد بالى

:)

سالي محمد يقول...

kol sana wenta taib
w 3obale ya rab lma azaker ana kman
3la fekra 3ed melade 31
;)

Unknown يقول...

كل سنة وانت طيب يا اسلاااااااام عقبال يا اخويا متبقى مدون مشهور اد الدنيا وسع كدة شوية يا عمر....حلو البوست قوى يا لهويييييييييي وعندك واحد جاتوه وواحد حاجة ساقعة بييييييييييييييييييييبس

Unknown يقول...

قوم ذاكر يااااااااااااض....الله يصلح حالك قوم قوم محدش هينفعك يا ابنى..قوووووووووووووم انت لسة هتقرا باقى التعليق؟

Unknown يقول...

شوف الوااااااااد قاعد يقرا باقى التعليقات انا مش قلت قوم؟؟ قلت وللا مقولتش انا؟

Unknown يقول...

اه قول كدة...عامل مودريشن عشان كل شوية رايح فين يا اسلام؟ قايم اشرب يا ماما...رايح فين يا اسلام؟ هجيب شندوتش يا ماما...رايح فين يا اسلام رايح انشر التعليقات ياماما...اتدلع اتدلع

mohamed ghalia يقول...

كل سنة وانت طيب
بالتوفيق فى الإمتحنات
دعواتك بقى لينا واحنا كمان هندعيلك بإذن الله
دمت فى حفظ الله

Unknown يقول...

هابى بيرث داى اسلام....قال يعنى معلقتش قبل كدة وقرفتك (وش بيغمز) كل سنة وانت طيب وعايزة تورتة من عند كلاسيك او شهد الملكة وبلاش مانا عشان غالى..كل سنة وانت زى الفل

kochia يقول...

كل سنة وانت طيب
وامتحن وتعالي .. متتاخرش

تحياتي

حاجات جوايا يقول...

كل سنة وانت طيب يا اسلام
خلاص يا عم بلغت سن الرشد اهه محدش قدك

عقبال 100 سنة يارب

Unknown يقول...

اسلام انا بجد مبسوطة انك مش بتنشر التعليقات معناها انك مركز فى المذاكرة ربنا يوفقك يا اسلام ياااارب...الا قوللى اختك امتحنت شفوى عند مين؟؟؟ عندى امتحان بكرة وبعده وجاية اعلق عنك واقوللك ذاكر شوفتش تناحة كدة

šσяšαяαα يقول...

تصدق فعلا انا ناوية اقوم اعملى واحد نيسكافية عشان امخمخ فى التعليق وفباقى التعليقات عند باقى الاخوة والاخوات
ماهى دى ضريبة الغيبة الطويلة ياولدى
عااااااااا

ماعلينا ندخل فى التعليق

اولا واضح من الحديت انك طالب وانا عارفة اد ايه المذاكرة واعرة جوى فربنا معاك وشد حيلك وحاااااااول على اد ماتقدر تتجنب لعنة الانترنت والتدوين فى هذه الايام شديدة الخطورة
بس واضح من الصورة اللى ناشرها فى البوست ان عندك مقدرة على التحمل والثبات والعزيمة ومش هاتهوب النواحيدى غير لما ربنا يعدى الامتحانات على خير

ثانيا بقى انا بحيى الاخ عمر اللى هو بطل اخبارك المهلبية واحيى كمان دماغك العبقرية على هذه التقراير الاخبارية

وثالثا بقى انا بقول امشى احسن لان الرغى الكتير بيؤدى الى عواقب كثيرة

وان شاء الله ربنا هيوفقك وتسمعنا اخبار جميلة عن النتيجة..سلامات

šσяšαяαα يقول...

اااااسفة جدا بس عاوزة اكتب جملة صوغنونة

عيد سعيد ويجعله عامر دايما
واتمنالك كل خير

وبس:)

شفـقــة و إحســــان يقول...

كل سنة وانت طيب اولا
وهتوحشنا جدا ثانيا بس ذاكر كويس
وبطل تناقر فى المدونين ثالثا وبطل مشاغبة
واخد بالك يا عمر؟؟

Zika يقول...

حلوه اوي حكاية واخد بالك يا عمر دي :D:D:D:D:D:D
انا بقالي كتير جدا ما جتش هنا
واديني جيت حبيبي واديني جيت
وانا عمال اقول
القهوه منوره ليه
* واخد بالك يا عمر

بنت مصريه يقول...

ههههههههههههههههههههه
ايه يا اسلام البوست التحفه ده
يخرب بيت عقلك ضحكتنى وانا متضايقه

انا زعلانه انك ما بقتش تزورنى

Unknown يقول...

كل سنة و انت طيب

و ربنا يوفقك الأمتحاناك فى أنتظارك يا عزيزى

آه وكفى يقول...

اسلام انت بئيت شرير اوي جدا خالص على فكرة هههههههههههههههههه

Asmaa Fathi يقول...

مين عمر فعلا

انت اسلوبك ساخر وفعلا مميز بس قننه شويه


تقبل تحياتى

هــو..مش ..نـو يقول...

عم فشكول بيقول انه بيحب اللحمه
لحمه ايه؟
والدم في غزه سايل...
ولا حتي بنتكب لهم رسايل..
تقوي عزمهم ...ومين قايل؟
...قبر يلمنا كلنـــــــــا*

قوس قزح يقول...

كل سنة وانت طيب

و ربنا معاك و مع عمر :)

Brave Heart يقول...

kol sana wnta tayeb ya islam basha
w32bak 100 sana isa
wrabena ywaf2ak fel exams

شفـقــة و إحســــان يقول...

انت فين يا عم اسلام
كل ده امتحانات
عموما حبينا نسلم ونسال على اخبارك
ومستنينك بعد الامتحانات

مواطن مصرى نايم يقول...

وحشتووووووووونى كلكم
بجد كلكم وحشتوووووونى
انا لسه فاضل لى مادة واحدة و حخلص امتحانات
اسود و اسوء امتحانات مرت عليا
الحمدلله على كل حال
الف شكر ليكم كلكم يا جماعة
انا راجع قريب بإذن الله
ادعولى
كلها يومين بالكتير ان شاء الله
شكرا جدااااااااا لكل اللى سأل عليا و اللى مسألش بردو
تحياتى للجميع

الزباين

الزباين و يا رب ابعد عننا الضرايب