الثلاثاء، 14 أكتوبر 2008

ارجو منكم ربط الاحزمة..حيجيلنا هبوط يعنى حيجيلنا هبوط

اقول لكم يا بشر
انا ممكن كنت اتكتم خالص عن السياسه اصلا
بس مش عارف امسك لسانى
و بعد توصيات من اغلب اللى بتعامل معاهم انى مزودها و لازم اكتب عن البطيخ و القرع العسل بدل السياسه
لكن دماغ الصعيدى بتاعتى مش عارف اشيل الصدى بتاع السياسه من عليها

فقررت انى حكتب بقى و ليكن ما يكون

فى مدح الوزارة الجديده القادمة بإذن الله اقول :
قبل البدء
ارجو منكم ربط الاحزمة..حيجيلنا هبوط يعنى حيجيلنا
عشان كده نربط الحزام
و نقول سيرى يا نورمندى على بركة الله
و بما اننا عارفين ان النتيجه غرق نورمندى تو
اذن انا مش حركب فمركب الوزارة دى من الاول كده
و انا عاوز حق التذكرة بس
و الله لو اخدت حق التذكرة حسيبهالهم يلعبوا فيها مساكة و استغماية
اروح اعمل قرشين و ارجع العب معاهم كيكا عالعالى و كيكا عالواطى
و طبعا كلنا عارفين مين الواطى

بعد المقدمة الدسمة دى اللى بطعم القرع اقول لكم يا حبايبى الوزارة الجديدة اكيد متمكنة من صينية الكوسة

التوقعات يا بشر للوزارة ان اللى حيمسك المرة دى الوزارة رجل عسكرى
زى مين يا شطار
(طنطاوى)
اه هو
بتاع الدفاع شوفتوا
بتاع الدفاع حيمسك وزارة على اساس ان الشعب كله بقى قوات مسلحه
ايون و السلاح بتاعى انا جوه فالدولاب
و بعدين زى ما نجحوا فأزمة العيش لازم ياكلوا عيش على قفانا برضوا
ـــــــــــــــــــــــــــــــــــــــــــــــــــ
و فى 8 وزارت من الموجودين مش حيكملوا
من ابرزهم :
رشيد محمد رشيد
(بعد ما كان من المتوقع انه يمسك رئاسة الوزراء لكن هو رافض على حد زعمه)
خير و بركة
**********
عائشة عبد الهادى
(بالسلامة يا حاجة حتوحشينا يا ترى عقد العمل ايه اخباره معاكى)
قطه...خربش على رأى اعلان ميلودى
**********
المغربى
( سكة اللى ما يرجعش يا معلم)
هو احنا عارفين نجيب شقه يا خبؤ قال وزير الاسكان قال اخلع ياض
**********
زهير جرانة
( السياح بيسلموا عليك يا باشا و بيقولولك شكرا عالخطف كان متعة )
سياحة ايه دى , امسك سياحه كفر البطيخ ; عشان تبقى قرعة او حمرا
**********
يسرى الجمل
( اركب الجمل درجن درجن و اتجمل درجن درجن)
حكسر وراك قلل الدنيا كلها , امشى امشى دا انت فاشل
**********
هانى هلال
( ما لسه بدرى يا ريس من ساعة ما انت مسكت المصاريف فالكلية عندى زادت خمس اضعاف)
انت معلم
**********
ابو الغيط
(حياخد ابنه الغيط فإيده و يلم عزاله و يسيب الوزارة للى حيخرب العلاقات اكتر و يطاطى اكتر)
الراجل ذوق الصراحة
ـــــــــــــــــــــــــــــــــــــــــــــــــ
المفاجأة بقى ان ده الكلام اللى هما بيحاولوا ينشروه و ده ليه عشان تعدى علينا السنة الماليه اللى بدأت من شهر سبعة و مش عارفين الموازنة العامة بتتناقش و الا لا فمجلس الشعب يعنى بيصرفوا فلوس و هما ممكن ميكملوش يعنى الوزارة اللى حتمسك ان شاء الله
حتمسك و الميزانة ناقصة و طبعا اول سنه حتروح من ايديهم عشان مش هما اللى حاطين الموازنة
لا و ايه كمان
فى تشكيل وزارى فالاستخبوص غير بتاع طنطاوى بتاع واحد عسكرى برضوا
بس خليها بظروفها
بلاش افتح كل الورق دلوقتى
كفايه كده


37 قول و لا يهمك:

Empress appy يقول...

ههههههههههخخخخخخخخ
انت بتجيب النتيجه من الكنتبرول هههههههههه
طيب واونكل عادلي النبى لو قولت هيروح مارينا لاعمل فرح على بلوج سبوت واخواته

كـــيــــــــارا يقول...

ههههههههههههههههههههه

مفيش فايده

سعد زغلول حبيبي قالها

نحمل ايه بقي

اسلام ملوش حل لسانه شغااااااااااال


------

استايل حلو بس نفسي اعرف تقيل لييييييييه بيهنج الصفحه حلوب تخففه شويه

تحياتي

كيارا

مواطن مصرى نايم يقول...

ابى
ــــ
هههههههههههه
اه من الكنترول
لا بتصل بخدمة عملاء فودافون من اول قلم بيقولوا كل حاجة
بس العادلى مينفعش يمشى الا اما ربنا يفتكره
ربنا عالظالم بقى

مواطن مصرى نايم يقول...

كيارا
ـــــ
هههههههههههههه
اه مفيش فايده
بس سعد زغلول مقلهاش على الشعب المصرى
دا قالها على مرضة و اتفهمت غلط و الله
و حظبط الاستايل حاضر
انا فعلا لسه بظبط فيه

أحمد (زوج مخنوق ). يقول...

ههههههههههههههه
واضح انهم استشاروك قبل التعديل الوزاري الجديد علشان كده بتتكلم بالثقة دي

طب طالما انت واصل كده تكسبش فينا ثواب و تشوفلنا شقة من بتوع الشباب اللى ما اعرفش بيوزعوهم على مين دول؟؟

مواطن مصرى نايم يقول...

زوج مخنوق
ـــــــــــ
بما انى واصل اوووووى بقى كده
بقولك ما تشوف لنا انا و انت حد يجيب لنا شقة من بتوع الشباب برضوا اصلى برضوا مش عارف بيوزعوهم فين
ههههههههههههههه
لا هى مش ثقة و الله ابدا
بس دا تحليل موقفى للوضع الراهن
و بعد المعلومات من مصادر موثوق منها
على كلام من الصحفى و الكاتب اللى انا بحترمة جدا
احمد المسلمانى
بس الايام قريبه ربنا يسهل
و نشوف الوزارة حيكون شكلها ايه
ربنا يستر علينا بقى

نورتنى

على فكرة انا كنت عندك و انت بتعلق عندى
و كنت لسه بقرء من اول بوست (اول مرة)

و حكمل الباقى

تحياتى ليك يا ريس

zOzO يقول...

اسلوبك كالعاده حلو اوي يا اسلام بجد
وعندك حق
بس زي ما بيقولوا ما باليد حيله
اهو بنحاول
وربنا معانا

دمت بكل خير
وربنا يوفقك

zOzO يقول...

اه معلش
نسيت اربط الحزام
ههههههههههههههههه
خلاص ربطته
تقدر تقلع بالطياره بقي
يا حضرت الكابتن

مواطن مصرى نايم يقول...

زوزو
ـــــ
و الله يا زهرة انا عن نفسى و الله مش بشوف اسلوبى حلو بحس انى بعك
هههههههههههه
اه و الله
بس الحمد لله

و ما باليد حيلة فعلا
ربنا يتولانا
بس احنا بنعمل اللى علينا بقى

مواطن مصرى نايم يقول...

زوزو
ـــــ
هههههههههههههههه
ههههههههههههههههه
حاضر حقلع بالطيارة
حالا بس ربنا يستر اصلى بركب عجل بالعافيه تخيلى بقى لو ركبت طيارة
ممكن تتقلب موتوسيكل اصلا
هههههههههههه

كيكى عوووووو يقول...

ههههههههههههههههههههههه
عاجبنى اوى الاغانى الى انت حاططها لكل وزير فعلا الصراحة راحة والواحد مينفعش يكتم فى نفسة اكتر من كدة
بس على فكرة احنا الهبوط جايلنا من زمان اوى..ولازم كلنا نهدى نفسنا لان العيد الصغير بيجئ قبل العيد الكبير والسكر والضغط بقى منتشرين اوى اليومين دول بقول ماركة مسجلة ولا اية يا ارمط
هههههههههههههههههههه
والله توقعاتك ولا التوقعات المرئية
ههههههههههههههههه بجد احيك على اسلوبك الساخر دة
دومت فى حفظ الرحمن
عوووووووووووووووووووووو

مواطن مصرى نايم يقول...

كيكى
ـــــ
دايما كده بترعبينى
ارمط برضوا
ارمط دا واصل اصلا ميعرفش غير الناس اللى زى بوش و العالم دى
لكن انا لسه مش واصل اووووى
هههههههههههههههه
و العيد الصغير جه
فاضل العيد الكبير
هههههههههههه

Zianour يقول...

ههههههههههههههه

مين اللي اداك النتيجة دي؟؟؟؟
اوعى تكون بعتنا يا اسلام مقابل نشر المعلومات "ايكسكلوزيف" زي عمرو اديب الله يخلي له الخبير الامني احمد .... ايه؟؟؟؟
نسيت

المهم هما بيتعبوا نفسيهم ليه يمشوها من منازلهم بلا وزارة بلا وجع دماغ

انا بس خايفة عليك
:))))

maha zein يقول...

انت شكلك شغال معاهم يا جدع انت
متنهار واعترف بقه
ايه
جتلك الاخبار منين يا عم
ما تقول وريحنا
انا مش مرتحالك
ايون
شكلك كده من الومساد
من المخابرات
من الجيش
مش عرفالك
ادوك كام
هه
ادوك كام
بعت بلدك بكام
قول
قول وانا ابيع انا راخرة
اه يا نايم
اه
روح يا شيخ
وتعالا بسرعة
قال بلاش اكشف ورقي قال
ما خلاص
كله انكشف

mohamed ghalia يقول...

أخى العزيز
واضح إنك نسيت مكان أحمد عز فى لوزارة
أكيد ليه نصيب فى الكحكة
يلا الراجل غلبان غليه يلهف شوية كمان
تحياتى
وإعجابى

شفـقــة و إحســــان يقول...

انا مش هدخل عندك تانى يا اسلام ايون انت هتودينا فى داهية يا راجل
كفياك سوياسة بقى وشفلك حاجة تانية تسترزق منها عيش بدل الضرب لحد ما تقول حقى برقبتى
وبعدين احنا هنكروت روح شوف البوست بدل ما تعلق على العنوان بس

غير معرف يقول...

أنا سمعت أن حبيل العاهري سقط وناوي يعمل بنصيحتي ويلبس جلابية المطاهرين علشان مايتلطش ويسرح بعربية سوبيا أو تين شوكي على الكورنيش- ممكن برضه عربية درة مشوي- بس والنبي إللي نفسه في سوبيا العاهري يبقى يخليه يحلق شعره ده إللي بينيمه بحدوته وبيفرده تحت المرتبة

Unknown يقول...

اسلااااااااااااااام واحد قهوة سادة من غير سكر وحياة الاخوة اللى بينا...انت تحفة يا لهويييييييي ال8وزارات تعليقاتك عليهم مش معقول وخصوصا الخطف كان متعة والله ضحكت لما تعبت...هم يضحك وهم يجيب الفالج(اللى هو الشلل مالكش دعوة باللغة اللى انا بقولها دى خليك انت احسن)... الا قوللى يا اسلام مفيش وزير جديد كدة هيمسك ايتها حاجة فى ايتها وزارة وتكون وظيفته انه يعلم الشعب يبطل بذخ؟؟؟؟ اصل احنا مبذرين قوى يا جدع والله حاجة غريبة غريبة.... صبح صبح ومستنية القهوة

Unknown يقول...

اوعى الطيارة تقلع قبل ما اشرب القهوة يا واد يا اسلام... اه نسيت اقولك ان مصاريف كليتى كل سنة تزيد عن اللى قبلها لا وتلاقى الابداع فى اقصى صوره لما يقسموا الكتب حبة مدعم ورقه اصفر وكئيب وحبة مش مدعم بجلدة حلوة كدة والوان مسخرة يا معلم لا وايه امعانا فى المسخرة المدعم بطوابير.... الله يكرمنا بقى ويرحمنا ويعديها على خيييييييييييييييييييير....فين القهوة يا ابنى الطيارة هتقوم خلاص

مواطن مصرى نايم يقول...

زيانور
ــــــــــــ
الخبير الامنى
بتاع عمرو اديب مش احمد ضياء الدين
هو سامح سيف اليزل
احمد ضياء الدين ده محافظ المنيا دلوقتى
انا خايف اصحى الاقى عم احمد صاحب الفرن بقى وزير التموين
هههههههههههههههههه
انا نفسى خايف عليا
ههههههههههه
بس ان شاء الله خير

منورانى ديما يا ام (نور و زياد) ربنا يبارك لك فيم يا رب

مواطن مصرى نايم يقول...

مها زين
ـــــــــــــ
شغال مع مين يا دكتور
انا بنهار اهوه
بس اعترف على مين و انا اعترف فورا
و لا انا مرتاح لنفسى اصلا
هههههههههههههه
اه انا بشتغل مع عم برعى صاحب محل البمب اللى ورا
عارفه لو ادونى فلوس كنت سبت البلد اصلا مش حقعد اكتب بوست
ههههههههههههههه
حشوف مشترى ياخد نصيبك فالبلد حاضر
و ما زال الورق فالدرج
ورق الكورسات طبعا

مواطن مصرى نايم يقول...

mohamed ghalia
ــــــــــــ
لا احمد عز مينفعش يبقى فوزارة
لان لو ده حصل يبقى الحزب الوطنى بيقع خلاص
لان الناس و الرأى العام مش حيسكت
بس هو كده من وضعه ده متمكن اكتر من كونة وزير على فكرة

مواطن مصرى نايم يقول...

زيزو باشا
ـــــــــــــ
ههههههههههههههههه
و الله انا بحب السوبيا بس لو منه يبقى تغور السوبيا
و الله اقاطع كل المشروبات لو الدرة و الترمس كمان و ممكن كمان منزلش عالكورنيش اصلا
هههههههههههههههه
و الله عندك حق فحكاية الشعر بس
يا ريس هو لو ساب الوزارة ممكن نتنازل عن حلق الشعر دى
ربنا يتولانا يا كبير
منورنى ديما يا باشا
بس سيب العادلى يتلط
ههههههههههههه

مواطن مصرى نايم يقول...

انجى
ــــــــ
بقى بذمتك الفالج يعنى الشلل ؟؟
و الله يا شيخة دا انا بحسبه حاجه حلوة
زى الفوندام مثلا
ههههههههههههههه
لا وزير تبطيل البذخ ده معتقدش
هو مشغلين اعلانات احسبها صح تعيشها صح
دى بتقوم بالدور ده
ههههههههههه
انا عن نفسى مبذر اه و بتضايق من البذر اوى
بيدخل بين سنانى
لا الطيارة مش حتقلع اصلها بتتكسف تقلع قدام ناس غريبه
ههههههههههههههههه
و القهوة جايه فالسكه

صبرني يارب يقول...

طبيعى على فكره

مش لازم يجيب حد يمسك الشعب ده من زمارة رقابته ويديه على قلبه كويس

مش الواحد لما بيجى يدبح لازم يكتف الدبيحه كويس

اصل الروح حلوه برضه

مش الشعب فيه اضرابات واعتصمات ومدونين وثورات مكتومه
طيب اخنق بقى ام الشعب على كده

وصدقنى ما دام راس الافعى موجوده يغيروا بقى الديول على اد ما يغيروا هاتفض زي ماهي القصه

تحياتي لك

اهو ده عيبه يقول...

دى بقت خل يااسلام ياخويا
وصلت لطنطاوى كمان
ولا هى الداخلية مبقتش ملاحقه تكمم الناس ازاى فقالوا يقضوا عليهم خالص
ربنا يرحمنا برحمته

سميرة يقول...

اسلام
اولا وقبل كل شئ مبروووووك ع اللوك الجديد
ثانياً: هو انت جبت النتيجة دي من كنترول المدرسة عندي ولا ايه؟؟؟
ولا ورئاسة الوزارة فيها برضه كنترول زينا ، وفيه غش وحركات :)))
بس تعرف احلى حاجة ان اللي هايمسك الوزارة "طنطاوي" ، ايون ماتبصليش كدا....
دا هايظبط البلد يابني
يعني الشعب كله هايخش الجيش ، وهانكون جميعا مجندين ، يعني هاركب الاتوبيس ببلالالالالالالاش ، وكمان هايكون فاااااضي الصبح ، وممكن توك توك كمان لان الشعب بيعمل طابور الصباح ،

بس تعرف البلد رايحة للأسوأ بجد ، مع اني مش متابعة زيك يااسلام ، بس انا شايفة الناس معايا في الشغل عاملين ازاي ؟ وتعبانين وخلاص مش قادرين يستحملوا اللي بيحصل
زهقنااااااااا

كفاية كدا بقى تعليق اصلي لسة جاية م المدرسة وقلت ادخل اشوف اسلام كاتب ايه؟ ويادوب الحق الشغلانة التانية يعني طحن طول النهار
تحياتي

نيرة و منةالله يقول...

ههههههههههههههههههههههههههه
ايه يابنى دة
انت فايق اوى اوى
عموما نفسى بجد الحال يتغير للأحسن احسن كدة الواحد خلاص اتخنق اوى واى ومش عارفين المصير هيودينا لفين
اه صحيح
انا عملت مدونة زى مانت شايف بس لسة مكتبتش حاجة هكتب قريب ان شاء الله
نيرة

كـــيــــــــارا يقول...

بس سعد زغلول مقلهاش على الشعب المصرى
دا قالها على مرضة و اتفهمت غلط و الله

----------

عارفه يااسلام انه قالها لصفيه زوجته لما بيقولها مفيش فايده ياصفيه

بس كتير بقي فسرها علي هواه

سعد ده حبيبي وعشت اقراه عنه كتير


-------

بس لسه الاستايل تقيل هو خف شويه بس لسه اتصرف يلا

Asmaa mahaba يقول...

تصدق بايه انت لازم تتعليق يا اسلام ولو قالولى اسلام راح مارينا حفرح فيك يعنى يرضيك تسوأ سمعه البطيخ
وتحطها بالمفتشر كدا

غير معرف يقول...

اسمع يا اسلام ان مكنتش تبطل عمايلك دى حنوديك الصين نشدلك عينك
عشان تحرم

ندا منير يقول...

يا اسلام سيب الحزب الوطنى فى حاله بقى
وسيب الوزراء فى حالها

حرام عليك دول هيستقيلوا كلهم بسببك
ههههههههههه

طبعا انا بهزر اتكلم براحتك عادى جدا
متخافشى احنا ستر وغطى عليك
انا صحيح حزب وطنى
وصحيح فى جمعية تبع حزب وطنى
بس برده متخافشى
انا ستر عليك
اوعى تخاف

ههههههههههههه

اهالينا زهقوا يربونا يقول...

عثلللللللللللللللللل والنبي عثللللللللل

دمك شربات يا مضروب

هنضيفك عندنا بقه لو تسمح

سامو عليكو

كـــيــــــــارا يقول...

مالك يااسلالام ايه ده قفلتها ليه

في ايه طما يبني

مش ينفع تكون مخنوق وتقوم قافل الدنيا كده

ربنا معاك يااااااااارب

شفـقــة و إحســــان يقول...

فينك يا راجل الون شكله واخد حقه وزيادة
ما تغيبش احنا منقدرش نبعد عن رخامتك
ههههههههههههههههههههههه

ahmed_k يقول...

أيه يا إسلام مالك ؟؟
ربنا يحققلك كل ما تتمني
بس تغلق المدونه ليه؟
ياريت متطولش الغياب عننا يا سلم
أصبحت مهم لينا في عالم التدوين
ومدونتك ليها طعم خاص
فمتحرمناش من الإستمتاع بما تكتب

في إنتظارك سريعا

حاجات جوايا يقول...

خبط خبط يا اسلام
ناولنى الحزام بسرعة لحسن باين الهبوط جانى

دى هتبقى مراجيح يا معلم
هههههههههههههه


قافل المدونة ليه يا اسلام
هو انا كل ما ارجع تختفى
انت قاصدها معايا بقى !!!!!!!!
ربنا يفرج همك وهمنا وهم المسلمين ياااااااااارب

ارجع بسرعة بقى ده انا دعيتلك يا راجل

مستنينك اهه

أجمل تحية

سالى

الزباين

الزباين و يا رب ابعد عننا الضرايب