قهوة : نام يا مصرى: يا ريس..كل سنه و انت طيب (الريس متقال) طبعا

الثلاثاء، 30 سبتمبر 2008

يا ريس..كل سنه و انت طيب (الريس متقال) طبعا

عيد سعيد عليكم كلكم و بلاش انا بقى
كل واحد يخلى باله من الكحك بتاعة
و اوعى الغريبه تتفرفت منك دى فيها سمنه و حتبهدل البيت
بسكوت بقى و بيتى فور و سابليه..استغفر الله العظيم
(البتى فور رجس من عمل الفران)
ـــــــــــــــــــــــــــــــــــــ
و الله ذكرياتى فالعيد كتير اوى ححكى لكم منها يجى خماشر تمناشر موقف
ياااااااااااااه..ايام بقى........مش فاكر دلوقتى منهم و لا موقف
لما افتكر بقى..
ـــــــــــــــــــــــــــــــــــــ
لما تبقى مستنى العيديه من حد و ينسى يديك العيديه..بينك و بين نفسك قول زى ما سعد زغلول قال..مفيش فايده
حتلاقى اللى ناسى يديك العيديه بيرد عليك زى مصطفى كامل ما قال..لا يأس مع الحياة و لا (حياة لمن تنادى)..
ـــــــــــــــــــــــــــــــــــــ
احب ارسل سلام مغلف بالسوليفان الاحمر للاخ العقيد معمر القذافى قائد الثورة الليبيه و احب اقوله..(بلاش حشيش فالعيد يا ريس فوق بقى) ..خلى سيف ابنك ياخد فرصته يا كبير و اشترى له باكت بانجو.
ـــــــــــــــــــــــــــــــــــــ
احب ارسل اتنين كيلو و ربع بيتى فور للقائد الاعلى للقوات المسلحه السنغافورية و اقوله ارحمنا يا ريس..مش عارفين ناكل حاجة عارف السبب ؟؟..اكيد محتارين ناكل (باتيه) و الا (كرواسون)..يا ريت الدعم يضم كروت شحن الموبايل يا ريس فئه المائة جنيه.
ـــــــــــــــــــــــــــــــــــــ
و سلام شحت محط خالى من البزر و كمان دايت لسيده سنغافورة الاولى..و احب اقول لها ماما كريمة مختار بتسلم عليكى و بتقولك مشروع تنظيم الاسرة نجح يا ماما و الكثافة السكانيه بتقل و ده عن طريق تنظيم الاسرة طبعا اللى برنامجها ضم (حادثة العبارة – و حادثة الدويقة – و حريق قصر ثقافة بنى سويف – و حريق قطار الصعيد – و عمارة لوران فاسكندرية – و حادثه مطروح – و ما زال البرنامج مستمر )..الشعب بيقل يا ماما.. و الخير كتير فالبلد..(اه يا بلد)
ـــــــــــــــــــــــــــــــــــــ
سلام حاير طاير لحليب قلبى راعى الشباب و الرياضة اللى كان ماسك علم مصر فبطولة افريقيا و كان بيشجع من قلبه د/احمد نظيف..
و احب اقوله هو احنا مش حنشوفك تانى غير فبطوله افريقيا يا كبير..ما تيجى تخرج معانا فالعيد..ندخل سينما فيلم

(خربوها و قعدوا على تلها)

..فكر فالموضوع ده و موبايلات بقى.
ـــــــــــــــــــــــــــــــــــــ
و سلام صامت من غير كلام و احب اسمع سلام فتشنى يا معلم و اقول ل د/يوسف بطرس غالى..افوترك و الا اظبطتك يا باشا..انا داخل السينما فالعيد يا كبير و حقطع تذكرة و التذكرة دى عليها ضرايب دافعها من جيبى يا ريس..و ححلق ان شاء الله و حاخد فاتورة من الحلاق يا باشا..و حجيب كارت شحن فودافون و حخربش الكارت و ححتفظ بيه يا ريس عشان احطه فالاقرار الضريبى..انت تؤمر.
ـــــــــــــــــــــــــــــــــــــــ
و عاوزين نضرب واحد و عشرين طلقه او طلقه بالتلاته..للوزيرة عائشة عبد الهادى و احب اقول لها بما انها مسئوله عن القوى العاملة و الهجرة..يا ريت تشوفى ليكى عقد عمل فأى دوله عربيه و ربنا يوفقك هناك ان شاء الله..و شباب مصر كلهم بيسلموا عليكى و بيقولوا لك متقطعيش الجوابات..
ـــــــــــــــــــــــــــــــــــــــ
.....يتبع

ESLAM

23 قول و لا يهمك:

كـــيــــــــارا يقول...: هو مينفعش يبقي موضوع كده لالالالازم يعني تغميه وتحبشه بشويه الاخبار اللي علطول في تفكيرنا

كوووووووووول سنه وانت طيب من غير رسايل وعاوزه بقي عديتي مصاصه مش تنسي; الثلاثاء, سبتمبر 30, 2008 7:02:00 ص
Empress appy يقول...: كل سنه وانت طيب وهما لا كل سنه والمصريين بخير وهما يوعدهم بشجره يدخلوا فيها جميعا يا رب

بس جامده فى الجون يا ريس هههههههههه
وبعدين متقال دي مش بتاعتى يا واد انت هههههههه; الثلاثاء, سبتمبر 30, 2008 10:29:00 ص
رئيس جمهوريه نفسى يقول...: كل سنة وانت طيب يا اسلام وبالنسشبة للحشيش الاخ معمر بيقولك هو اعتزال حشيش وبيضرب حقن; الثلاثاء, سبتمبر 30, 2008 12:15:00 م
عابر سبيل يقول...: كل سنة وانت طيب يااسلام واتشرفت بزيارة مداونتك وبجد عجبتنى دماغك جامدة قوى; الثلاثاء, سبتمبر 30, 2008 1:35:00 م
Zianour يقول...: هههههههههههههه

سلام انترناشيونال ليك يا اسلام
ولدماغك اللي ربنا يستر عليها
باقول لك هي الست الوالدة رأيها ايه في اللي بتعمله ده؟؟؟ دي زمانها خايفة عليك ومرعوبة من سنغافورة واللي يجي منها
ربنا يجعل كلامنا خفيف عليهم (اهل سيري لانكا طبعا!!)

كل سنة وانت اسعد
:)); الثلاثاء, سبتمبر 30, 2008 4:24:00 م
قوس قزح يقول...: رضي الله عنك وأرضاك
وهداك وأغناك
وعافاك وشفاك
ووفقك لخير الدعاء
وأجاب لك الرجاء
وأحبك بلا ابتلاء
وجعلك ساعياً للخير
مؤثراً في الغير
وكل عام وانت بخير; الثلاثاء, سبتمبر 30, 2008 4:26:00 م
kochia يقول...: كل دي سلامات وتحيات

الله يسلمك يا سيدي

وكل سنة وانت طيب; الثلاثاء, سبتمبر 30, 2008 8:07:00 م
غير معرف يقول...: كل سنه وانت طيب يا عم
بالعند فيهم
ماتقهرش نفسك
مالحياه فل الفل
كل حاجه غليت الا الحشيش
:P
استمتع بالعيد وماتشيلش جواك عشان الضغط
وكده وحش على المراره; الثلاثاء, سبتمبر 30, 2008 8:16:00 م
ahmed_k يقول...: هههههههههههههه
يا سلام لو الدعم طال كروت الشحن فئة ال100 جنيه تبقى فله ههههههههههههههه

وعايز أقول لك
أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد; الثلاثاء, سبتمبر 30, 2008 9:08:00 م
dina seliman يقول...: ههههههههه
كل سنه وانت طيب وبالف خير
مع انى حاسه ان بعد كل السلامات دى
خير خير
اهه اكيد فى المعتقل هيبقى فيه كحك العيد
وكل سنه وانت طيب; الثلاثاء, سبتمبر 30, 2008 9:39:00 م
غير معرف يقول...: هههههههههههههههههههههه
ههههههههههههههههههه
جامدة بجد
خاصة بتاعة عائشة
وصلها سلامى انا كمان والنبى
اوكى
متنساش
عيد سعيد
نيرة احمد محمود; الثلاثاء, سبتمبر 30, 2008 11:02:00 م
ghoneem يقول...: اهلا بيك

عيد سعيد وكل عام وانت بخير

تقبل الله منا ومنك

مرور للتهنئة بالعيد ولنا زيارة أخري ان شاء الله

تحياتي

بالتوفيق............; الأربعاء, أكتوبر 01, 2008 1:25:00 ص
الدفاع يقول...: كل سنه وانت طيب ياريس اسلام; الأربعاء, أكتوبر 01, 2008 1:31:00 ص
ندا منير يقول...: كل سنة وانت طيب يااسلام

وجميل قوى انك تفتكر الناس حواليك
وتبقى عالم بالظروف كلها

ربنا يكرمك على طول يارب; الأربعاء, أكتوبر 01, 2008 3:26:00 ص
ابو العربى يقول...: انت ذى العسل والله تقبل تحياتى وكل عام وانت بخير كان نفسى تبعت رساله لاحمد به عز رجل الخير والبر
تحياتى
ابوالعربى; الأربعاء, أكتوبر 01, 2008 11:39:00 م
Unknown يقول...: كل سنة وانت طيب يا اسلام بيه كل بقى كحك وبسكوت بس مالكش دعوة ساب ليه انت مالك ما اللى يسيب يسيب يا اخى..
المهم البوست جامد يا عم بس حاسب على نفسك انت دلوقتى بقيت مشهور بقى ويتخاف عليك ماشى؟؟؟
كل سنة وانت زى الفل; الخميس, أكتوبر 02, 2008 1:51:00 ص
maha zein يقول...: يخرب بيت دماغك علي الموضوعين
انت مين يا عم الحج
ايه الخط الجامد ده بجد
اكثر من رائع يا احمد ويا اسلام
لا بجد
جامدة اوي الفكرة دي واللى قبلها; الخميس, أكتوبر 02, 2008 2:38:00 ص
ماهرالشيال يقول...: كل سنة وانت طيب يا إسلام البوست ده أحزنني جدا لأنه فكرني بمأساتي الأليمة مع العيدية ، تخيل إن قرايبي كانوا بيشوفوا أخويا الكبير ،ومابيخدوش بالهم مني خالص ،لدرجة إني فكرت أيامها إني في العيد بألبس طاقية الاخفا ، أرجوك ما تفكرنيش ،مع إن أيامها يا أخي اللي كان بياخد ارباع كان بيبقى مبسوط ، كمان الانصاص كانت هنا أما الجنيه فكان محض خيال ، أعرف واحد صاحبي عمه كان راجع من السفر قام اداله عيدية خمسة جنيه جديدة ، صاحبي من الفرحة جاله القلب ، اسكت يا راجل دا انت قلبت علينا المراتب ، كنت هأنسى أقولك أنا معجب جدا بفكرة دعم كروت الشحن أم 100 جنيه اللي انت اتقدمت بيها للقائد الأعتى رغم انه راجل فاصل شحن والعشم فيه لا يتعدى دعم تحويل الرصيد أبو خمسة .... تحياتي; الخميس, أكتوبر 02, 2008 4:46:00 ص
سميرة يقول...: اسلام
انت بتتكلم في ايه بس ؟؟؟ عيدية ايه هو حد لسه معاه فلوس يدي عيدية ، كفاية كل سنة وانت طيب...
بس تعرف ولاد اختى صعبوا عليا ، قلت بلاش تعملي لهم احباط م الوقتي ، قمت ايه بقى اعطيت لهم عيدية وربنا يستر على اخر الشهر.
وبعدين كفاية حكوماتنا الغراء تقولنا كل سنة وانتوا طيبين يا شعب مصر ، دي بالدنيا ومافيها.....
ولا ايه؟؟؟؟

كل سنة وانت طيب ويارب في العيد الكبير تاكل لحمة (او تتصور جنبها)، واوعدك اعطيك عيدية يا اسلام...
تحياتي; الخميس, أكتوبر 02, 2008 8:33:00 م
mohamed ghalia يقول...: كل سنة وحضرتك طيب
عيد سعيد; الخميس, أكتوبر 02, 2008 10:14:00 م
صبرني يارب يقول...: والنبى على قلبك يا اخويا ما تفكرناش بالهم ده خلينا نعيد

وبعدين القهوه المره الى فاتت كانت مصلصه
اطلبلي واحد قهوه تركي بالبندق عشان باحبها

كل سنه وانت طيب; الجمعة, أكتوبر 03, 2008 12:30:00 ص
semsem يقول...: اسلام
لذيذ اوى الموضوع كالعاده
هههههههههههههههههههههههههه
وكل سنه وانت طيب
وف صحه وسعاده يارب; الجمعة, أكتوبر 03, 2008 1:50:00 م
dr.mohamed shamndy يقول...: كل سنه وانت طيب

ياريت الكلام ده يوصل ويتفهم ويتحس; الأحد, أكتوبر 05, 2008 1:53:00 ص