الأحد، 20 يوليو، 2008

افتكاسات فى بلاد حكومات ابوها السقا مات

تحديث جااااااااااااااااااااااااااااااااااامد
جداااااااااااااااااااااااااااااااااااااااااااااااا
ــــــــــــــــــــــــــــــــــــــــــــــــــ
اولا اصطباحه كده على الريق
و انا بلقى نظرة على
لقيت اشروووووووووف
عامل اللى انا نفسى اعمله
الا و هو
البوست ده هدية لكل محبى بذاءات تامر حسنى
عاوزكم تقروا البوست باستمخماخ
و استئنى و استرواق و استنشاق
و استوعاب و استرها يا رب
ــــــــــــــــــــــــــــــــــــــ
تحديث
ـــــــــــــــــــــــ
حتأخر فى الرد على التعليقات شوية
عشان فرح اختى يوم الاربعاء
عقبالكم كلكم يا اجدع مدونين
و كمان بقبل هدايا و نقطة
سيب الهدية فى البلوج والنقطة
حتجيلى انا بس لما تقرأ البوست
تحياتى للجميع


نظرا لان نتيجة مباريات الاهلى و الزمالك اصبحت مؤكدة دائما قبل اى مباراة بفوز الاهلى
تقرر اطلاق لقب جديد على الاهلى بدل بطل القرن
(عائلة ابو قرن)
(اه ما انا زملكاوى لازم اقطع فى الاهلى حتى لو كسب)
ـــــــــــــــــــــــــــــــــــــــــــــــــــــ
بعد الحملة الشرسة على احمد عز
و قرارة بتعديل صورتة امام الاعلام باعتبارة هو اساس اظهار صورتة الحقيقية
قرر انس الفقى اصدار وثيقة البث الفضائى
و كل ده عشان اللى يتكلم على عز
يتزغط زى الوز
ــــــــــــــــــــــــــــــــــــــــــــــــــ
بعد رفع اشتراك التليفون المحطوط ( الارضى)
و رفع تكلفة المكالمة و اشتراكات الخواص و المحاسبة عن ذلك بأثر رجعى
قرر عم محمد بحرية صاحب وصلة الدش
بتخفيض قيمة الدعم المقدمة منه لمشتركى الوصلة
و انه سيتم محاسبة المشتركين بزيادة 50 جنية
باثر رجعى من عام 2006
ـــــــــــــــــــــــــــــــــــــــــــــــــــــ
بعد اعتماد نتيجة الثانوية العامة
تقرر و بصفة نهائية اعتبار جميع طلبة الثانوية
عيال كدابة لانه قالوا ان الامتحانات صعبة
و النتيجة طلعت زى الفل
حتى الاول عالجمهورية اول مرة ميكونش جايب الدرجة النهائية
ـــــــــــــــــــــــــــــــــــــــــــــــــــ

بعد استمرار وزير التعليم فى منصبة حتى الان
قرر جميع الطلبة على مستوى الجمهورية
بتغيير اسماءهم الى اسم
(بلية)
و ذلك بعد ان تركوا التعليم و اتجهوا للعمل بورش الميكانيكا
( ما هو الوزير ما سابش التعليم العيال يسيبوه احسن )
ــــــــــــــــــــــــــــــــــــــــــــ
الهى يا رب اشوفك جعلوص مفعوص عريان بلبوص
ياللى فى مخى
(انا مخى - نظيف- يعنى ما فيهوش اى حد)
ـــــــــــــــــــــــــــــــــــــــ
الوضع مستقر فى مصر
و الحياة موووز
و الدنيا رز بلبن
بس الموز مفعص و الرز غالى و اللبن مقطع
العيب فى الشعب يا جماعة
مش فى
(الرز بلبن)
و لا
(الموز)
ــــــــــــــــــــــــــــــــــــــــــــ
قبل ما تقرأ الكلمتين الجايين
عاوز اسألك 50 سؤال
اول عشر اسأله
غير العشرة التانية
اما التالتة فهى مختلفة تماما عن الاولى
و الرابعة و الخامسة يتفقوا معا فى علامة الاستفهام
اللى فاهم حاجة يفهمهانى
بس بعد الفاصل
ــــــــــــــــــــــــــــــــــــــــ
سؤال واقف فى زورى

لو معاك ربع جنية مخروم فى جيب مخروم وقع فى خرم بلاعه طلع من ماسورة مخرومة
و قع فى مصرف مجارى
المصرف فيه اربع فتحات تصريف
دخل الربع جنية المخروم فى فتحة طلعت فيها حتة مخرومة
وقع فى خرم صغير
طلع الخرم ده خرم الحصاله
اللى اساسا مفتحاها ضايع منك

السؤال بقى :
اوصف لى بتاع مفاتيح اعمل عنده مفتاح للحصالة !
ــــــــــــــــــــــــــــــــــــــــــــــــــ
اعلن السيد المسئول
ان مفيش حد مسئول
و المسئولية كلها مسئولة من واحد مش مسئول
لو فهمت قصدى ايه
ادينى رنة
على قصر الرئاسة
ــــــــــــــــــــــــــــــــــــــــــــــ
سيتم ارسال فاتورة الطائرة الخاصة اللتى انتقل بها
الوزير حاتم الجبلى الى موقع حادث الضبعة فى مطروح
الى منزل كل متوفى فى الحادث
عشان يبقى يعرفوا يموتوا بعد كده من غير ما يستأذنوا
(منهم لله مفيش اى نظام مرورى و لا اسعافات جدية)
ـــــــــــــــــــــــــــــــــــــــــــــــــــــ
الرسالة دى جت لى عالفيس بوك
كيف للواطن المصرى ان ييأس
و فى بلده
رئيس مجلس الشعب : سرور
و رئيس مجلس الشورى : شريف
و رئيس الوزراء :
نظيف
و وزير المالية :
غالى
و رئيسها : مبارك
ـــــــــــــــــــــــــــــــــــــــــــــــ
انت مين فيهم ؟
اللى ركب القطر
و الا
اللى قطر مطروح داس عليه
للاجابة اتصل بالاسعاف
مش حتيجى
ـــــــــــــــــــــــــــــــــــــــــــــــــ
يا جماعة برضوا الحاجات دى فى كوكب بعيد خالص
فيه بلد اسمها مصر برضوا بس مش بتاعتنا
عشان محدش يقول انى اقصد اى حد فى البلد
احنا كل اللى فى بلدنا ناس ذوق ذوق ذوق يعنى
احنا اللى شعب ميستحقش النعمة

ESLAM

76 قول و لا يهمك:

kochia يقول...

تقريبا اول مرة اعلق عندك بس قريت قبل كدة مرتين تلاتة

عنوان المدونة بتاعتك قهوة نام يا مصر جميل اوي ومعبر
طيب الناس بعد اللي قلته ده هتعمل ايه غير النووووووووووم
مهي عاملة زي الدومينو مقفولة
لازم فورة جديدة
والفورة الجديدة بمشاريب جديدة
والناس فقرانة .. بتروح تنام

دمي اتحرق والله بس عارفه هعالجه ازاي
هروح انام برده
تصبح علي خير

شفقة هانم واحسان بك يقول...

الواحد مبيعرفش يعلق عندك ابدا بس بجد انتى ممتاز يا اسلام وبوستاتك بتعجبنى جدا
شفقة

بطوط حبوب يقول...

ههههههههههههههه بجد انت مشكله



كان الله فى عون سكان مصر ( الى فى الكوكب التانى على فكره ) والحمد لله على

semsem يقول...

انا جايه احجز كرسى رابع:)
وعوده للبوست:)
هصلى واجى بس

سارة علي يقول...

ازيك يا اسلام
بوست حلو جدا والاحلى انك بتعالج الموضوع بشكل دمة خفيف اوى
تحياتى

ٍSOU يقول...

عايز تلاقى حد يعملك مفتاح؟؟
انا اقولك الحل..هاتلى الحصالة و مالكش دعوة .. فى بيتها .. فى الحفظ و الامان يا مان :))

مهيج الجماهير يقول...

ايه ده ؟؟
فى بلد فعلاً بيحصل فيها الكلام ده ؟
احنا لايمكن نسكت علشان ده ضد حقوق الانسان
و احنا بنحترم حقوق الانسان
لازم الكل يتحرك
و انا
و انت
و رقصنى يا جدع
تيرارارااااااااااا
هههههههههههههههههههه
تحياتى ليك
سلام

appy يقول...

طيب يا سالام ما هما كل اللى اسمهم اسلام متفقين عليا عموما انا بشجع الاسماعيلى والنبى بزمتك بقى فيه حد له نفس يعمل حاجه بجد المرة دى مش عارفه اسخر من حاجه يا اسلام جبت اخرى خلاص من اللى بيحصل

Unique يقول...

الموضوع جميل اوي

مش عارفة اقول ايه

بمناسبة البلي .. اطمئن سواء اللي ساب التعليم

او اللي المفروض يخلي عنده احساس ويسيبه

كلهم هيبقوا بليه طال الزمان او قصر

zOzO يقول...

ههههههههههههه
ههههههههههههههه

يخربيت كدا
البوست كلوا حلو
وفعلا بلدنا كل اللي فيها
ناس
زوق زوق زوق
مدهش ( فكرتني بكرتون نيمو )
هههههههههههههههههههه

حلو اوي يا اسلام
بجد

semsem يقول...

بجد مت من الضحك:)
البوست فظيع يااسلام
وطلعت زملكاوى
اخىىىىىىى
ههههههههههههههههه
بس بجد حلو
احنا بس خايفين عليك تتمسك ولا حاجه

enjy يقول...

ايه يا اسلام دة الخط صغير قوى والله مش عارفة اقرا ولاااااااااا نص كلمة والله بجد مش عارفة اقرا ابقى كبر الخط عشان البوست ما يفوتنيش

Desert cat يقول...

بعد احداث 24 ساعه اللى قريتها عندك
واللى من خلالها ذكرت الرز بلبن واللى انا مش هعتبره تلئيح كلام
لانى بقالى سنة بعمل رز بلبن لزوار مدونة برنامج
انت تسال والكمبيوتر يجيب
ولحد النهارده لسه بتعلم طريقه الطهى الله اكبر عليا
شكرا على احداث 24 ساعه دى يا اسلام
تحياتى

مهيج الجماهير يقول...

الف الف الف مبروك يا باشا
و عقبالى يا رب
و كنت عاوز اسألك سؤال ...
جبتوا الرقاصة ؟؟
ولا اتكلملك انا على واحدة ؟؟
متخافش هجيبهالك مدعمة ... و قطاع عام كمان
هههههههههههههههههههههه
عامة الف مبروك
سلام

mohamed ghalia يقول...

الحمد لله إنى الكلام ده بيحصل فى مصر إلى فى الكوكب التانى مش مصرنا الحبيبة هههههههههههههه
تحياتى
تقبل مرورى

Hosam Yahia حسام يحى يقول...

بجد بوست مذهل


هات واحد كرابنشينو على مااعلق بس بسرعه

حنين.. يقول...

الف الف مليوووووووووون مبروك لاختك, والفين مبروك ياعروسه يا غاليه عندنا.. من العين دايما محروسه وعقبالنا كلنا.. والحارس ربنا,ههههههه , وبعدين انت اتكلمت فى كل المواضيع هنعلق احنا ونقول ايه, بس طلعت زملكاووووووى...هههههههههههههههه, طبعا دى مفيهاش تعليق, بس والله بما انى اهلاويه الا انى من المتعاطفين مع حال الزماللك, وكان الله فى عونك, ويارب يفرحكم با الزماللك يارب, بس بعيد عنااااااا, تحياتى..... وما تنساش.. تجيب فى القهوه المره الجايه شربات وحلويات

زى الهوا يقول...

ياااااااااه انا كنت كاتبة تعليق طخين هنا ومشى مع البدج اللى كانت فيند , خسارة

عموما تعليقى على البوست إن هم يضحك وهم يعيط

المدونة عجبنى جدا تصميمها , وخصوصا لأنى بطيخة اوى فى حكاية التصميمات دى

enjy يقول...

هو فى ايه ماهو الخط حلو وزى الفل اهو امال مين اللى اشتكى التعليق اللى فات؟؟؟ حاجة غرييييييييييييييييبة جدا وعندك واحد شربات بالموز عشان خاطر فرح اختك مبروك ليها وعقبال ما نفرح فيك يا بيه ....... بس ايه الكلام الجامد دة يا ابنى لم لسانك شوية عشان الودان ليها حيطان........

اربعين سنة ستيوتند يقول...

حلو و جاااااااااامد آخر حاجة يا اسلام

مدحت محمد يقول...

اولا الف مبروك يااسلام

ثانيا بقى هو مين اللى ابو قرن ياواد

وحياتك بعد الفرح اشترى خروف اخليه ينطحك

ام عز المهم قصدى انت مالك بعز وام عز وابو عز على راى بنت مصرية مش اسمها قاهرة ام عز طيب زعلانين ليه بقى

على العموم بوست فى الجون ماعدا القرن ده

semsem يقول...

اولا الف الف الف الف مبروووووووووك
وسمعنى احلى زغروطه
لولولولولولولولو
اتأخر براحتك
ده فرح اختك ودهالاهم
الله يوفقها ويسعدها
انا جايه اسلم بس

semsem يقول...

وبالنسبة لللقهوة
متقلقش هاخد بالى من الزياين كلهم
واشوفك يارب على خير
اختك سمسم

سارة علي يقول...

اااااااااااااالف مبروك يا اسلام لاختك وربنا يتمملها على خير متقلقش سبتلك النقطة على باب المدونة وهنزل الساقع للزباين فى القهوة هههههههههههه ربنا يكرمك يا رب
تحياتى

نوره الخشن يقول...

وجون وجووووون وجووووووون وجوووووون وجوووووووووووووووووووووووووون

حلوة مووووووووت خصوصاً بالك النظيف واخدلي بالك
وكمان رئيسها مبارك ووزير ماليتها غالي ياعيني على التورية

تدوينة حلوة موت موت موت يااسلام

بس فين البلد دي ياترى .. ياترى يا هل ترى
اكيد دي مصر القمح اللي جنب اسيوط البرتقال كده
صح .. اظن عداني العيب وأزح

dina يقول...

هههههههههههههههههههههههههه
اه و الله يا اسلام معاك حق...احنا اللى منستحقش البلد دى ولا الناس دى...احلى حاجة بتاعة الطلبة اللى بقوا بلية ..و فعلا يا احنا نسيبله التعليم يا يسيبنا هو لا قدر الله .. يبقى ننفد احنا بجلدنا احسن و نشترى اعصابنا و حياتنا
تحياتى

مهيج الجماهير يقول...

3 تعليقات فى بوست واحد ؟؟
انا حطمت الرقم القياسى بتاع نفسى
مااااااااااااا علينا
انا سيبتلك واجب عندى فى المدونة
ياريت تشرفنى و تاخد الأسئلة من هنا لو عاوز تحل الواجب
تحياتى

semsem يقول...

اممممممممممم
ايه ياعم دول يومين
دول كده تلاته
عموما خد بالك اهم حاجه من اختك
ولما تيجى طمنى
يلا سلام

micheal يقول...

ههههههههههه..والله كل فقرة مسخرة لوحدها بالذات رسالة الفيس بوك
:)
يا عم سيبكوا من الأهلي عشان تقدروا تركزوا كويس
:)
عامة كان الله في العون لان ولاد الزمالك هما اللي بيقطعوا في بعض
بس سيبك أنت من الاهلي والزمالك
البوست لذيذ جدا
تحياتي

سارة علي يقول...

ازيك يا اسلام
يا رب تكون بخير
ليك عندى تاج فى مدونتى تعالى خدة
تحياتى

ريمان يقول...

السلام عليكم


عجبتنى اوى مدونتك وشكلها الجميل

والبوست كمان جميل

حياك الله

dina seliman يقول...

انا اعلن انى مش انا اللى معلقه هنا
ده حد تانى مش انا
هوتقريبا لانى سهرنا ومغيبه ومش فى وعى
تتخيل لو مسكونى عشان كونت عندك هيقتنعوا بالرد ده

عموما كفايه المصايب اللى انا كتباها
بس بجد
المفروض ندور على حد يوردلنا عيش وحلاوه
كده مينفعش

مواطن مصرى نايم يقول...

كوشيا

اه فعلا اول مرة بس كل مرة زورتينى فيها كنت بعرف انك دخلتى البلوج
نورتينى بتعليقك الجميل ده
لازم الناس تاخد صدمة بان حد يقول لهم حالهم اللى هما فيه
زى كلمة نام يا مصرى
دا الوضع فعلا
لازم صدمة موقفية
عشان يصحح وضعة
اما بقى حكاية الفورة الجديدة
يا سيتى المشاريب عليا بس نبدأ
تصبحى على خير
تحياتى
اسلام

مواطن مصرى نايم يقول...

شفقة هانم

و الله يا شفقة يا ختى انا اهم حاجة عندى ان البوست يعجبك
و كفاية اوى انك تكتبى كلمة جميل
لانى فعلا بحس ان اللى انا بكتبة لا رقى لمستوى النشر
بحس انه تافه
بس الحمد لله ظنى بيطلع مش فى محله لما بشوف تعليق حد زيك
نورتينى يا شفقة
سلامى لاحسان
اسلام

مواطن مصرى نايم يقول...

بطوط حبوب

يا حودة انا و لا مشكلة و لا حاجة انا غلبااااااااااااان
هههههههههههههههه
ربنا يكون فى عون الناس فعلا
نورتنى يا اجدع دكتور
تحياتى
اسلام

مواطن مصرى نايم يقول...

سمسم

من غير ما تحجزى الكراسى كلها بتاعتك
انتى تؤمرى
ههههههههه

مواطن مصرى نايم يقول...

سارة على

ربنا يخليكى
بس بجد دى مبالغة انا مش بعالج و لا حاجة
دا انا على قدى
و بجد متشكر عالتعليق الجميل ده
تحياتى
اسلام

مواطن مصرى نايم يقول...

sou

عارفة الحصالة متغلاش عليكى
بس تعليقك ده وضح انك ما فهمتيش اللى انا اقصده من الحتة دى
دى ليها معنى جامد جداااااااااااا
لو اتفهم ممكن ابقى خلف الاسوار
هههههههههههههه
تحياتى
اسلام

مواطن مصرى نايم يقول...

مهيج الجماهير

ايه يا عم انت عاوز ترقص الجماهير فى البلوج بتاعى
هههههههههههه
لا يا عم اطلعوا ارقصوا على باب القهوة
خلى اى ظابط يقبض عليكم بتهمة هز وسط فى الطريق العام
هههههههههههههه
تحياتى
اسلام

مواطن مصرى نايم يقول...

ايبى

لا لا انا مش متفق عليكى هو انا اقدر
بس انا زملكاوى و بحب الاسماعيلى و الاتحاد عشان اسكندرية و طلائع الجيش عشان احمد الكاس من اسكندرية اللى ماسك الفريق
و كمان هو حبيب قلبى على طووول كنت بقعد معاه فى نادى الاوليمبى
(شفتى تجمع الاندية ده)
اما بقى السخرية
احسن حاجة ان الواحد يحول السلبية لكوميدية ساخرة تؤدى للضحك و تتفاعل مع شخصية الفرد اللى بطبيعتة محب للمرح
و تسجل فى ذاكرتة على شكل موقف كوميدى
من الصعب نسيانة بسهولة
بمجرد ما اى شخص يفتح الموضوع قدامة
المخ يرسل اشارة لذاكرة المدى القصير
اذا لم يجد الموقف يذهب لذاكرة المدى الطويل
و ذلك لان المواقف المضحكة تدوم لفترة اطول

(شفتى التحليل النفسى العلمى اه دا انا واد مشكلة)
ههههههههههههههههه
لا يا ايبى لازم نضحك للدنيا عشان تضحك لنا
تحياتى
اسلام

مواطن مصرى نايم يقول...

unique

لا يسيب مين
دا اساسا تاجر بلى
ربنا عالظالم
بجد نفسى اشوفه عشان اسرد له سلبياتة وجها لوجه
يمكن يخلى عنده دم
تحياتى نورتينى
اسلام

مواطن مصرى نايم يقول...

زوزو

دا نيمو غلبان
هو يقدر يعمل حاجة فى العالم ده من غير ابوه
دا ممكن يتاكل زى ما احنا متاكل حقنا
ربنا عالظالم
ههههههه
تحياتى يا زوزو
(زهرة احلى)
اسلام

مواطن مصرى نايم يقول...

سمسم

هههههههههههههههه
انتى زملكاويه
يبقى كويسه فى كل حاجة
و متفقة معايا فى كل حاجة
الا تامر حسنى
اخرته على ايدى الواد ده
ههههههههههههههه
تحياتى
اسلام

مواطن مصرى نايم يقول...

انجى

تم التعديل يا اوجه عشان خاطرك
اصل بعيد عنك الويندوز عندى مهيس
و انا مكسل انزل ويندوز
ههههههههههههههههه

مواطن مصرى نايم يقول...

قطه الصحراء

هههههههههههههههه
يا قطة هو مش تلئيح
بس جت عالجرح و انا لاحظت موضوع الرز بلبن فى المدونة فعلا
بس لو عاوزة تتعلمى الحاجة عندى بتعملة زى العسل
ابقى اخليها تكلمك تقولك الطريقه
هههههههههه
تحياتى
اسلام

مواطن مصرى نايم يقول...

مهيج الجماهير

الله يبارك فيك يا باشا
لا يا عم رقاصة مدعمة ايه بس
دا الحاجة لو سمعت حكاية الرقاصة دى كانت اقامت عليا انا و انت الحد
لا مش الحد بس
دا الحد و الاتنين و التلات
و الاسبوع كله
هههههههههه
تحياتى
اسلام

مواطن مصرى نايم يقول...

mohamed ghalia

اه يا راجل مصر بتاعتنا مفيهاش نظيف
و لا مبارك
كفاية بقى لاروح فى داهيه
هههههههههههه
نورتنى
تحياتى
اسلام

مواطن مصرى نايم يقول...

حسام يحي

ربما يخليك
و الكرابنشينو جاهز يا باشا
انت تؤمر
تحياتى
اسلام

مواطن مصرى نايم يقول...

فــــــــــــاصل اعـــــــــــــلانى
و سأعود ان شاء الله
للرد على باقى التعليقات

سومه...مجنونه فى بلد عاقل يقول...

سيبك من كووووووووووووووووول دا
مبروك لاختك واحنا اللى عاوزين الحلاوه والشربات والنقطه
امال ايه فى ظل ارتفاع نسبه العنوسه المفروض اللى تتجوز تجيب هديه لكل عانس فى اهلها ...متسالش ليه هو كدا وخلاص بلطجيه
ومفيش اتفضلوا ولا اى عزومه مركبيه حتى انت منوفى يا عم ولا ايه
يا ستار يا رب عليكم
وانت معندكش فكره عن الهرم الرابع ؟؟؟
تحياتى ليك سومه_87

مواطن مصرى نايم يقول...

حنين

الله يبارك فيكى دا ايه الكلام الجميل عقبالك يا رب
و الله ساعتها لو اعرف اوزع شربات على كل البلوجريه و الله اعملها الا ازا لو عزمتينى مع انى مش بحب ارقص عشان البرستيج
لا حرقص بقى فى فرحك
اما بقى حكاية الزمالك فإن شاء الله فرحتنا حتبقى على حساب الاهلى
هههههههههههه
انا و الله زملكاوى بس مش متعصب خالص
اما بقى الشربات دا انتى تؤمرى
تحياتى
اسلام

مواطن مصرى نايم يقول...

زى الهوا

ماله التعليق راح فين
مشى مع البدج
بدج ايه
و الله انا حاسس انى غبى
عموما فداكى اى حاجة
المهم انك نورتى البلوج
هو فعلا هم يبكى و هم يضحك
بجد تعليقك اللى اختفى انا زعلت عليه
بس مش مشكلة
تحياتى
اسلام

مواطن مصرى نايم يقول...

انجى

لا ما الخط كان صغير
بس انا كبرتة عشانك
و الله يبارك فيكى يا رب
عقبالك ان شاء الله
و انا اساسى فى الفرح
بس لو ما عزمتنيش
حسرق البلوج بتاعك
هههههههههههه

اسلام

مواطن مصرى نايم يقول...

اربعين سنة ستيوتند

يا جميل انت اللى جامد
نورتنى يا باشا
تحياتى
اسلام

مواطن مصرى نايم يقول...

مدحت محمد

الله يبارك فيك يا باشا عقبالك
اه ابو قرن
ايه ما انا زملكاوى
هههههههههههههههه
بنت ام عز القاهرة
ههههههههههههههه
لا جامده من بنت مصرية و منك
تحياتى
اسلام

مواطن مصرى نايم يقول...

سمسم

ربنا يخليكى يا سمسم
عقبالك يا رب
لما تلاقى البنى ادم اللى تقولى (هو ده)
ماشى ماشى
لما افوق لك بس
تحياتى
اسلام

مواطن مصرى نايم يقول...

سمسم

نسيت يا باشا اشكرك
على انك خليتى بالك من القهوة فى غيابى
يا اجدع سمسم فى الدنيا
بس انا بحب اسم اسماء اكتر برضوا
تحياتى يا سمسمه
اسلام

مواطن مصرى نايم يقول...

فــــــــــــــــــــاصل اعلانى
مش فاصل شحن
يعنى شوية كده و حرجع ارد على باقى التعليقات
wait me
يا بشر
سنعــــــــــــــــــــود
ان شاء الله

ٍSOU يقول...

طب اجاوبك بصراحة واروح انا ورا الشمس بدالك :))

مواطن مصرى نايم يقول...

سارة على

الله يبارك فيكى يا رب
عقبالك و انا اللى اوزع الساقع و الشربات
ان شاء الله
بس تبقى تعزمينا
شكرا ربنا يخليكى يا رب و يبارك لك
تحياتى
اسلام

مواطن مصرى نايم يقول...

نورة الخشن

ههههههههههههههههههه
واخده بالك انتى ههههههه
ماشى ودينى فى داهية
يا كورة و لا تورية و لا حاجة دا انا غلبان
(صبرك عليا بتسيحى عالبلوج)
(استر بلونسكى بتقولك بقى كده)
ههههههههههههههههههه
مفيش حد عارف حكاية استر دى خالص
يعنى اللى حيقرا التعليق مش حيفهم
(وش بيغمز)
هههههههههه
اه مصر القمح و اسيوط البرتقال فعلا
بس برتقال سكرى زيك يا نورة
تحياتى
اسلام

مواطن مصرى نايم يقول...

دينا

ايه يا بنتى فكك انتى من كل ده
قبلتى فى كلية ايه
طمنينى عليكى
يا رب تكون هندسة زى ما كنتى عاوزة
تحياتى
اسلام

مواطن مصرى نايم يقول...

مهيج الجماهير

يا باشا انت تعلق زى ما انت عاوز
دا انت تشرفنى
و شكرا عالواجب
انا روحت شوفتة
و هو حينزل فى البوست الجاى ان شاء الله
شكرا انك افتكرتنى
ربنا يخليك
تحياتى
اسلام

مواطن مصرى نايم يقول...

سمسم

انا جيت اهوه يا سمسمسه
و كمان فوقت لك عشان حكاية تامر حسنى
حتشوفى حتشوفى
صبرك عليا
ههههههههه
بجد الف شكر عالسؤال
ربنا يخليكى
تحياتى
اسلام

مواطن مصرى نايم يقول...

مايكل

دا بتاعة الفيس بوك دى اللى بجد عجبانى
التورية جامده جدا فيها
الحمد لله ان البوست عجبك
اما بقى الزمالك
انا لما بقطع فى الاهلى بس عشان اغيظ الاهلاوية
لانى زملكاوى بس مش متعصب خالص
يعنى مش بتفرق قوى لو كسب او خسر
بس بزعل شوية
يالا كل اهلاوى منه لله
هههههههههههههههه
تحياتى
اسلام

مواطن مصرى نايم يقول...

سارة على

الحمد لله يا سارة ربنا يخليكى عالسؤال
و بجد الف شكر انك افتكرتينى بالتاج
ان شاء الله حنزله فى البوست الجاى
و فين تاجات تانية فى البوست
و حدبسك فى واحد
تحياتى
اسلام

مواطن مصرى نايم يقول...

ريمان

ربنا يخليكى
انتى نورتى البلوج
الحمد لله انه عجبك
تحياتى
اسلام

مواطن مصرى نايم يقول...

دينا سليمان

ههههههههههههههههههههه
متخافيش لو حد مسكك
حبيعك
هههههههههه
و اقول انك زعيمة التنظيم
هههههههههههه
يالا ما انتى حتقرى عليا انا عارف
هههههههه
تحياتى
اسلام

مواطن مصرى نايم يقول...

سومة

ههههههههههههههههههههه
انتى مشكلة يا سمسمه
بقى انا اللى منوفى
هههههههههههههههههه
دا انتى كنتى حتنورى الفرح
و اجيب لك شربات و ابعت لك نقطة
و عقبالك ان شاء الله
قريب جدااااااااااا
بس بقى لو عملتى باصلك(المنوفى يعنى)و ماعزمتنيش
حتشوفى منى العين الحمرا
هى مش حمرا اوووى
هى بمبى
ههههههههه
تحياتى
الا ايه حكاية الهرم الرابع
كنت سامع قبل كده انه ام كلثوم
هههههههههه

اسلام

مواطن مصرى نايم يقول...

sou

لا يا بنتى بلاش انتى
انتى على وش جواز و مش فاضيه لحكاية الشمس
هههههههههههههههه
خليكى فى القمر (العريس)
دا احسن من اى حاجة
هههههههههه
تحياتى
اسلام

أشرف حمدي يقول...

شكرا يا باشا على التحديث والتنويه
بس كنت تكتب برضه يا عم :) وفيها ايه يعني
كلنا نكمّل بعض
تحياتي يا باشا
وآسف على التأخير

مواطن مصرى نايم يقول...

اشرف حمدى

ربنا يخليك يا اشروووووف
لا خلاص بعد اللى انت قلته ده ما ينفعش حاجة تانية تتقال
دا بوستك عاجبنى جدااااااااااا
لانى بجد كنت متغاظ من الواد ده
و يا باشا انت تيجى فى اى وقت
ميهمكش اى حاجة يا اشروووووف
كفاية انك نورتنى
تحياتى
اسلام

ندا منير يقول...

جميل جدا النقد دا
ومن اجمل الاساليب اسلوب النقد

مواطن مصرى نايم يقول...

ندا منير

ربنا يخليكى
دى مجاملة بجد
دا انا قبل ما انزل اى بوست فيه نقد
بكون حغير رأيى على اخر لحظة
مش بيعجبنى بجد
بس ربنا يخليكى
تحياتى
اسلام

ندا منير يقول...

على فكرة يا اسلام دى مش مجاملة وانا مش بجامل
بجد انا بحب اسلوب النقد جدا وبحب اقرا اى موضوع فيه نقد
وانت مدونتك جميلة جدا
وصدقنى مش مجاملة خالص
ومتغيرش رايك ابدا انقد براحتك بس المهم النقد ميبقاش زيادة قوى عشان مش يضرك لكا احنا من حقوقنا كبشر اننا نقول اللى احنا عايزينه ومن حقنا النقد

مواطن مصرى نايم يقول...

ندا

ميرسى بجد ربنا يخليكى
ان شاء الله اشوفك مذيعة اد الدنيا
عشان تصتدفينى
فى البرنامج بتاعك
تحياتى
اسلام

الزباين

الزباين و يا رب ابعد عننا الضرايب