الأحد، 16 مارس 2008

اعاده نشر : قصيدة نام يا مصرى

خاص بالموقع : كتبة احد اصدقاء الموقع
نام يا مصرى مصر مش عايزة تناديك
ياللى فقر الدنيا أصبح لك شريك
ياللى كان دائك وفائك والكرامة وكبريائك
الحشيش والبانجو ساقك.كبريائك مات خلاص البركة فيك
نام يا مصرى مصر مش عايزة تناديك
ياللى دايما كنت رافع بالسلاح أيدك لفوق
بالبنادق والمدافع خليت العالم يفوق
النهاردة سهل جدا تحكمك حتة حشيش
الشيوخ فوق مالطة تدن والشباب مابيختشيش
رقصة بلدى ورقصة تانجو
مرة خمرة ومرة بانجو
واللى م الدوامة ينجو يربى دقنه ويعاديك
نام يا مصرى مصر مش عايزة تناديك
فصلوا دستور مقاسهم يلبسوه بس الكبار
وأنت تحت نعال مداسهم قلت أه زى الحمار
قلت أه ولا حد همك مين يدوس فوق وش مين
هما يقروا الفاتحة وأنت كل حرف تقول أمين
أنت عارف بس صامت
حتى بطنك لما صامت
كان حزامك فوقها قامط للزراير يشتكيك
نام يا مصرى مصر مش عايزة تناديك
مين بيفهم فى السياسة؟لا الافندى ولا المدام
المهم الماتش إمتى؟والنتيجة كام لكام؟
والعشا فين النهاردة وفى المسلسل عملوا إيه
ولعيب الكورة الفلانى ساب ناديه فى الدورى ليه؟
كله بيهلوس وهايص
وإنت يا أبن المصرى لايص
جوه مسرح العرايس
والخيوط رابطة فى إيديك
نام يا مصرى مصر مش عايزة تناديك
كنت لما تقول معارض ألف واحد كان يخاف
بعت صوتك فى المعارض وأستغطيت باللحاف
قول نعم.حط العلامة .وأوعى تقرا فى يوم كتاب
هما عايزينك نعامة دافنة راسها فى التراب
والطاووس جنبك يخطى
بصمجى.ويقول دا خطى
وإنت لما رضيت توطى
شوف بقى اللى ح يجرا فيك
نام يا مصرى مصر مش عايزة تناديك

9 قول و لا يهمك:

Wael يقول...

الله , عبقرىاللىكتبها
وفعلا كل كلمة فيها بتعبر عن اللى بيحصل

جميلة جداااا

مواطن مصرى نايم يقول...

ربنا يخليك يا وائل و شكرا على الزيارة الحلوة دى

لعلمك اللى كاتب القصيده كاتبها مخصوص للبلوج بتاعى

Asmaa mahaba يقول...

ايه دا انضم بقى لحزب الاحلام النايمين وابقى ادخل عندى البلوج شوف فوائد النوم التى لا تحصى او تعد ههههههه حتعجبك وعشان تعرف ان النوم دا سياسه توفيريه ونظام اقتصادى رهيب...
تحياتى ليك على القصيده دى
سومه_87

مواطن مصرى نايم يقول...

تمت الزيارة يا سومة قبل ما اكتب الرد ده
لازم نشجع على الصحيان حتى مع تعدد فوائد النوم
و اللى كابس عليه النوم يشرب نسكافيه

NoNa يقول...

السلام عليكم

اولا البلوج جميلة جداااااا

اما عن القصيدة

فاممفيش كلام

كفاية الكلمات والاسلوب

بجد تسلم ايدك

بس اقولك حاجة

مهما مصر فيها اية

الحمد الله احسن منغيرنا واحسن ان نتغرب بعيد عنها

مواطن مصرى نايم يقول...

شكرا nona
على التعليق الحمد لله ان البلوج عجبك
اما القصيدة مش انا اللى كاتبها والله
دا خالى
و دة البلوج بتاعة
men-misr.blogspot.com
هو لسة عامله
بس حينزل عليه كل القصايد بتاعتة
-----------
و شكرا بجد على التعليق

Unknown يقول...

قصيدة جميلة جدا وأسجل غعجابى باللى كتبها لانها واقعية جدا
وشكرا يامواطن على إمتاعنا بالمدونة الجميلة دى ويا رب نتلاقى دايما على خير

مواطن مصرى نايم يقول...

ayman badr
ربنا يخليك يا جميل
و شكرا على المجاملة
تم عمل بلوج لمؤلف القصيدة
اللى هو خالى يعنى
اهوه
www.men-misr.blogspot.com

maxbeta3zaman يقول...

الله يا نايم انا عترت فيها وانا امر على البلوج جميله القصيده وخفة الظل باينه فى سطورها طبعا بعد سيناريو الشادر انا قلت اروح للماضى لقيت هنا انتاج فخم وزجلى كمان وعشان كده انا حابعت لك قصيده للأبنودى اسمها أنا المصرى ( إذا لم تكن قرأتها ) هذه القصيدة تبكينى شخصيا كلما قرأتها تحياتى لك ولقلمك

الزباين

الزباين و يا رب ابعد عننا الضرايب